ອົງການປາບປາມຢາເສບຕິດແຫ່ງຊາດຟິລິບປິນຢືນຢັນໃນວັນທີ 2 ພຶດສະພານີ້ວ່າ ນັບແຕ່ເດືອນກໍລະກົດປີ 2016 ເປັນຕົ້ນມາ, ການປາບປາມຢາເສບຕິດຂອງລັດຖະບານປະເທດຕົນໄດ້ຮັບຜົນສຳເລັດຢ່າງພົ້ນເດັ່ນ.
ທັງນີ້ ທ່ານອີຊີໂດຣ ລາເປນີ ຫົວໜ້າອົງການປາບປາມຢາເສບຕິດແຫ່ງຊາດຟິລິບປິນ ໄດ້ກ່າວໃນເວທີປຶກສາຫາລືການຕ້ານຢາເສບຕິດ ທີ່ຈັດຂຶ້ນໃນວັນດັ່ງກ່າວວ່າ: ບັນຫາຢາເສບຕິດແມ່ນບັນຫາໜັກໜ່ວງທີ່ມີມາແຕ່ດົນແລ້ວໃນປະເທດຕົນ. ຂະນະທີ່ນັບແຕ່ລັດຖະບານເລີ່ມ ເຄື່ອນໄຫວປາບປາມຢາເສບຕິດເມື່ອເດືອນກໍລະກົດປີ 2016 ເປັນຕົ້ນມາ, ກໍສາມາດເຄື່ອນໄຫວປາບປາມໄດ້ 5 ໝື່ນ 3.000 ກວ່າເທື່ອ, ຈັບໄດ້ 6 ໝື່ນກວ່າຄົນ ແລະ ຍຶດຢາເສບຕິດໄດ້ເປັນຈຳນວນຫຼາຍ ນອກນີ້ຍັງມີຜູ້ເສບຢາເສບຕິດ 1 ລ້ານ 2 ແສນ 7 ໝື່ນຄົນໄດ້ເຂົ້າມອບຕົວຕໍ່ເຈົ້າໜ້າທີ່ຕຳຫຼວດ ແລະທັງໝົດນີ້ໄດ້ເຮັດໃຫ້ "ດັດຊະນີກະທຳຄວາມຜິດ" ໃນສັງຄົມໄດ້ຫຼຸດລົງມາຢູ່ໃນລະດັບ 28,57%.
ຂ່າວລາຍງານອີກວ່າ: ນັບແຕ່ທ່ານໂຣດຣີໂກ ດູເຕີເຕ ຂຶ້ນດຳລົງຕຳແໜ່ງປະທານາທີບໍດີຟິລິບປິນ ເມື່ອທ້າຍເດືອນມິຖຸນາປີ 2016 ເປັນຕົ້ນມາ, ໄດ້ດຳເນີນການເຄື່ອນໄຫວປາບປາມຢາເສບຕິດໃນຂອບເຂດທົ່ວປະເທດ ພ້ອມທັງຕ້ານການກະທຳທີ່ຜິດກົດໝາຍຢ່າງແຂງແຮງ. ແຕ່ແນວໃດກໍດີ ການປາບປາມຢາເສບຕິດດ້ວຍມາດຕະການທີ່ເດັດຂາດຂອງລັດຖະບານຟິລິບປິນ ກໍຖືກບາງສື່ມວນຊົນ ແລະ ນັກການເມືອງບາງຄົນໃນປະເທດຕຳໜິ.