ກ່ອນໜ້ານີ້ບໍ່ດົນໄດ້ມີພິທີລົງມືກໍ່ສ້າງສຳນັກສະແດງທຳທາງພຸດທະສາສະໜາມາເລເຊຍໄດ້ຈັດຂຶ້ນຢູ່ເມືອງປູຕຣາຈາຢາປະເທດດັ່ງກ່າວ ແລະມາຮອດປັດຈຸບັນທັງສຳນັກສະແດງທຳທາງພຸດທະສາສະໜາແລະສາສະໜາຮິນດູໄດ້ລົງມືກໍ່ສ້າງແລ້ວ, ສ່ວນສາສະໜາເຕົາກຳລັງຢູ່ໃນໄລຍະສະເໜີ ແລະສາສະໜາອື່ນໆກໍກຳລັງຢູ່ໃນໄລຍະວາງແຜນ.
ໜັງສືພິມ Chew Daily ໜັງສືພິມລາຍໃຫຍ່ຂອງເມືອງດັ່ງກ່າວໄດ້ລົງພິມບົດນຳໃນວັນທີ 10 ພຶດສະພານີ້ວ່າ: ເມືອງປູຕຣາຈາຢາໄດ້ເຂົ້າສູ່ບາດກ້າວທຳອິດໃນການສົ່ງເສີມຄວາມ ປອງດອງແລະ ເສລີພາບຂອງສາສະໜາເຊິ່ງໄດ້ກາຍເປັນໂຕແບບໜຶ່ງ.ຂະນະດຽວກັນກໍ ຫວັງວ່າບັນດາລັດໃນທົ່ວປະເທດຈະປະຕິບັດນະໂຍບາຍດຽວກັນໂດຍຈັດສັນທີ່ດິນແລະຊັບພະຍາກອນໃຫ້ຫຼາຍກວ່າເກົ່າເພື່ອເຮັດໃຫ້ບັນດາສາສະໜາໃຫຍ່ໄດ້ຮັບຊັບພະຍາກອນຈາກລັດຢ່າງຍຸຕິທຳ. ອົງການປົກຄອງທຸກຂັ້ນກໍຄວນປະຕິບັດນະໂຍບາຍຕໍ່ບັນດາສາສະໜາໃຫຍ່ຢ່າງຍຸຕິທຳ ເພື່ອເປັນປະໂຫຍດຕໍ່ການສົ່ງເສີມຄວາມປອງດອງລະຫວ່າງສາສະໜາຕ່າງໆໂດຍຈະບໍ່ໃຫ້ເກີດຄວາມຂັດແຍ້ງແລະເປັນປໍລະປັກກັນອີກຕໍ່ໄປ ເພື່ອເຮັດໃຫ້ມາເລເຊຍກ້າວໄປ ໜ້າຢ່າງສະຫງ່າຜ່າເຜີຍບົນຈິດໃຈແລະພື້ນຖານການສ້າງປະເທດທີ່ສາມັກຄີປອງດອງກັນ.