ທ່ານມຸນແຈອິນໄດ້ຮັບເລືອກຕັ້ງເປັນປະທານາທິບໍດີ ສ ເກົາຫຼີ ຄົນໃໝ່

ຄະນະກຳມະການການເລືອກຕັ້ງ ສ ເກົາຫຼີອອກມາປະກາດໃນຕອນຂ້ອນແຈ້ງວັນທີ 10 ພຶດສະພານີ້ວ່າ, ຫຼັງນັບບັດລົງຄະແນນ, ທ່ານມຸນແຈອິນ ຜູ້ສະໝັກຮັບເລືອກຕັ້ງຈາກພັກມິນຈູໄດ້ຮັບໄຊຊະນະ, ແລະໄດ້ກາຍເປັນປະທານາທິບໍດີຄົນໃໝ່.

ການປ່ອນບັດເລືອກຕັ້ງປະທານາທິບໍດີຊຸດນີ້ໄດ້ຈັດຂຶ້ນແຕ່ 6 ໂມງຫາ 20 ໂມງໃນວັນທີ 9 ພຶດສະພານີ້, ແລະມີໜ່ວຍເລືອກຕັ້ງ 13964 ໜ່ວຍ. ຂະນະທີ່ຄະນະກຳມະການເລືອກຕັ້ງໄດ້ປະກາດໃນຕອນຂ້ອນແຈ້ງວັນທີ 10 ພຶດສະພານີ້ໂດຍຊີ້ໃຫ້ເຫັນວ່າ, ປະຊາຊົນອອກມາໃຊ້ສິດເລືອກຕັ້ງເຖິງ 77,2%, ແລະໃນການນັບບັດລົງຄະແນນ 88,7%, ທ່ານມຸນແຈອິນໄດ້ຮັບຄະແນນສຽງ 40,3%, ຂະນະທີ່ຄະແນນນຳຂອງທ່ານໄດ້ຫຼາຍກວ່າບັດລົງຄະແນນທີ່ຍັງບໍ່ທັນໄດ້ນັບເທື່ອ, ຈາກນີ້ຈຶ່ງຢືນຢັນວ່າທ່ານໄດ້ຮັບເລືອກຕັ້ງເປັນປະທານາທິບໍດີແລ້ວ.
ຕາມແຜນນັ້ນ, ປະທານາທິບໍດີຄົນໃໝ່ຈະຂຶ້ນຮັບຕຳແໜ່ງໃນທັນທີພາຍຫຼັງໄດ້ຮັບໜັງສືຢັ້ງຢືນຈາກຄະນະກຳມະການເລືອກຕັ້ງໃນວັນທີ 10 ພຶດສະພານີ້.