ຕາມຂ່າວສານຈີນ: ພະແນກກວດຄົນເຂົ້າເມືອງ, ກວດກາ ແລະກັກກັນພະຍາດເຂດກວາງຊີ ສປ ຈີນໃຫ້ຮູ້ໃນວັນທີ 4 ພຶດສະພານີ້ວ່າ, ປີ 2016 ຜ່ານມາ, ໄມ້ທ່ອນ 9 ແສນ 2 ໝື່ນ 7 ພັນແມັດກ້ອນທີ່ມີມູນຄ່າ 109 ລ້ານໂດລາໄດ້ນຳເຂົ້າປະເທດຈີນຜ່ານດ່ານກວາງຊີ ແລະຈາກນີ້ ຈຶ່ງເຮັດໃຫ້ດ່ານກວາງຊີກາຍເປັນດ່ານສຳຄັນແຫ່ງໜຶ່ງທີ່ນຳເຂົ້າໄມ້ທ່ອນຢູ່ພາກຕາເວັນຕົກສຽງໃຕ້ຂອງຈີນ. ຂະນະດຽວກັນ, ບາງປະເທດໃນອາຊຽນ ຄືຫວຽດນາມແລະມຽນມາ ໄດ້ກາຍເປັນປະເທດທີ່ສົ່ງອອກໄມ້ທ່ອນສູ່ເຂດກວາງຊີ ເຊິ່ງເປັນການຕອບສະໜອງໃນການສົ່ງເສີມທຸລະກິດໄມ້ຂອງຈີນ.
ເພື່ອສ້າງເວທີການຮ່ວມມືເສດຖະກິດປ່າໄມ້ຈີນ-ອາຊຽນ, ກອງເລຂາຂອງງານວາງສະແດງສິນຄ້າຈີນ-ອາຊຽນ ໄດ້ຈັດງານວາງສະແດງປ່າໄມ້ສະເພາະ ເຖິງ 7 ເທື່ອຢູ່ເມືອງນານນິງນັບແຕ່ປີ 2010 ເປັນຕົ້ນມາ, ເຊິ່ງແມ່ນງານວາງສະແດງທີ່ວິສາຫະກິດຂອງປະເທດໃນອາຊຽນເຂົ້າຮ່ວມຫຼາຍທີ່ສຸດ ແລະໄດ້ກາຍເປັນເວທີອັນສຳຄັນໃນການແລກປ່ຽນແລະຮ່ວມມືໃນຂະແໜງການປ່າໄມ້ລະຫວ່າງຈີນແລະອາຊຽນ.