ຕາມຂ່າວສານຊິນຮວາ: ກອງປະຊຸມຫາລືການຮ່ວມມືຄວາມໝັ້ນຄົງ "ໜຶ່ງແລວທາງໜຶ່ງເສັ້ນທາງ" ລະຫວ່າງກະຊວງຄວາມໝັ້ນຄົງຈີນ ແລະ ພາກສ່ວນປ້ອງກັນຄວາມໝັ້ນຄົງຂອງ 20 ກວ່າປະເທດ ໄດ້ຈັດຂຶ້ນຢູ່ນະຄອນຫຼວງປັກກິ່ງໃນວັນທີ 4 ພຶດສະພານີ້, ຂະນະທີ່ທ່ານ ເມີ້ງຈ້ຽນຈູ້ ກຳມະການກົມການເມືອງສູນກາງພັກ, ເລຂາທິການຄະນະການເມືອງແລະກົດໝາຍສູນກາງພັກກອມມູນິດຈີນ ໄດ້ພົບປະກັບຫົວໜ້າຄະນະຜູ້ແທນບັນດາປະເທດທີ່ເຂົ້າຮ່ວມປະຊຸມ.
ໂອກາດດັ່ງກ່າວ, ທ່ານ ເມີ້ງຈ້ຽນຈູ້ ກ່າວວ່າ, ເວທີປຶກສາຫາລືສຸດຍອດການຮ່ວມມືສາກົນ "ໜຶ່ງແລວທາງໜຶ່ງເສັ້ນທາງ" ທີ່ຈະຈັດຂຶ້ນຢູ່ປັກກິ່ງນັ້ນ ມີຄວາມໝາຍສຳຄັນຕໍ່ການຊຸກຍູ້ການຮ່ວມມືລະຫວ່າງປະເທດລຽບຕາມເສັ້ນທາງ ເຊິ່ງຈີນກກໍຫວັງຮ່ວມກັບຝ່າຍຕ່າງໆເພື່ອປຶກສາຫາລືແລະສ້າງ "ໜຶ່ງແລວທາງໜຶ່ງເສັ້ນທາງ" ຮ່ວມກັນ, ສ້າງປະຊາຄົມຮ່ວມຊະຕາກຳຂອງປະເທດທີ່ລຽບຕາມເສັ້ນທາງ ເພື່ອສ້າງຄວາມສຸກໃຫ້ແກ່ບັນດາປະເທດແລະປະຊາຊົນບັນດາປະເທດໃຫ້ດີກວ່າເກົ່າ. ແນວໃດກໍດີ, ການປ້ອງກັນຄວາມໝັ້ນຄົງຂອງ "ໜຶ່ງແລວທາງໜຶ່ງເສັ້ນທາງ" ແມ່ນໜ້າທີ່ຮ່ວມຂອງປະເທດຕ່າງໆ ເຊິ່ງຫວັງວ່າ ຝ່າຍຕ່າງໆຈົ່ງໃຊ້ມາດຕະການທີ່ເປັນຮູບປະທຳ ແລະລົງເລິກການຮ່ວມມືປະຕິບັດກົດໝາຍແລະປ້ອງກັນຄວາມໝັ້ນຄົງ.
ຝ່າຍຕ່າງໆທີ່ຮ່ວມກອງປະຊຸມກໍໄດ້ກ່າວຍິນດີເພີ່ມທະວີການຮ່ວມມືດ້ານຄວາມໝັ້ນຄົງກັບຈີນ ເພື່ອຮ່ວມແຮງຮ່ວມໃຈກັນປ້ອງກັນຄວາມໝັ້ນຄົງໃຫ້ແກ່ການສ້າງ "ໜຶ່ງແລວທາງໜຶ່ງເສັ້ນທາງ".