ຕາມຂ່າວ CRI: ໃນວັນທີ 4 ພຶດສະພານີ້, ທ່ານເຣັກສ໌ ທິເລີຊັນ ລັດຖະມົນຕີກະຊວງການຕ່າງປະເທດອາເມລິກາຈະພົບປະກັບລັດຖະມົນຕີການຕ່າງປະເທດອາຊຽນຢ່າງບໍ່ເປັນທາງການຢູ່ນະຄອນຫຼວງວໍຊິງຕັນຂອງອາເມລິກາ, ເຊິ່ງຄາດວ່າຈະເວົ້າເຖິງບັນຫາທະເລຈີນໃຕ້ມາຫາລື.
ຕໍ່ເຫດການດັ່ງກ່າວ, ທ່ານເກິງສວນ ໂຄສົກກະຊວງການຕ່າງປະເທດຈີນໄດ້ຕອບຄຳຖາມນັກຂ່າວໃນໂອກາດຖະແຫຼງຂ່າວຢູ່ປັກກິ່ງໃນວັນທີ 3 ພຶດສະພານີ້ວ່າ, ບັນຫາທະເລຈີນໃຕ້ແມ່ນບັນຫາລະຫວ່າງຈີນກັບບາງປະເທດໃນອາຊຽນເທົ່ານັ້ນ, ຫາກບໍ່ແມ່ນບັນຫາລະຫວ່າງຈີນກັບອາຊຽນ, ແລະກໍບໍ່ແມ່ນບັນຫາລະຫວ່າງຈີນກັບອາເມລິກາ, ທັງບໍ່ແມ່ນບັນຫາລະຫວ່າງອາເມລິກາກັບອາຊຽນອີກດ້ວຍ. ແນວໃດກໍດີຈາກຄວາມພະຍາຍາມຮ່ວມລະຫວ່າງຈີນແລະອາຊຽນຫວ່າງມໍ່ໆມານີ້, ສະຖານະການທະເລຈີນໃຕ້ໄດ້ດີຂຶ້ນຢ່າງຕໍ່ເນື່ອງແລະກໍເປັນສະຖານະການທີ່ຕ້ອງໄດ້ຮັກສາແລະຮ່ວມກັນຖະໜຸຖະໜອມຈາກຝ່າຍຕ່າງໆ. ຂະນະດຽວກັນຈີນກໍຫວັງວ່າປະເທດຢູ່ນອກພາກພື້ນຄວນເຄົາລົບຄວາມພະຍາຍາມຮ່ວມກັນຮັກສາສັນຕິພາບແລະສະຖຽນລະພາບໃນທະເລຈີນໃຕ້ຂອງພາກພື້ນນີ້.