ຫວ່າງມໍ່ໆນີ້, ໜັງສືພິມ "ແວ່ນແຍງການຄ້າ" (Business Mirror) ຂອງຟິລິບປິນລາຍງານວ່າ: ໃນເດືອນມັງກອນ ແລະ ເດືອນກຸມພາປີນີ້, ນັກທ່ອງທ່ຽວຈີນໄດ້ມາທ່ອງທ່ຽວປະເທດຕົນເພີ່ມຂຶ້ນຢ່າງໄວວາເປັນອັນດັບ 2, ຂະນະທີ່ລັດຖະບານຈີນເຄີຍຮັບປາກວ່າຈະໃຫ້ນັກທ່ອງທ່ຽວປະເທດຕົນໄປທ່ຽວຟິລິບປິນຢ່າງໜ້ອຍ 1 ລ້ານເທື່ອຄົນໃນປີນີ້.
ກະຊວງທ່ອງທ່ຽວຟິລິບປິນເປີດເຜີຍວ່າ ເດືອນມັງກອນ ແລະ ເດືອນກຸມພາປີນີ້, ນັກທ່ອງທ່ຽວຈີນມາທ່ອງທ່ຽວປະເທດຕົນໄດ້ເພີ່ມຂຶ້ນ 25,42% ຫຼື 1 ແສນ 6 ໝື່ນ 4.000 ເທື່ອຄົນ. ຂະນະທີ່ທ່ານນາງ ວັນດາ ໂຄຣາຊອນ ເຕໂອ ລັດຖະມົນຕີກະຊວງທ່ອງທ່ຽວປະເທດດັ່ງກ່າວກໍໄດ້ກ່າວວ່າ: ຈາກການທີ່ລັດຖະບານຈີນຮັບປາກວ່າຈະໃຫ້ນັກທ່ອງທ່ຽວປະເທດຕົນໄປທ່ຽວຟິລິບປິນ 1 ລ້ານເທື່ອຄົນນັ້ນ, ຕົນກໍເຊື່ອວ່າ ອາດຈະລື່ນເປົ້າໝາຍໃນການດຶງດູດນັກທ່ອງທ່ຽວຕ່າງປະເທດໃຫ້ໄດ້ເຖິງ 6 ລ້ານ 5 ແສນເທື່ອຄົນ ຂຶ້ນເປັນ 8 ລ້ານເທື່ອຄົນ. ຂ່າວລາຍງານອີກວ່າ, ລັດຖະບານຟິລິບປິນໄດ້ສ້າງຄວາມສະດວກໃຫ້ແກ່ຜູ້ຂໍວີຊານັ້ນ ຈະສົ່ງຜົນໃຫ້ນັກທ່ອງທ່ຽວຈີນໄປທ່ຽວຫຼາຍຂຶ້ນ.