ທ່ານວະລາດີເມຍ ປູຕິນ ປະທານາທິບໍດີຣັດເຊຍ ກ່າວຫວ່າງບໍ່ດົນມານີ້ວ່າ: ກອງປະຊຸມສຸດຍອດກຸ່ມ 20 ປະເທດ ຫຼື G20 ທີ່ຈະຈັດຂຶ້ນຢູ່ເຢຍລະມັນໃນເດືອນກໍລະກົດປີນີ້ ຈະປຶກສາຫາລືຫົວຂໍ້ຕ່າງໆ ເປັນຕົ້ນການກຳຈັດສິ່ງກີດຂວາງການພັດທະນາເສດຖະກິດໂລກ.
ທັງນີ້ ທ່ານປູຕິນ ໄດ້ພົບປະກັບທ່ານນາງເອນເຈີລາ ເມີແຄວ ນາຍົກລັດຖະມົນຕີເຢຍລະມັນ ຢູ່ເມືອງໂຊຊີ ທາງພາກຕາເວັນຕົກສຽງໃຕ້ຣັດເຊຍ ໃນໂອກາດເດີນທາງຢ້ຽມຢາມຣັດເຊຍ ແລະໄດ້ຢືນຢັນໃນພິທີຖະແຫຼງຂ່າວຫຼັງການພົບປະວ່າ: ປັດຈຸບັນ, ເສດຖະກິດໂລກຍັງຄົງປະເຊີນກັບບັນຫາຕ່າງໆ, ຂະນະທີ່ຜູ້ນຳ G20 ຈະປຶກສາຫາລືຫົວຂໍ້ຕ່າງໆ ໃນໄລຍະກອງປະຊຸມສຸດຍອດ ເປັນຕົ້ນກຳຈັດສິ່ງກີດຂວາງການພັດທະນາເສດຖະກິດໂລກ ເພື່ອຫາວິທີຮັບມືກັບບັນຫາເຫຼົ່ານີ້.
ທ່ານປູຕິນ ຍັງໄດ້ຢືນຢັນສະພາບການພັດທະນາການຄ້າລະຫວ່າງຣັດເຊຍ-ເຢຍລະມັນວ່າ: ການຄ້າລະຫວ່າງສອງຝ່າຍໄດ້ເລີ່ມຟື້ນຕົວຂຶ້ນໃນຕົ້ນປີນີ້ ເຊິ່ງຈະເຮັດໃຫ້ການພົວພັນດ້ານເສດຖະກິດການຄ້າລະຫວ່າງສອງປະເທດມີອະນາຄົດອັນສົດໃສ.
