（ທ່ານນາງວັນດີ ບຸດທະສະວົງ ເອກອັກຄະລັດຖະທູດ ສປປ ລາວປະຈຳ ສປ ຈີນໃຫ້ສຳພາດຕໍ່ນັກຂ່າວ CRI）
ກອງປະຊຸມສຸດຍອດເວທີປຶກສາຫາລືຮ່ວມມືສາກົນ "ໜຶ່ງແລວທາງໜຶ່ງເສັ້ນທາງ" ຈະໄຂຂຶ້ນຢູ່ນະຄອນຫຼວງປັກກິ່ງແຕ່ວັນທີ 14-15 ພຶດສະພານີ້. ຫວ່າງກ່ອນນີ້ບໍ່ດົນ, ທ່ານນາງວັນດີ ບຸດທະສະວົງ ເອກອັກຄະລັດຖະທູດ ສປປ ລາວປະຈຳ ສປ ຈີນໄດ້ໃຫ້ສຳພາດຕໍ່ນັກຂ່າວ CRI ໂດຍກ່າວວ່າ, ຂໍ້ລິເລີ່ມ "ໜຶ່ງແລວທາງ ໜຶ່ງເສັ້ນທາງ" ກັບຍຸດທະສາດການພັດທະນາຂອງລາວມີຫຼາຍດ້ານທີ່ມີຄວາມກົມກຽວກັນ. ລາວຫວັງວ່າຜ່ານຈາກຂໍ້ລິເລີ່ມດັ່ງກ່າວ ສາມາດເຮັດໃຫ້ຕົນເອງມີການພັດທະນາຢ່າງໃຫຍ່ຫຼວງ ທັງເພີ່ມທະວີການຮ່ວມມືຢ່າງບັງເກີດຜົນກັບບັນດາປະເທດຢູ່ອ້ອມຂ້າງ.
ທ່ານທູດວັນດີໄດ້ຕີລາຄາຢ່າງສູງຕໍ່ຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ" ທ່ານນາງກ່າວວ່າ:
"ຂໍ້ລິເລີ່ມ ໜຶ່ງແລວທາງ ໜຶ່ງເສັ້ນທາງແມ່ນຫົວຄິດປະດິດສ້າງອັນສຳຄັນ ແລະມີຄວາມໝາຍ ເຊິ່ງສອດຄ່ອງກັບຜົນປະໂຫຍດພື້ນຖານຂອງສັງຄົມໂລກ ອັນໄດ້ສະແດງໃຫ້ເຫັນເຖິງຄວາມປາຖະໜາອັນສວຍງາມແລະຄວາມມຸ້ງຫວັງລວມຂອງສັງຄົມມະນຸດ ສ້າງຄວາມສົມບຸນພູນສຸກໃຫ້ແກ່ປະຊາຊົນຂອງບັນດາປະເທດໃນໂລກ. ການຣ່ວມກັນສ້າງໜຶ່ງແລວທາງ ໜຶ່ງເສັ້ນທາງ ແມ່ນການຊອກຄົ້ນຫາຊ່ອງທາງ ແລະຮູບການຮ່ວມມືສາກົນແບບໃໝ່ຢ່າງຕັ້ງໜ້າທີ່ສອດຄ່ອງກັບກະແສຍຸກສະໄໝ ທີ່ຫັນເປັນຫຼາຍຂົ້ວ. ການສ້າງ ໜຶ່ງແລວທາງ ໜຶ່ງເສັ້ນທາງ ເປັນການຊຸກຍູ້ໃຫ້ປັດໄຈເສດຖະກິດຄ່ອງໂຕຢ່າງມີລະບຽບແລະເສລີ ຊັບພະຍາກອນຖືກຈັດສັນຢ່າງມີປະສິດທິພາບສູງ, ເພີ່ມທະວີການແລກປ່ຽນວັດທະນະທຳ ແລະອາລິຍະທຳລະຫ່າງປະຊາຊົນບັນດາປະເທດ ເພື່ອເຣັດໃຫ້ປະຊາຊົນບັນດາປະເທດໄວ້ເນື້ອເຊື່ອໃຈກັນ, ເຄົາລົບເຊິ່ງກັນແລະກັນ ແລະຮ່ວມກັນດຳລົງຊີວິດຢ່າງກົມກຽວກັນ."
ປະເທດລາວແມ່ນປະເທດທີ່ບໍ່ມີຊາຍແດນຕິດກັບທະເລພຽງປະເທດດຽວຂອງອາຊີຕາເວັນອອກສຽງໃຕ້ ແລະກໍ່ແມ່ນປະເທດທີ່ມີທາງບົກຕິດຕໍ່ຫາລະຫວ່າງຈີນກັບບັນດາປະເທດອາຊຽນທີ່ສັ້ນທີ່ສຸດ, ສະນັ້ນ ລັດຖະບານລາວໄດ້ສຸມໃສ່ການສ້າງສາປະເທດຈາກການເປັນປະເທດທີ່ບໍ່ມີຊາຍແດນຕິດກັບທະເລ ໃຫ້ເປັນປະເທດເຊື່ອມຈອດກັບພາກພື້ນແລະສາກົນ. ພາຍໃຕ້ຂອບ ຂອງຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ" ໂຄງການທາງລົດໄຟລາວ-ຈີນໄດ້ເລີ່ມກໍ່ສ້າງໃນທ້າຍປີ 2015 ທ່ານທູດວັນດີຊີ້ອອກວ່າ:
"ຂໍ້ລິເລີ່ມ 'ໜຶ່ງແລວທາງ ໜຶ່ງເສັ້ນທາງ' ກັບຍຸດທະສາດການພັດທນະຂອງລາວມີຫຼາຍດ້ານທີ່ມີຄວາມກົມກຽວ ແລະກຳລັງເຊື່ອມໂຍງເຂົ້າຫາກັນ ເປັນຕົ້ນການປະສານງານທາງນະໂຍບາຍ ການເຊື່ອມຈອດທາງພື້ນຖານໂຄງລ່າງ ຄົມມະນາຄົມ ການຄ້າ ແລະການເຊື່ອມຄວາມສຳພັນໄມຕີລະຫວ່າງປະຊາຊົນ. (ໃນບັນດາໂຄງການທີ່ສອງປະເທດລາວຈີນຮ່ວມມືກັນສ້າງຂຶ້ນນັ້ນ) ໂຄງການກໍ່ສ້າງທາງລົດໄຟລາວ-ຈີນ ແມ່ນໂຄງການໃຫຍ່ທີ່ມີຄວາມສຳຄັນເປັນພິເສດ ມີຄວາມໝາຍທາງດ້ານປະຫວັດສາດ ແລະຍຸດທະສາດ ທັງເປັນສັນຍາລັກອັນໃໝ່ແຫ່ງການຮ່ວມມືລາວ-ຈີນ, ເປັນພື້ນຖານໂຄງລ່າງທາງດ້ານເສດຖະກິດທີ່ໜັກແໜ້ນແລະຍືນຍົງສຳລັບ ສປປ ລາວ ໃນການພັດທະນາເສດຖະກິດ-ສັງຄົມຂອງປະເທດ, ເປັນການດຶງດູດການລົງທຶນຈາກຕ່າງປະເທດ; ເປັນການສົ່ງເສີມການພົວພັນ, ຮ່ວມມືຄ້າຂາຍ, ແລກປ່ຽນສິນຄ້າ ການໄປມາຫາສູ່, ການທ່ອງທ່ຽວ , ການລົງທຶນກັບບັນດາປະເທດາອຊຽນ ແລະ ສປ ຈີນເຊິ່ງໂຄງການນີ້ຈະສົ່ງເສີມຂະແໜງກະສິກຳ ອຸດສາຫະກຳ ການທ່ອງທ່ຽວ ແລະຂະແໜງການອື່ນໆ ເພີ່ມວຽກເຣັດງານທຳໃຫ້ແກ່ສັງຄົມຢ່າງກວ້າງຂວາງ ຍັງຈະເປັນການເຊື່ອມຈອດກັບບັນດາປະເທດອາຊຽນ ແລະ ສປຈີນ. ພິເສດແມ່ນເປັນຊັບສິນແລະເປັນມໍລະດົກອັນລ້ຳຄ່າໃຫ້ລຸ່ນສືບທອດນຳໃຊ້ຕະຫຼອດໄປ ແລະເປັນປະໂຫຍດໃຫ້ແກ່ການພັດທນະທີ່ຍືນຍົງ."
ເດືອນມີນາ 2016 ກອງປະຊຸມຄັ້ງປະຖົມມະເລີກຂອງກົນໄກຮ່ວມມືແມ່ນ້ຳລ້ານຊ້າງ-ແມ່ນ້ຳຂອງໄດ້ໄຂຂຶ້ນພາຍໃຕ້ຫົວຂໍ້ວ່າ: ກິນນ້ຳສາຍດຽວກັນ ຜູກພັນຊະຕາກຳຢ່າງແໜ້ນແຟ້ນ. ສປປ ລາວແມ່ນໜຶ່ງ ໃນ 6 ປະເທດສະມມາຊິກຂອງກົນໄກດັ່ງກ່າວ, ເດືອນມີນາ 2017 ທ່ານທູດວັນດີ ບຸດທະສະວົງກໍ່ໄດ້ເປັນສັກຂີພິຍານໃຫ້ແກ່ການສ້າງຕັ້ງກອງເລຂາຂອງການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງຢູ່ທີ່ນະຄອນຫຼວງປັກກິ່ງ. ທ່ານນາງກ່າວວ່າ:
"ຂໍ້ລິເລີ່ມ'ໜຶ່ງແລວທາງ ໜຶ່ງເສັ້ນທາງ' ໄດ້ສອດຫ້ອຍໄປທົ່ວທະວີບອາຊີ ເອີລົບ ແລະຟຮີກາ ຈະມີຜົນດີໃຫ້ແກ່ການຊຸກຍູ້ການສ້າງຄວາມເປັນໜຶ້ງດຽວຂອງອາຊຽນ ແລະການຮ່ວມມືໃນຂົງເຂດແມ່ນ້ຳຂອງ-ແມ່ນ້ຳລ້ານຊ້າງ.ສອງຝ່າຍອາຊຽນ-ຈີນເປັນຄູ່ຮ່ວມມືບູລິມະສິດໃນຂອບການຮ່ວມມືໜຶ່ງແລວທາງໜຶ່ງເສັ້ນທາງ ໂດຍຈະສ້າງເສັ້ນທາງລົດໄຟລາວ-ຈີນ, ໄທ-ຈີນ, ລົດໄຟຄວາມໄວ້ສູງແຕ່ຈາກາຕາ-ບັນດົງ, ຍົກລະດັບເຂດການຄ້າເສລີຈີນ-ອາຊຽນແລະອື່ນໆ.ເຊື່ອໝັ້ນວ່າພາຍໃຕ້ຄວາມພະຍາຍາມຣ່ວມຂອງບັນດາປະເທດອາຊຽນ ແລະ 6 ປະເທດຂອບການຮ່ວມມືແມ່ນ້ຳຂອງ-ແມ່ນ້ຳລ້ານຊ້າງ ຈະຊຸກຍູ້ສາຍພົວພັນມິດຕະພາບອາຊຽນ-ຈີນ ຂຶ້ນສູ່ລະດັບໃໝ່, ຮັດແຄບຄວາມແຕກໂຕນດ້ານການພັດທະນາຂອງບັນດາປະເທດາອຊຽນ ກໍ່ຄືປະເທດອະນຸພາກພື້ນແມ່ນ້ຳຂອງ-ແມ່ນ້ຳລ້ານຊ້າງ ແລະປະກອບສ່ວນອັນສຳຄັນເຂົ້າໃນການປົກປັກຣັກສາສັນຕິພາບໂລກ."
