ວັນທີ 3 ພຶດສະພານີ້, ທ່ານ ສີຈິ້ນຜິງ ປະທານປະເທດຈີນໄດ້ລົມໂທລະສັບກັບທ່ານ ໂຣດຣີໂກ ດູເຕີເຕ ປະທານາທິບໍດີຟີລິບປິນ.
ທ່ານ ສີຈິ້ນຜິງ ກ່າວເນັ້ນວ່າ: ຈີນສະແດງຄວາມຊົມເຊີຍຟີລິບປິນທີ່ໄດ້ເສີມຂະຫຍາຍບົດບາດສຳຄັນໃນການຊຸກຍູ້ການຮ່ວມມືອາຊີໃຫ້ພັດທະນາໄປຕາມທິດທີ່ຖືກຕ້ອງໃນຖານະເປັນປະເທດປະທານໝູນວຽນຂອງອາຊຽນ. ຟີລິບປິນເປັນປະເທດໃກ້ຄຽງທີ່ມີໄມຕີຈິດມິດຕະພາບກັບຈີນ ແລະກໍເປັນຄູ່ຮ່ວມມືທີ່ສຳຄັນໃນການສ້າງ "ໜຶ່ງແລວທາງໜຶ່ງເສັ້ນທາງ". ຂ້າພະເຈົ້າສະແດງຄວາມຍິນດີຕ້ອນຮັບທ່ານປະທານາທິບໍດີທີ່ຈະເຂົ້າຮ່ວມກອງປະຊຸມສຸດຍອດການຮ່ວມມືສາກົນ "ໜຶ່ງແລວທາງໜຶ່ງເສັ້ນທາງ" ຢູ່ຈີນ, ພ້ອມທັງຈະໄດ້ພົບປະກັບທ່ານອີກຄັ້ງໃໝ່.
ທ່ານ ດູເຕີແຕ ກ່າວວ່າ: ຟີລິບປິນຍິນດີຮ່ວມກັບຈີນສຸມທຸກຄວາມພະຍາຍາມ ເພື່ອປົກປັກຮັກສາແລະເສີມຂະຫຍາຍສາຍພົວພັນລະຫວ່າງສອງປະເທດໃຫ້ດີຂຶ້ນພ້ອມທັງກ້າວໄປສູ່ການພັດທະນາ. ໃນຖານະເປັນປະເທດປະທານໝູນວຽນຂອງອາຊຽນ,ຟີລິບປິນຍິນດີຊຸກຍູ້ສາຍພົວພັນລະຫວ່າງອາຊຽນ-ຈີນໃຫ້ໄດ້ຮັບການພັດທະນາດີກວ່າເກົ່າ, ຮັດແໜ້ນການຕິດຕໍ່ພົວພັນແລະການຮ່ວມມືລະຫວ່າງສອງຝ່າຍໃນວຽກງານສາກົນແລະພາກພື້ນ.ຂ້າພະເຈົ້າພ້ອມສະເໝີໃນການເດີນທາງເຂົ້າຮ່ວມກອງປະຊຸມສຸດຍອດການຮ່ວມມືສາກົນ "ໜຶ່ງແລວທາງໜຶ່ງເສັ້ນທາງ"ຢູ່ຈີນ.
ນອກນີ້,ປະມຸກລັດຂອງສອງປະເທດຍັງໄດ້ແລກປ່ຽນຄວາມຄິດຄວາມເຫັນກ່ຽວກັບສະຖານະການແຫຼມເກົາຫຼີໃນປັດຈຸບັນຕື່ມອີກ.
 |
