ວັນທີ 6 ພຶດສະພານີ້, ຢູ່ເຂດດຽວກັນຂອງນະຄອນຫຼວງມະນີລາປະເທດຟີລິບປິນໄດ້ເກີດເຫດລະເບີດສອງເທື່ອ ສົ່ງຜົນເຮັດໃຫ້ປະຊາຊົນຢ່າງໜ້ອຍ 2 ຄົນເສຍຊີວິດ, 5 ຄົນບາດເຈັບ, ໃນນັ້ນຜູ້ບາດເຈັບຜູ້ໜຶ່ງແມ່ນຕຳຫຼວດທ້ອງຖິ່ນ.
ເຈົ້າໜ້າທີ່ຕຳຫຼວດນະຄອນຫຼວງມະນີລາກ່າວວ່າ: ໃນເວລາປະມານ 17 ໂມງ 50 ນາທີຂອງມື້ດຽວກັນ, ຢູ່ບ່ອນໃກ້ກັບຖະໜົນສາຍໜຶ່ງຢູ່ເມືອງຄຸຍອາໂປນະຄອນຫຼວງມະນີລາໄດ້ເກີດການລະເບີດ ສົ່ງຜົນເຮັດໃຫ້ປະຊາຊົນ 2 ຄົນເສຍຊີວິດ, 4 ຄົນບາດເຈັບ. ຈຸດເກີດເຫດດັ່ງກ່າວຢູ່ໃກ້ກັບໂບດຄຸຍອາໂປທີ່ເປັນໂບດໃຫຍ່ທີ່ສຸດຂອງມະນີລາ, ແຕ່ບໍ່ຮູ້ລະອຽດຂອງລູກລະເບີດ. ຫຼັງຈາກເກີດເຫດ 3 ຊົ່ວໂມງ ຢູ່ສະຖານທີ່ໃກ້ກັບຈຸດເກີດເຫດດັ່ງກ່າວໄດ້ເກີດການລະເບີດອີກຄັ້ງໜຶ່ງ ສົ່ງຜົນເຮັດໃຫ້ຕຳຫຼວດຢູ່ກັບທີ່ຜູ້ໜຶ່ງບາດເຈັບ.
ເມືອງຄຸຍອາໂປແມ່ນເຂດເກົ່າແຫ່ງໜຶ່ງຂອງນະຄອນຫຼວງມະນີລາ ເຊິ່ງເປັນເຂດຊຸມຊົນຜູ້ທຸກຍາກ. ວັນທີ 28 ເມສາຜ່ານມາ, ຢູ່ເຂດດັ່ງກ່າວເຄີຍໄດ້ເກີດເຫດການລະເບີດເທື່ອໜຶ່ງ ສົ່ງຜົນເຮັດໃຫ້ປະຊາຊົນຢ່າງໜ້ອຍ 14 ຄົນບາດເຈັບ.