ຢູ່ເມືອງຊານດີເອໂກ ລັດຄາລີຟໍເນຍ ສະຫະລັດອາເມລິກາ ໄດ້ເກີດເຫດຍິງກັນໃນຕອນຄ້າຍຄ່ຳວັນທີ 30 ເມສາຜ່ານມາ ສົ່ງຜົນເຮັດໃຫ້ 2 ຄົນເສຍຊີວິດ ລວມທັງມືປືນ ແລະ 7 ຄົນໄດ້ຮັບບາດເຈັບ.
ບໍລິສັດກະຈາຍສຽງອາເມລິກາ ຫຼື ABC ຊ່ອງ 10 ໄດ້ລາຍງານວ່າ ເຫດການຍິງກັນເທື່ອນີ້ເກີດຂຶ້ນໃນເວລາປະມານ 18:00 ໂມງຂອງວັນທີ 30 ເມສາຜ່ານມາ ໂດຍຂະນະນັ້ນ, ກຸ່ມໜຶ່ງທີ່ມີປະມານ 30 ຄົນພວມຈັດງານສະຫຼອງວັນເກີດໃຫ້ຊາຍໜຸ່ມຄົນໜຶ່ງຢູ່ສະລອຍນ້ຳກາງແຈ້ງແຫ່ງໜຶ່ງ ແລະຄົນເຫຼົ່ານີ້ສ່ວນຫຼາຍແມ່ນຊາວອາເມລິກາເຊື້ອສາຍອາຟຣິກາ ໂດຍມືປືນນຸ່ງໂສ້ງຂາສັ້ນສີນ້ຳຕານເຂົ້າໄປແລະຍິງປືນໃສ່ຄົນຢ່າງບໍ່ມີເປົ້າໝາຍ.
ຫຼັງໄດ້ຮັບລາຍງານ, ເຈົ້າໜ້າທີ່ຕຳຫຼວດກໍເຖິງຈຸດເກີດເຫດທັນທີ ໂດຍຕຳຫຼວດ 3 ຄົນໄດ້ຍິງປະທະກັບມືປືນ ແລະຕໍ່ມາມືປືນກໍຖືກຕຳຫຼວດວິສາມັນຄາດຕະກຳເສຍຊີວິດຄາທີ່.
ເຈົ້າໜ້າທີ່ຕຳຫຼວດ ຢືນຢັນວ່າ: ມືປືນຄືທ້າວປີເຕີ ເຊລິສ ເປັນຄົນຜິວຂາວອາຍຸ 49 ປີ ແລະປັດຈຸບັນຍັງບໍ່ທັນຮູ້ເຈຕະນາຂອງຜູ້ກໍ່ເຫດເທື່ອວ່າກໍ່ເຫດເພື່ອຫຍັງ?