ຕາມຂ່າວສານຈີນ:ກະຊວງທ່ອງທ່ຽວລາຊະອານາຈັກກຳປູເຈຍເປີດເຜີຍບົດລາຍງານໃນວັນທີ 5 ພຶດສະພານີ້ວ່າ,ໃນໄຕມາດທຳອິດປີ 2017 ນີ້, ປະເທດຕົນໄດ້ຕ້ອນຮັບນັກທ່ອງທ່ຽວສາກົນ 1 ລ້ານ 5 ແສນເທື່ອຄົນເຊິ່ງເພີ່ມຂຶ້ນຫຼາຍກວ່າໄລຍະດຽວກັນຂອງປີຜ່ານມາ 12% ແລະຈີນຍັງຄົງເປັນປະເທດແຫຼ່ງນັກທ່ອງທ່ຽວທີ່ໃຫຍ່ກວ່າໝູ່ເໝືອນເດີມ.
ບົດລາຍງານລະບຸວ່າ,ນັບແຕ່ເດືອນມັງກອນຫາເດືອນກຸມພາປີນີ້,ກຳປູເຈຍໄດ້ຕ້ອນຮັບນັກທ່ອງທ່ຽວຈີນຫຼາຍກວ່າ 1 ແສນ 7 ໝື່ນເທື່ອຄົນເພີ່ມຂຶ້ນຫຼາຍກວ່າໄລຍະດຽວກັນຂອງປີຜ່ານມາ 16,7%; ຫວຽດນາມຫຼາຍກວ່າ 1 ແສນ 4 ໝື່ນເທື່ອຄົນແລະສ.ເກົາຫຼີ 1 ແສນເທື່ອຄົນ.
ກະຊວງທ່ອງທ່ຽວປະເທດດັ່ງກ່າວເປີດເຜີຍຕື່ມວ່າ,ນັກທ່ອງທ່ຽວທີ່ເພີ່ມຫຼາຍຂຶ້ນເປັນຜົນມາຈາກມີເສັ້ນທາງການບິນຫຼາຍກວ່າເກົ່າແລະການປະດິດຜະລິດຕະພັນການທ່ອງທ່ຽວກໍໄດ້ຫຼາຍຂຶ້ນແລະຄາດວ່າປີນີ້ຈະຕ້ອນຮັບນັກທ່ອງທ່ຽວສາກົນໄດ້ເຖິງ 5 ລ້ານ 4 ແສນເທື່ອຄົນແລະປີ 2020 ຈະເພີ່ມຂຶ້ນເປັນ 7 ລ້ານເທື່ອຄົນແລະຖ້າເປັນໄປຕາມເປົ້າກໍຈະສ້າງລາຍຮັບເປັນເງິນຕາຕ່າງປະເທດໄດ້ເຖິງ 5 ຕື້ໂດລາສະຫະລັດ.
ແນວໃດກໍດີ,ເປົ້າໝາຍດຶງດູດນັກທ່ອງທ່ຽວຈີນແຕ່ປີ 2016 ຫາ 2020 ແລະປຶ້ມປົກຂາວ ChinaReady ທີ່ກຳປູເຈຍເປີດເຜີຍນັ້ນໄດ້ລະບຸໄວ້ວ່າ,ປີ 2020 ຈະດຶງດູດນັກທ່ອງທ່ຽວຈີນໃຫ້ໄດ້ 2 ລ້ານຄົນ.