ຕາມຂ່າວສານຈີນ: ກະຊວງການຄ້າຈີນເປີດເຜີຍໃນວັນທີ 11 ເດືອນນີ້ວ່າ, ຍອດມູນຄ່າການຄ້າລະຫວ່າງຈີນແລະອາຟຣິກາໃນໄຕມາດທຳອິດປີນີ້ມີເຖິງ 38 ຕື້ 800 ລ້ານໂດລາສະຫະລັດ ເຊິ່ງເພີ່ມຂຶ້ນ 16,8% ເມື່ອທຽບໃສ່ໄຕມາດທຳອິດຂອງປີຜ່ານມາ ແລະນັບວ່າເປັນການເພີ່ມຂຶ້ນຄັ້ງທຳອິດເມື່ອທຽບໃສ່ໄລຍະດຽວກັນຂອງປີ 2015 ເປັນຕົ້ນມາ.
ກະຊວງດັ່ງກ່າວຊີ້ໃຫ້ເຫັນວ່າ, ຈີນໄດ້ນຳເຂົ້າສິນຄ້າຈາກອາຟຣິກາໃນມູນຄ່າ 18 ຕື້ 400 ລ້ານໂດລາ ເພີ່ມຂຶ້ນຫຼາຍກວ່າໄຕມາດທຳອິດປີຜ່ານມາ 46%; ສ່ວນການລົງທຶນ ໂດຍສະເພາະຍອດມູນຄ່າການລົງທຶນທີ່ບໍ່ແມ່ນປະເພດການທະນາຄານກໍໄດ້ເພີ່ມຂຶ້ນ 64% ເມື່ອທຽບໃສ່ໄຕມາດທຳອິດປີຜ່ານມາ ໂດຍມີມູນຄ່າຫຼາຍກວ່າ 750 ຕື້ໂດລາ. ຂະນະດຽວກັນ, ຍອດມູນຄ່າການຮັບເໝົາກໍ່ສ້າງໂຄງການຂອງວິສາຫະກິດຈີນຕາມສັນຍາຢູ່ອາຟຣິກາທີ່ໄດ້ລົງນາມໃໝ່ມີເຖິງ 13 ຕື້ 400 ລ້ານໂດລາ ແລະຍອດມູນຄ່າທຸລະກິດກໍມີເຖິງ 9 ຕື້ 400 ລ້ານໂດລາ.
ທ່ານຊຸ່ນຈີ້ເຫວີນ ໂຄສົກກະຊວງການຄ້າຈີນກ່າວວ່າ, ການຮ່ວມມືທາງເສດຖະກິດການຄ້າລະຫວ່າງຈີນແລະອາຟຣິກາມີທ່ວງທ່າຂະຫຍາຍຕົວດີໃນໄຕມາດທຳອິດ ແລະປີນີ້ຈະສາມາດຮັກສາທ່ວງທ່າທີ່ດີດັ່ງກ່າວຕໍ່ໄປ ແລະຈະຂຶ້ນສູ່ລະດັບສູງກວ່າເກົ່າ.