ຕາມຂ່າວສານຈີນ: ລັດຖະບານອິນໂດເນເຊຍປະກາດສະຫຼາຍແນວໂຮມປົດປ່ອຍອິດສລາມຫຼື HTI ຢ່າງເປັນທາງການນັບແຕ່ວັນທີ 8 ພຶດສະພານີ້ເປັນຕົ້ນໄປ,ຫຼັງເຫັນການເຄື່ອນໄຫວຂອງອົງການດັ່ງກ່າວເປັນໄພຂົ່ມຂູ່ຕໍ່ຄວາມໝັ້ນຄົງແລະສະຖຽນລະພາບຂອງປະເທດ.
ທ່ານວິຣັນໂຕ ລັດຖະມົນຕີກະຊວງກົດໝາຍແລະຄວາມໝັ້ນຄົງອິນໂດເນເຊຍກ່າວວ່າ,ການເຄື່ອນໄຫວຂອງ HTI ໄດ້ພາໃຫ້ສັງຄົມເກີດການປະທະກັນມາໂດຍຕະຫຼອດແລະເປັນໄພຂົ່ມຂູ່ຕໍ່ຄວາມໝັ້ນຄົງແລະສະຖຽນລະພາບຂອງປະເທດຈຶ່ງມີຄວາມຈຳເປັນຕ້ອງໄດ້ສະຫຼາຍອົງການດັ່ງກ່າວ.
ກ່ອນໜ້ານີ້,ເຈົ້າໜ້າທີ່ຕຳຫຼວດອິນໂດເນເຊຍໄດ້ປະຕິເສດບໍ່ອະນຸຍາດໃຫ້ຈັດກິດຈະກຳຕ່າງໆທີ່ HTI ຂໍຮ້ອງເນື່ອງຈາກກິດຈະກຳເຫຼົ່ານີ້ໄດ້ເນັ້ນເພື່ອບັນລຸການສ້າງຕັ້ງລັດຖະບານຕາມຄຳພີສາສະໜາອິດສລາມ.