ທ່ານອາບັສ ປະທານາທິບໍດີປາແລັສຕິນກ່າວຢືນຢັນໃນວັນທີ 9 ພຶດສະພານີ້ວ່າ: ຈາກການໄກ່ເກ່ຍຂອງອາເມລິກາ, ຕົນພ້ອມຈະຮ່ວມກັບທ່ານເບັນຈາມິນ ເນຕັນຢາຮູ ນາຍົກລັດຖະມົນຕີອິສຣາແອນດຳເນີນການເຈລະຈາສັນຕິພາບ.
ທ່ານອາບັສໃຫ້ທັດສະນະດັ່ງກ່າວໃນໂອກາດຖະແຫຼງຂ່າວຮ່ວມຕໍ່ສື່ມວນຊົນຢູ່ທຳນຽບປະທານາທິບໍດີຫຼັງພົບປະກັບທ່ານແຟຣງ ວອນເຕີ ສະຕຽນເມເອີ ປະທານາທິບໍດີເຢຍລະມັນໃນໂອກາດເດີນທາງຢ້ຽມຢາມປະເທດຕົນ ວ່າ, ໂອກາດ ພົບປະກັບທ່ານໂດນັນ ທຣຳ ປະທານາທິບໍດີອາເມລິກາຢູ່ນະຄອນຫຼວງວໍຊິງຕັນປະເທດດັ່ງກ່າວ, ຕົນກໍໄດ້ຢືນຢັນຈຸດຢືນທີ່ສະເໝີຕົ້ນສະເໝີປາຍຄືໃນການເຈລະຈາສັນຕິພາບລະຫວ່າງປາແລັສຕິນ-ອິສຣາແອນທີ່ລິເລີ່ມໂດຍອາເມລິການັ້ນກໍພ້ອມແລ້ວທີ່ຈະພົບປະແລະຮ່ວມມືກັບທ່ານເນຕັນຢາຮູ.
ທ່ານສະຕຽນເມເອີ ກ່າວວ່າ: ແຜນການສ້າງເປັນສອງປະເທດເປັນທາງເລືອກພຽງໜຶ່ງດຽວ ແລະຫວັງວ່າບັນດາຝ່າຍທີ່ກ່ຽວຂ້ອງຈະພະຍາຍາມຮ່ວມກັນເພື່ອສົ່ງເສີມໃຫ້ບັນລຸແຜນການດັ່ງກ່າວ. ແນວໃດກໍດີ, ຕົນດີໃຈ ທີ່ໄດ້ເຫັນລັດຖະບານອາເມລິກາຕິດຕໍ່ພົວພັນທັງອິສຣາແອນແລະປາແລັສຕິນ ແລະຫວັງຈະໄດ້ເຫັນການເປີດການເຈລະຈາສັນຕິພາບຄືນໃໝ່.
 |
