ວັນທີ 6 ພຶດສະພານີ້, ກອງປະຊຸມສົນທະນາລະຫວ່າງລັດຖະມົນຕີ ກະຊວງການເງິນຈີນ-ຍີ່ປຸ່ນຄັ້ງທີ 6 ໄດ້ຈັດຂຶ້ນຢູ່ ໂຢໂຄຮາມາ ຍີ່ປຸ່ນ. ທ່ານທາໂລ ອາໂສ ຮອງນາຍົກລັດຖະມົນຕີທັງເປັນລັດຖະມົນຕີກະຊວງການເງິນຍີ່ປຸ່ນແລະທ່ານຊີ່ວເຈຍ ລັດຖະມົນຕີກະຊວງການເງິນຈີນຮ່ວມກັນເປັນປະທານຈັດກອງປະຊຸມ, ຂະນະທີ່ເຈົ້າໜ້າທີ່ຊັ້ນສູງຂອງກະຊວງການເງິນແລະທະນາຄານກາງສອງປະເທດເຂົ້າຮ່ວມ.
ລັດຖະມົນຕີວ່າການກະຊວງການເງິນສອງປະເທດມີຄວາມເຫັນເປັນເອກະສັນກັນວ່າ, ການສົນທະນາລະຫວ່າງລັດຖະມົນຕີກະຊວງການເງິນຈີນ-ຍີ່ປຸ່ນມີຄວາມໝາຍອັນສຳຄັນຕໍ່ສອງຝ່າຍ, ມີຜົນດີຕໍ່ສອງປະເທດໃນການລົງເລິກການທຳຄວາມເຂົ້າໃຈກັນໃນດ້ານສະພາບແລະນະໂຍບາຍເສດຖະກິດມະຫາພາກ, ເພີ່ມທະວີການຮ່ວມມືທາງການເງິນແລະການທະນາຄານ. ສອງຝ່າຍເປັນເອກະສັນກັນວ່າ, ມີຄວາມຈຳເປັນທີ່ຕັ້ງໜ້າຊຸກຍູ້ການປະຕິຮູບທີ່ມີລັກສະນະອົງປະກອບຂອງສອງປະເທດໂດຍຜ່ານການແລກປ່ຽນນະໂບບາຍເສດຖະກິດມະຫາພາກກ່ຽຍຂ້ອງ. ສອງຝ່າຍໃຫ້ຄຳໝັ້ນສັນຍາວ່າລົງເລິກການທຳຄວາມເຂົ້າໃຈແລະປະສານງານໃນດ້ານນະໂຍບາຍເສດຖະກິດມະຫາພາກ, ຮັກສາການເປິກສາຫາລືກ່ຽວກັບບັນຫາເສດຖະກິດແລະການທະນາຄານສາກົນທີ່ໃຫຍ່ຫຼວງ.
ສອງຝ່າຍໄດ້ສະແດງຄວາມຊົມເຊີຍຕໍ່ກອງປະຊຸມລັດຖະມົນຕີວ່າການກະຊວງການເງິນແລະຜູ່ວ່າການທະນາຄານກາງຂອງອາຊຽນກັບຈີນຍີ່ປຸ່ນສ.ເກົາຫຼີ (10+3)ແລະກອງປະຊຸມລັດຖະມົນຕີກະຊວງການເງິນແລະຜູ່ວ່າການທະນາຄານກາງຈີນຍີ່ປຸ່ນສ.ເກົາຫຼີທີ່ຈັດຂຶ້ນໃນວັນທີ 5 ພຶດສະພານີ້ຢ່າງປະສົບຜົນສໍາເລັດ , ແລະເຫັນດີຈະເພີ່ມທະວີການຮ່ວມມືຢ່ງແໜ້ນແຟ້ນໃນຂ້າງໜ້າ. ນອກຈາກນີ້ແລ້ວ, ລັດຖະມົນຕີກະຊວງການເງິນສອງປະເທດຍັງເຫັນດີຈະຈັດກອງປະຊຸມການສົນທະນາລະຫວ່າງລັດຖະມົນຕີກະຊວງການເງິນຈີນຍີ່ປຸ່ນຄັ້ງທີ 7 ຢູ່ຈີນໃນປີໜ້າ.
