ຕາມຂ່າວສານຈີນ: ກອງປະຊຸມສຸດຍອດອຸດສາຫະກຳການຄ້າຂອງກຸ່ມ 20 ປະເທດ ຫຼື G20 ໄດ້ໄຂຂຶ້ນຢູ່ນະຄອນຫຼວງແບກແລງປະເທດເຢຍລະມັນໃນວັນທີ 2 ພຶດສະພານີ້ຕາມເວລາທ້ອງຖິ່ນ. ເຈົ້າໜ້າທີ່ໃນວົງການການເມືອງແລະການຄ້າຂອງບັນດາປະເທດທີ່ຮ່ວມປະຊຸມ ໄດ້ປຶກສາຫາລືສິ່ງທ້າທາຍຈາກໂລກາພິວັດ, ຈະຮັບມືກັບຄວາມສ່ຽງດ້ານການທະນາຄານແນວໃດ ແລະການທົດສອບຈາກການປະຕິວັດດີຈີຕອນແລະອື່ນໆຕໍ່ຄວາມໝັ້ນທ່ຽງຂອງເສດຖະກິດໂລກ.
ທ່ານ ວົຟກັງ ຊາວເບຼີ ລັດຖະມົນຕີກະຊວງການເງິນເຢຍລະມັນ ໄດ້ເນັ້ນຫຼັກໝັ້ນທີ່ຄັດຄ້ານລັດທິປົກປ້ອງແລະປ້ອງກັນການຄ້າເສລີອີກເທື່ອໜຶ່ງໃນໂອກາດກ່າວປາໄສຕໍ່ພິທີໄຂກອງປະຊຸມວ່າ, ທຸກປະເທດບໍ່ຄວນຝືນກັບໂລກາພິວັດ, ແຕ່ຄວນເຮັດໃຫ້ຂະບວນການໂລກາພິວັດດີຂຶ້ນກວ່າເກົ່າ.
ນັບແຕ່ວິກິດການການເງິນທົ່ວໂລກເທື່ອຜ່ານມາຈົນຮອດປັດຈຸບັນ, ການນຳແລະວົງການການທະນາຄານຂອງບັນດາປະເທດ ໄດ້ພິຈາລະນາເຖິງກົນໄກການກຳເນີດແລະມາດຕະການປ້ອງກັນວິກິດການການເງິນ ແລະຈາກນີ້, ຈະເຮັດແນວໃດເພື່ອຮັບມືກັບວິກິດການເທື່ອໜ້ານັ້ນ ກໍໄດ້ກາຍເປັນຈຸດສຸມຂອງກອງປະຊຸມສຸດຍອດໃນມື້ດັ່ງກ່າວ.