ຕາມຂ່າວສານຊິນຮວາ: ຄະນະກຳມະການເສດຖະກິດສັງຄົມອາຊີປາຊິຟິກອົງການສະຫະປະຊາຊາດ ຫຼື ESCAP ໄດ້ເຜີຍແຜ່ບົດລາຍງານຢູ່ນະຄອນຫຼວງບາງກອກປະເທດໄທໃນວັນທີ 1 ພຶດສະພານີ້ວ່າ, ພື້ນຖານເສດຖະກິດຂອງຈີນ ຍັງສືບຕໍ່ໄດ້ຮັບການພັດທະນາຢ່າງໜັກແໜ້ນ, ຂະນະທີ່ການປະຕິຮູບອົງປະກອບດ້ານການສະໜອງ ກໍໄດ້ສ້າງໂອກາດໃຫ້ແກ່ການພັດທະນາໃນໄລຍະກາງແລະຍາວ.
ບົດລາຍງານດັ່ງກ່າວລະບຸວ່າ, ຂະແໜງການທີ່ມີມູນຄ່າເພີ່ມສູງຂອງຈີນ ພວມຄ່ອຍໆເຂົ້າມາແທນຂະແໜງການທີ່ມີຄວາມສາມາດການຜະລິດເຫຼືອເຟືອ ແລະກາຍເປັນທ່າແຮງຂອງການປະກອບອາຊີບແລະການຜະລິດ. ພ້ອມກັນນັ້ນ, ບົດລາຍງານດັ່ງກ່າວຍັງໄດ້ຄາດຄະເນວ່າ ອັດຕາການເຕີບໂຕເສດຖະກິດຂອງກຸ່ມເສດຖະກິດທີ່ພວມພັດທະນາຢູ່ອາຊີປາຊີຟິກໃນປີນີ້ ຈະຢູ່ໃນລະດັບ 5% ແລະປີໜ້າຈະຢູ່ໃນລະດັບ 5,1%, ເຊິ່ງສູງກວ່າປີຜ່ານມາທີ່ຢູ່ໃນລະດັບ 4,9%. ແນວໃດກໍດີ ເພື່ອຮັກສາເສດຖະກິດໃຫ້ພັດທະນາຢ່າງຕໍ່ເນື່ອງແລະໜັກແໜ້ນ, ບັນດາກຸ່ມເສດຖະກິດຄວນຍົກລະດັບແລະປະສິດທິພາບການຄຸ້ມຄອງການເງິນໃຫ້ສູງຂຶ້ນ.