ສະພາຄວາມໝັ້ນຄົງອົງການສະຫະປະຊາຊາດ ໄດ້ອອກຖະແຫຼງການໃນວັນທີ 4 ພຶດສະພານີ້ ໂດຍກ່າວປະນາມຢ່າງຮຸນແຮງຕໍ່ເຫດການຫຼອນໂຈມຕີຄ້າຍທະຫານຮັກສາຄວາມໝັ້ນຄົງລວມຂອງອົງການສະຫະປະຊາຊາດປະຈຳມາລີທີ່ເກີດຂຶ້ນໃນວັນທີ 3 ເດືອນດຽວກັນ ໂດຍເຫດການດັ່ງກ່າວເຮັດໃຫ້ເຈົ້າໜ້າທີ່ຮັກສາສັນຕິພາບໜຶ່ງຄົນເສຍຊີວິດ ແລະ ຫຼາຍຄົນໄດ້ຮັບບາດເຈັບ.
ຖະແຫຼງການລະບຸວ່າ: ສະພາຄວາມໝັ້ນຄົງຮຽກຮ້ອງໃຫ້ລັດຖະບານມາລີຈົ່ງສືບສວນ-ສອບສວນເຫດການນີ້ໂດຍໄວ ແລະ ລົງໂທດຜູ້ກໍ່ເຫດຕາມກົດໝາຍ. ສະພາຄວາມໝັ້ນຄົງເນັ້ນວ່າ: ອີງຕາມກົດໝາຍສາກົນ, ການໂຈມຕີເຈົ້າໜ້າທີ່ຮັກສາສັນຕິພາບຖືເປັນອາຊະຍາກອນສົງຄາມ. ຂະນະດຽວກັນ, ສະພາຄວາມໝັ້ນຄົງໄດ້ກ່າວຢ້ຳວ່າ: ລັດທິກໍ່ການຮ້າຍທຸກຮູບແບບລ້ວນແຕ່ເປັນໜຶ່ງໃນໄພຂົ່ມຂູ່ທີ່ໜັກໜ່ວງທີ່ສຸດຕໍ່ສັນຕິພາບແລະສະຖຽນລະພາບຂອງໂລກ ເຊິ່ງປະເທດຕ່າງໆຈະຕ້ອງປາບປາມລັດທິກໍ່ການຮ້າຍຢ່າງເດັດດ່ຽວເພື່ອກຳຈັດໄພຂົ່ມຂູ່ຕໍ່ສັນຕິພາບແລະສະຖຽນລະພາບສາກົນ ຕາມພາລະໜ້າທີ່ທີ່ລະບຸໄວ້ໃນກົດບັດສະຫະປະຊາຊາດ ແລະ ກົດໝາຍສາກົນອື່ນໆ.
