ຕາມຂ່າວສານຈີນ: ກະຊວງການຄ້າໄທໄດ້ເປີດເຜີຍຂໍ້ມູນຫຼ້າສຸດວ່າ, ໃນເດືອນເມສາຜ່ານມາ, ອັດຕາເງິນເຟີ້ຂອງປະເທດຕົນໄດ້ສູງຂຶ້ນ 0,38% ເມື່ອທຽບໃສ່ເດືອນດຽວກັນຂອງປີຜ່ານມາ ແລະເປັນເດືອນທີ 13 ທີ່ສູງຂຶ້ນຕິດຕໍ່ກັນ ແລະລະດັບການສູງຂຶ້ນນັ້ນໄດ້ຄ່ອຍໆຊ້າລົງ.
ຂໍ້ມູນສະແດງໃຫ້ເຫັນວ່າ, ເດືອນມັງກອນປີນີ້, ອັດຕາເງິນເຟີ້ ໄດ້ສູງຂຶ້ນ 1,55% ເມື່ອທຽບໃສ່ໄລຍະດຽວກັນປີຜ່ານມາ ແລະຫຼັງຈາກນັ້ນ, ລະດັບການເພີ່ມສູງຂຶ້ນນັ້ນ ກໍຄ່ອຍໆຊ້າລົງ. ໂດຍລວມແລ້ວ, ໃນ 4 ເດືອນທຳອິດຂອງປີນີ້, ອັດຕາເງິນເຟີ້ໄດ້ສູງຂຶ້ນ 1,03%.
ກະຊວງການຄ້າໄທຄາດວ່າ, ອັດຕາເງິນເຟີ້ໃນປີນີ້ ຈະຢູ່ລະຫວ່າງ 1,5-2,2%. ຍ້ອນວ່າລາຄາຜະລິດຕະພັນກະສິກຳແພງຂຶ້ນ ຈຶ່ງກະຕຸກໃຫ້ລາຍໄດ້ຂອງກະສິກອນເພີ່ມຂຶ້ນ, ບວກໃສ່ການສົ່ງອອກກໍກະເຕື້ອງດີຂຶ້ນ ເຮັດໃຫ້ປະຊາຊົນມີລາຍໄດ້ເພີ່ມຂຶ້ນ ເຊິ່ງເປັນຜົນດີຕໍ່ການພັດທະນາການບໍລິໂພກ. ແນວໃດກໍດີ, ອົງການວິເຄາະຫຼາຍແຫ່ງຄາດຄະເນກ່ອນໜ້ານີ້ວ່າ, ອັດຕາການເຕີບໂຕຂອງເສດຖະກິດໄທໃນປີນີ້ຈະຢູ່ລະຫວ່າງ 3-4%.