ໃນວັນທີ 3 ພຶດສະພານີ້, ທີ່ ວັດຫລິງກວ່າງ ນະຄອນຫລວງປັກກິ່ງ ເຊິ່ງເປັນບອ່ນປະດິດສະຖານ ພະບໍລົມມະສາຣີຣິກະທາດ ພະທັນຕະທາດຂອງພະພຸດທະເຈົ້າ ສະມາຄົມພຸດທະສາສະໜາແຫ່ງປະເທດຈີນໄດ້ຈັດພິທີສະເຫລີມສະຫລອງວັນຄ້າຍວັນປະສູດປີທີ 2641 ຂອງພະສໍາມາສໍາພຸດທະເຈົ້າ ພະບໍຣົມມະສາສະດາຂອງສາສະໜາພຸດ ຕາມຈັນທະຄະຕິຈີນ ເຊິ່ງປີນີ້ກົງກັບວັນທີ 3 ພຶດສະພາ ໂດຍໄດ້ເຊີນຄະນະສົງທັງຝ່າຍເຖຣະວາດ ແລະມະຫາຍານ, ເອກອັກຄະລັດຖະທູດຕ່າງປະເທດ ປະຈຳ ສປ ຈີນເຊັ່ນ: ທ່ານ ນາງວັນດີ ບຸດທະສະວົງ ເອກອັກຄະລັດຖະທູດລາວ ປະຈຳ ສປ ຈີນ ແລະ ບັນດາທູຕະນຸທູດຈາກປະເທດໄທ, ກຳປູເຈ້ຍ, ພະມ້າ, ສີລັງກາ, ເນປານ ລວມທັງຕົວແທນຈາກອົງການຈັດຕັ້ງຕ່າງໆທັງພາຍໃນ ແລະຕ່າງປະເທດ ເຂົ້າຮ່ວມ.
ພິທີເລີ່ມຈາກຂະບວນອັງເຊີນພະພຸດທະຮູບ ພະພຸດທະເຈົ້າປາງປະສູດຢືນເທິງດອກບົວ ຈຳນວນ 3 ອົງ ຂຶ້ນປະດິດສະຖານເທິງແທ່ນທີ່ຢູ່ກາງອ່າງນ້ຳໂລຫະຂະໜາດໃຫ່ຍທີ່ປະດັບປະດາດ້ວຍດອກໄມ້ມຸງຄຸນຫລາຍຊະນິດຢ່າງສວຍງາມ, ຈາກນັ້ນ ໄດ້ນິມົນຄະນະສົງທິເບດ ພ້ອມດ້ວຍຄະນະສົງເຖຣະວາດ ແລະ ມະຫາຍານສວດມົນຖວາຍພຸດທະບູຊາ ແລະສົງນ້ຳພະ, ຫລັງຈາກຄະນະສົງໄດ້ສົງນ້ຳພະແລ້ວ ໄດ້ເຊີນຜູ້ເຂົ້າຮ່ວມພິທີສົງນ້ຳພະ, ສັງເກດເຫັນວ່າມີພຸດທະສາສະນິກະຊົນທັງຊາວຈີນ ແລະຕ່າງປະເທດ ປະມານ ໜຶ່ງພັນຄົນ ພາກັນຫລັ່ງໄຫລໄປວັດຫລິງກວ່າງຢ່າງຫລວງຫລາຍເພື່ອຮ່ວມພິທີດັ່ງກ່າວ.
