ທ່າເຮືອຊິ່ນໂຈ່ວ ເຂດກວາງຊີ ທາງພາກຕາເວັນຕົກສຽງໃຕ້ຂອງຈີນເຄີຍເປັນທ່າເຮືອການຄ້າກັບພາຍນອກທີ່ສຳຄັນບົນເສັ້ນທາງສາຍໄໝທາງທະເລໃນສະໄໝບູຮານ. ຂະນະທີ່ປັດຈຸບັນ, ທ່າເຮືອດັ່ງກ່າວ ກໍກຳໄດ້ທ່າແຮງດ້ານພູມີພາກທີ່ເປັນເອກະລັກຂອງຕົນ ໂດຍການສ້າງເຂດພັກສິນຄ້າ ແລະ ເຂດນິຄົມອຸດສາຫະກຳຊິ່ນໂຈ່ວຈີນ-ມາເລເຊຍ ທັງເຊື່ອມໂຍງເຂົ້າໃນຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ" ກໍຄືເພີ່ມທະວີການເຊື່ອມຈອດຈີນ-ອາຊຽນ.
ປັດຈຸບັນ, ເຂດພັກສິນຄ້າທ່າເຮືອຊິ່ນໂຈ່ວ ຕົ້ນຕໍໄດ້ກວມເອົາ 42 ທ່າເຮືອຂອງບັນດາປະເທດໃນອາຊຽນ. ຂະນະທີ່ທ່ານຟາງຈ້ຽນລີ້ ຮອງຜູ້ອຳນວຍການໃຫຍ່ກຸ່ມທ່າເຮືອເມືອງຊິ່ນໂຈ່ວ ກ່າວວ່າ: ນັບແຕ່ການມີຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ" ຕະຫຼອດໄລຍະ 3 ປີຜ່ານມາ, ກິດຈະການຕູ້ຄອນເທັນເນີຂອງເຂດພັກສິນຄ້າທ່າຊິ່ນໂຈ່ວ ໄດ້ຮັບການພັດທະນາຢ່າງວ່ອງໄວ ໂດຍປີນີ້ໄດ້ຕັ້ງເປົ້າຈະໃຫ້ບັນລຸເຖິງ 148 ລ້ານໂຕນ ແລະ 2 ລ້ານ 3 ແສນຕູ້ຄອນເທັນເນີຕາມມາດຕະຖານ.
ໃນຖານະເປັນໂຄງການຫຼັກແຫ່ງການຮ່ວມມືການລົງທຶນລະຫວ່າງລັດຖະບານຈີນ-ມາເລເຊຍ, ເຂດນິຄົມອຸດສາຫະກຳຊິ່ນໂຈ່ວ ແລະ ເຂດນິຄົມອຸດສາຫະກຳກວນຕານມາເລເຊຍ-ຈີນ ໄດ້ເປັນແມ່ແບບໃໝ່ແຫ່ງການຮ່ວມມືສາກົນ "ສອງປະເທດສອງເຂດນິຄົມອຸດສາຫະກຳ". ຂະນະທີ່ເຂດນິຄົມອຸດສາຫະກຳຊິ່ນໂຈ່ວຈີນ-ມາເລເຊຍ ບໍ່ພຽງແຕ່ບໍລິການວິສາຫະກິດຂອງສອງປະເທດຈີນແລະມາເລເຊຍເທົ່ານັ້ນ, ແຕ່ຍັງເປັນເວທີແຫ່ງການຮ່ວມມື, ການແລກປ່ຽນ ແລະ ການຄ້າ ລະຫວ່າງຈີນແລະປະເທດອື່ນໆໃນອາຊຽນອີກດ້ວຍ. ມາຮອດເດືອນມີນາປີນີ້, ໂຄງການກໍ່ສ້າງທີ່ສຳຄັນໃນເຂດນິຄົມລວມມີ 89 ໂຄງການ ໂດຍມີຍອດມູນຄ່າການລົງທຶນປະມານ 53 ຕື້ 800 ລ້ານຢວນ, ໃນນີ້ໄດ້ຈັດຕັ້ງປະຕິບັດສຳເລັດແລ້ວ 22 ໂຄງການ.
