ວັນທີ 14 ພຶດສະພານີ້, ທ່ານ ສີຈິ້ນຜິງ ປະທານປະເທດຈີນ ໄດ້ກ່າວປາຖະກະຖາທີ່ມີຫົວເລື່ອງວ່າ: "ຮ່ວມໄມ້ຮ່ວມມືກັນຊຸກຍູ້ການສ້າງໜຶ່ງແລວທາງໜຶ່ງເສັ້ນທາງ" ໃນພິທີໄຂກອງປະຊຸມສຸດສອດເວທີປຶກສາຫາລືການຮ່ວມມືສາກົນ "ໜຶ່ງແລວທາງໜຶ່ງເສັ້ນທາງ", ໂດຍຊີ້ໃຫ້ເຫັນວ່າ, ເສັ້ນທາງສາຍໄໝບູຮານ ມີຄວາມຍາວໝື່ນລີ້, ສືບຕໍ່ກັນມາເປັນເວລາໜຶ່ງພັນກວ່າປີ, ໄດ້ກໍ່ຕົວເປັນຈິດໃຈເສັ້ນທາງສາຍໄໝທີ່ຖືການຮ່ວມມືໂດຍສັນຕິ, ການເປີດປະຕູ, ການກວມລວມ, ການຖອດຖອນບົດຮຽນເຊິ່ງກັນແລະກັນ ແລະຕ່າງຝ່າຍຕ່າງໄດ້ຮັບຜົນປະໂຫຍດຮ່ວມກັນເປັນແກນກາງ. ນີ້ແມ່ນມໍລະດົກອັນລ້ຳຄ່າຂອງອາລະຍະທຳມະນຸດ. ໃນສະໄໝລາຊະວົງຖັງ, ຊົ້ງ ແລະຢວນຂອງຈີນ, ເສັ້ນທາງສາຍໄໝທາງບົກແລະທາງທະເລ ໄດ້ພັດທະນາພ້ອມກັນ, ທ່ານ ຕູ້ຮວນ ນັກທ່ອງທ່ຽວຂອງຈີນ, ທ່ານ ມາໂຄ ໂປໂລ ນັກທ່ອງທ່ຽວອີຕາລີ ແລະທ່ານ ອີບຸນ ປາຍທູທາຍ ນັກທ່ອງທ່ຽວຂອງມາລົກ ລ້ວນແຕ່ໄດ້ບັນທຶກເສັ້ນທາງສາຍໄໝທາງບົກແລະທາງທະເລໄວ້ໃນປຶ້ມຂອງຕົນ ເຊິ່ງກາຍເປັນຮ່ອງຮອຍປະຫວັດສາດ. ພາລະກິດບຸກເບີກເຫຼົ່ານີ້ ສ້າງຂຶ້ນໂດຍບໍ່ໄດ້ອາໄສມ້າຮົບແລະມີດຄົມ, ຫາກອາໄສກອງອູດແລະຄວາມເມດຕາກະລຸນາ, ບໍ່ໄດ້ອາໄສກຳປັ່ນຮົບແລະປືນໃຫຍ່, ຫາກອາໄສກຳປັ່ນທີ່ບັນທຸກສິນຄ້າອັນລ້ຳຄ່າແລະມິດຕະພາບ.
ທ່ານ ສີຈິ້ນຜິງ ຊີ້ໃຫ້ເຫັນວ່າ, ເມື່ອເບິ່ງຈາກມຸມປະຫວັດສາດແລ້ວເຫັນວ່າ, ສັງຄົມມະນຸດ ພວມຢູ່ໃນໄລຍະທີ່ມີການພັດທະນາໃຫຍ່, ການປ່ຽນແປງໃຫຍ່ ແລະການປັບປຸງໃຫຍ່. ເມື່ອເບິ່ງຈາກມຸມປັດຈຸບັນແລ້ວເຫັນວ່າ, ພວກເຮົາ ພວມຢູ່ໃນໂລກທີ່ມີສິ່ງທ້າທາຍເກີດຂຶ້ນເລື້ອຍໆ. ການເຕີບໂຕຂອງເສດຖະກິດໂລກຕ້ອງການພະລັງແຮງໃໝ່, ການພັດທະນາຕ້ອງສ້າງຜົນປະໂຫຍດໃຫ້ທຸກຝ່າຍຢ່າງດຸນດ່ຽງກັນ ແລະ ຄວາມແຕກຕ່າງກັນລະຫວ່າງຄວາມຮັ່ງມີກັບຄວາມທຸກຍາກນັ້ນ ຕ້ອງການຫຼຸດໃຫ້ໜ້ອຍລົງ. ແຕ່ປັດຈຸບັນ, ເຂດສຸດສຸມຂອງໂລກ ມີຄວາມປັ່ນປ່ວນຢ່າງຕໍ່ເນື່ອງ, ລັດທິກໍ່ການຮ້າຍກຳລັງແຜ່ຂະຫຍາຍຢູ່. ບັນຫາສັນຕິພາບ, ບັນຫາການພັດທະນາ ແລະບັນຫາດ້ານການປົກຄອງ ແມ່ນສິ່ງທ້າທາຍທີ່ຂ້ຽວຂາດທີ່ມວນມະນຸດຜະເຊີນຢູ່. ນັບແຕ່ສະເໜີຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ" ອອກມາເປັນເວລາ 4 ປີມານີ້, 100 ກວ່າປະເທດແລະອົງການຈັດຕັ້ງສາກົນໃນໂລກ ໄດ້ຕັ້ງໜ້າສະໜັບສະໜູນ ແລະ ເຂົ້າຮ່ວມການສ້າງ "ໜຶ່ງແລວທາງໜຶ່ງເສັ້ນທາງ", ມະຕິສຳຄັນຂອງສະມັດຊາໃຫຍ່ສະຫະປະຊາຊາດ ແລະສະພາຄວາມໝັ້ນຄົງ ກໍມີເນື້ອໃນກ່ຽວກັບການສ້າງ "ໜຶ່ງແລວທາງໜຶ່ງເສັ້ນທາງ". ການສ້າງ "ໜຶ່ງແລວທາງໜຶ່ງເສັ້ນທາງ" ໄດ້ຄ່ອຍໆຈາກທັດສະນະຄະຕິ ກາຍເປັນການກະທຳ, ຈາກວິໄສທັດກາຍເປັນສະພາບຕົວຈິງ ແລະໄດ້ຮັບໝາກຜົນຢ່າງຫຼວງຫຼາຍ.
ທ່ານ ສີຈິ້ນຜິງ ກ່າວວ່າ, ການສ້າງ "ໜຶ່ງແລວທາງໜຶ່ງເສັ້ນທາງ" ບໍ່ໝາຍຄວາມວ່າ ຈະດຳເນີນການກໍ່ສ້າງຄືນໃໝ່, ຫາກແມ່ນການເຊື່ອມຕໍ່ຍຸດທະສາດ ແລະຊ່ວຍຊູຍູ້ໜູນດ້ານທ່າແຮງຂອງກັນ. ຈີນໄດ້ປະສານນະໂຍບາຍກັບປະເທດທີ່ກ່ຽວຂ້ອງ ລວມທັງ ສະຫະພາບເສດຖະກິດເອີຣົບອາຊີທີ່ສະເໜີໂດຍຣັດເຊຍ, ແຜນການລວມການເຊື່ອມຈອດກັນທີ່ສະເໜີໂດຍອາຊຽນ, "ເສັ້ນທາງແຈ້ງສະຫວ່າງ" ທີ່ສະເໜີໂດຍກາຊັກສະຖານ, "ລະບຽງກາງ" ທີ່ສະເໜີໂດຍຕວກກີ, "ເສັ້ນທາງພັດທະນາ" ທີ່ສະເໜີໂດຍມົງໂກລີ, "ສອງລະບຽງໜຶ່ງວົງ" ທີ່ສະເໜີໂດຍຫວຽດນາມ, "ໃຈກາງເສດຖະກິດພາກເໜືອອຽກລັງ" ທີ່ສະເໜີໂດຍອັງກິດ, "ເສັ້ນທາງອຳພັນ" ທີ່ສະເໜີໂດຍໂປໂລຍ ແລະອື່ນໆ. ຈີນໄດ້ເຊັນສັນຍາການຮ່ວມມືກັບ 40 ກວ່າປະເທດແລະອົງການຈັດຕັ້ງສາກົນ, ໄດ້ດຳເນີນການຮ່ວມມືດ້ານຄວາມສາມາດການຜະລິດແບບກົນໄກກັບ 30 ກວ່າປະເທດ. ໃນໄລຍະໄຂກອງປະຊຸມເວທີປຶກສາຫາລື, ຈີນຍັງຈະເຊັນສັນຍາການຮ່ວມມືແລະແຜນການດຳເນີນງານຈຳນວນໜຶ່ງ ແລະຮ່ວມກັບ 60 ກວ່າປະເທດແລະອົງການຈັດຕັ້ງສາກົນເພື່ອສະເໜີຂໍ້ລິເລີ່ມກ່ຽວກັບການຮ່ວມມືແລະຊຸກຍູ້ການອຳນວຍຄວາມສະດວກແກ່ການຄ້າ "ໜຶ່ງແລວທາງໜຶ່ງເສັ້ນທາງ".
ທ່ານ ສີຈິ້ນຜີງ ກ່າວວ່າ : "ເສັ້ນທາງເຊື່ອມຈອດກັນແລ້ວ, ພາລະກິດທຸກຢ່າງຈຶ່ງຈະເລີນຂຶ້ນ." ຈີນແລະປະເທດທີ່ກ່ຽວຂ້ອງ ຮ່ວມກັນເລັ່ງລັດຊຸກຍູ້ການກໍ່ສ້າງໂຄງການຕ່າງໆ, ເຊັ່ນ: ທາງລົດໄຟຄວາມໄວສູງຈາກາຕາ-ບັງດຸງ, ທາງລົດໄຟຈີນ-ລາວ, ທາງລົດໄຟອັດດິສອາບາບາ-ຈີບູຕີ, ທາງລົດໄຟຮົງກາລີ-ແຊກບີ, ກໍ່ສ້າງທ່າກຳປັ່ນກວາດາ, ທ່າກຳປັ່ນປີຮາເອອຸສແລະອື່ນໆ, ວາງແຜນປະຕິບັດໂຄງການເຊື່ອມຈອດເຊື່ອມໂຍງຕ່າງໆ. ປັດຈຸບັນນີ້, ໂດຍຖືແລວທາງເສດຖະກິດຈີນ-ປາກິສະຖານ,ຈີນ-ມົງໂກລີ-ຣັດເຊຍ, ຂົວທາງບົກໃໝ່ແຜ່ນດິນໃຫຍ່ອາຊີ-ເອີລົບແລະອື່ນໆເປັນການນຳພາ, ຖືທາງຜ່ານທາງບົກ ທາງທະເລ ທາງອາກາດ ແລະທາງດ່ວນດ້ານຂໍ້ມູນຂ່າວສານເປັນໂຄງຮ່າງຫຼັກ, ອີງໃສ່ໂຄງການສຳຄັນຕ່າງໆເຊິ່ງລວມທັງທາງລົດໄຟ ທ່າກຳປັ່ນແລະເຄືອຂ່າຍທໍ່ສົ່ງ, ຈຶ່ງເຮັດໃຫ້ເຄືອຂ່າຍພື້ນຖານໂຄງລ່າງແບບສັງລວມພວມເປັນຮູບເປັນຮ່າງຂຶ້ນ.
ທ່ານ ສີຈິ້ນຜີງ ຊີ້ອອກວ່າ, ຈີນແລະປະເທດທີ່ເຂົ້າຮ່ວມ "ໜຶ່ງແລວທາງໜຶ່ງເສັ້ນທາງ" ໄດ້ພະຍາຍາມເພີ່ມຄວາມສະດວກໃນດ້ານການຄ້າແລະການລົງທຶນ, ປັບປຸງສະພາບແວດລ້ອມດ້ານທຸລະກິດການຄ້າໃຫ້ດີຂຶ້ນເລື້ອຍໆ. ເວລາຜ່ານດ່ານຂອງຜະລິດຕະພັນກະສິກຳຂອງປະເທດອາຊີກາງ ເຊັ່ນ ກາຊັກສະຖານເປັນຕົ້ນເຂົ້າສູ່ຕະຫຼາດຈີນນັ້ນ ກໍ່ໄດ້ຫຼຸດລົງ 90%. ນັບແຕ່ປີ 2014 ຮອດປີ 2016, ຍອດມູນຄ່າການຄ້າລະຫວ່າງຈີນກັບປະເທດລຽບຕາມ "ໜຶ່ງແລວທາງໜຶ່ງເສັ້ນທາງ" ກໍບັນລຸຫຼາຍກວ່າ 3000 ຕື້ໂດລາສະຫະລັດ. ຍອດມູນຄ່າການລົງທຶນຂອງຈີນຢູ່ປະເທດລຽບຕາມ "ໜຶ່ງແລວທາງໜຶ່ງເສັ້ນທາງ" ບັນລຸຫຼາຍກວ່າ 50 ຕື້ໂດລາ. ວິສາຫະກິດຈີນໄດ້ມີສ່ວນຮ່ວມໃນການສ້າງເຂດຮ່ວມມືເສດຖະກິດການຄ້າ 56 ແຫ່ງຢູ່ 20 ກວ່າປະເທດ, ໄດ້ສ້າງລາຍຮັບຈາກສ່ວຍສາອາກອນປະມານ 1,1 ຕື້ໂດລາແລະຕຳແໜ່ງວຽກງານ 1 ແສນ 8 ໝື່ນຕຳແໜ່ງໃຫ້ປະເທດທີ່ກ່ຽວຂ້ອງ. ທະນາຄານລົງທຶນພື້ນຖານໂຄງລ່າງອາຊີໄດ້ສະໜອງເງິນກູ້ 1,7 ຕື້ໂດລາໃຫ້ແກ່ 9 ໂຄງການຂອງປະເທດທີ່ເຂົ້າຮ່ວມ"ໜຶ່ງແລວທາງໜຶ່ງເສັ້ນທາງ" , "ກອງທຶນເສັ້ນທາງສາຍໄໝ"ໄດ້ລົງທຶນເປັນມູນຄ່າ 4 ຕື້ໂດລາ, ບໍລິສັດຮຸ້ນສ່ວນການທະນາຄານ "16+1"ລະຫວ່າງຈີນກັບເອີລົບກາງໄດ້ຮັບການສ້າງຕັ້ງຂຶ້ນຢ່າງເປັນທາງການ.
ທ່ານ ສີຈິ້ນຜີງ ຊີ້ໃຫ້ເຫັນວ່າ, ພາກພື້ນລຽບຕາມເສັ້ນທາງສາຍໄໝໃນສະໄໝບູຮານເຄີຍເປັນ "ສະຖານທີ່ອຸດົມສົມບູນດ້ວຍນ້ຳນົມແລະນ້ຳເຜີ້ງ". ປັດຈຸບັນຫຼາຍບ່ອນໄດ້ກາຍເປັນສະຖານທີ່ທີ່ມີຄວາມປັ່ນປ່ວນ, ການປະທະກັນ, ວິກິດການແລະສິ່ງທ້າທາຍ. ພວກຂ້າພະເຈົ້າຕ້ອງສ້າງ "ໜຶ່ງແລວທາງໜຶ່ງເສັ້ນທາງ" ໃຫ້ເປັນເສັ້ນທາງແຫ່ງສັນຕິພາບ, ສ້າງສາຍພົວພັນສາກົນແບບໃໝ່ທີ່ຖືການຮ່ວມມືແບບຕ່າງຝ່າຍຕ່າງມີຜົນປະໂຫຍດເປັນແກນກາງ, ສ້າງສາຍພົວພັນຄູ່ຮ່ວມ ທີ່ສົນທະນາແຕ່ບໍ່ເປັນປໍລະປັກກັນ, ຮ່ວມມືແຕ່ບໍ່ຮ່ວມກຸ່ມ; ສ້າງ "ໜຶ່ງແລວທາງໜຶ່ງເສັ້ນທາງ" ໃຫ້ເປັນເສັ້ນທາງແຫ່ງຄວາມສິວິໄລ, ຂຸດຄົ້ນກຳລັງບົ່ມຊ້ອນດ້ານການພັດທະນາຂອງປະເທດຕ່າງໆ, ລົງເລິກການຮ່ວມມືເພື່ອຍົກລະດັບຄວາມສາມາດການຜະລິດ, ກຳແໜ້ນການກໍ່ສ້າງໂຄງການໃຫຍ່; ສ້າງລະບົບຮັບປະກັນການທະນາຄານທີ່ໝັ້ນຄົງ, ຍືນຍົງແລະຄວບຄຸມຄວາມສ່ຽງໄດ້, ປັບປຸງເຄືອຂ່າຍການບໍລິການດ້ານການທະນາຄານ; ພະຍາຍາມເລັ່ງລັດການເຊື່ອມຈອດທາງບົກ ທາງທະເລ ທາງອາກາດແລະທາງອິນເຕີເນັດ, ສຸມໃສ່ທາງຜ່ານ, ຕົວເມືອງແລະໂຄງການທີ່ມີລັກສະນະກຸນແຈ, ເຊື່ອມຈອດເຄືອຂ່າຍເສັ້ນທາງທາງຫຼວງ ທາງລົດໄຟໃນທາງບົກ, ແລະເຄືອຂ່າຍທ່າກຳປັ່ນທາງທະເລ, ສ້າງເຄືອຂ່າຍພະລັງງານທົ່ວໂລກ, ປັບປຸງເຄືອຂ່າຍສັນຈອນສິນຄ້າຂ້າມພາກພື້ນ.
ທ່ານ ສີຈິ້ນຜີງ ຊີ້ອອກວ່າ, ພວກຂ້າພະເຈົ້າຈະສ້າງ "ໜຶ່ງແລວທາງໜຶ່ງເສັ້ນທາງ" ໃຫ້ເປັນເສັ້ນທາງແຫ່ງການເປີດປະຕູສູ່ພາຍນອກ, ສ້າງເວທີຮ່ວມມືແບບເປີດປະຕູ, ຮັກສາແລະພັດທະນາເສດຖະກິດໂລກແບບເປີດປະຕູ, ເຂົ້າຮ່ວມການຄຸ້ມຄອງທົ່ວໂລກແລະສະໜອງການບໍລິການສາທາລະນະ, ຮ່ວມມືສ້າງປະຊາຄົມຮ່ວມຜົນປະໂຫຍດຢ່າງກວ້າງຂວາງ; ປົກປັກຮັກສາລະບົບການຄ້າຫຼາຍຝ່າຍ, ຊຸກຍູ້ສ້າງເຂດການຄ້າເສລີ, ເພີ່ມທະວີເສລີພາບແລະຄວາມສະດວກໃນດ້ານການຄ້າແລະການລົງທຶນ; ຈະສ້າງ "ໜຶ່ງແລວທາງໜຶ່ງເສັ້ນທາງ" ໃຫ້ເປັນເສັ້ນທາງແຫ່ງການປະດິດສ້າງໃໝ່, ເພີ່ມທະວີການຮ່ວມມືໃນຂົງເຂດນະວັດຕະກຳ, ເຊັ່ນ: ເສດຖະກິດດີຈີຕອນ, AI, ເຕັກໂນໂລຊີນາໂນແມັດ, ຄອມພິມເຕີຄວນທຳ ແລະອື່ນໆ, ຊຸກຍູ້ການພັດທະນາຂໍ້ມູນໃຫຍ່, ການຄິດໄລ່ຄຼາວດ໌, ຕົວເມືອງສະມັດ, ເຊື່ອມຈອດເປັນເສັ້ນທາງສາຍໄໝດີຈີຕອນໃນສະຕະວັດທີ 21, ຄວນສ້າງໂອກາດປະກອບທຸລະກິດໃຫ້ແກ່ຊາວໜຸ່ມບັນດາປະເທດໃນຍຸກສະໄໝອິນເຕີເນັດ, ເຮັດໃຫ້ຄວາມໃຝ່ຝັນຂອງ ຮຸ່ນຄົນໃໝ່ບັນລຸຜົນເປັນຈິງ; ຈະສ້າງ "ໜຶ່ງແລວທາງໜຶ່ງເສັ້ນທາງ" ໃຫ້ເປັນເສັ້ນທາງແຫ່ງອະລິຍະທຳ, ສ້າງກົນໄກຮ່ວມມືດ້ານວັດທະນະທຳຫຼາຍລະດັບ, ເພີ່ມຈຳນວນທີ່ສົ່ງນັກສຶກສາໄປປະເທດຂອງກັນ, ສົ່ງເສີມບົດບາດຂອງສາງປັນຍາ, ນຳໃຊ້ມໍລະດົກວັດທະນະທຳປະຫວັດສາດໃຫ້ເປັນປະໂຫຍດ, ເພີ່ມທະວີການໄປມາຫາສູ່ກັນແລະການແລກປ່ຽນກັນລະຫວ່າງລັດຖະສະພາ, ພັກການເມືອງ, ອົງການຈັດຕັ້ງປະຊາຊົນແລະປະຊາຊົນຂອງປະເທດຕ່າງໆ, ເພີ່ມທະວີການຮ່ວມມືໃນການຕ້ານການສໍ້ລາດບັງຫຼວງ, ເຮັດໃຫ້ "ໜຶ່ງແລວທາງໜຶ່ງເສັ້ນທາງ" ກາຍເປັນເສັ້ນທາງແຫ່ງຄວາມປອດໄສຂາວສະອາດ.
ທ່ານ ສີຈິ້ນຜີງ ຊີ້ອອກວ່າ, ໂດຍບົນພື້ນຖານຂອງຫຼັກການ 5 ປະການທີ່ຢູ່ຮ່ວມກັນໂດຍສັນຕິນັ້ນ, ຈີນຍິນດີພັດທະນາການຮ່ວມມືໄມຕີຈິດມິດຕະພາບກັບປະເທດທີ່ເຂົ້າຮ່ວມ "ໜຶ່ງແລວທາງໜຶ່ງເສັ້ນທາງ", ຍິນດີແບ່ງປັນບົດຮຽນການພັດທະນາກັບບັນດາປະເທດໃນໂລກ, ແຕ່ຈະບໍ່ແຊກແຊງວຽກງານພາຍໃນຂອງປະເທດອື່ນ, ຈະບໍ່ສົ່ງອອກລະບອບສັງຄົມແລະຮູບການພັດທະນາແບບບັງຄັບໃສ່ປະເທດອື່ນ. ຈີນຈະບໍ່ຊ້ຳເສັ້ນທາງເກົ່າທີ່ແຂ່ງຂັນໃນພາກພື້ນ, ຈະບໍ່ສ້າງກຸ່ມນ້ອຍທີ່ທຳລາຍສະເຖຍລະພາບ, ແຕ່ຈະສ້າງຄອບຄົວໃຫຍ່ທີ່ຢູ່ຮ່ວມກັນຢ່າງກົມກຽວ. ຈີນກັບຫຼາຍປະເທດໄດ້ເຊັນສັນຍາຮ່ວມມືໃນຂອບ "ໜຶ່ງແລວທາງໜຶ່ງເສັ້ນທາງ" ເຊິ່ງລວມທັງ ການຂົນສົ່ງຄົມມະນາຄົມ, ພື້ນຖານໂຄງລ່າງ, ພະລັງງານ, ກໍລວມທັງການສື່ສານ, ດ່ານພາສີ, ກວດກາແລະກັກກັນພະຍາດແລະອື່ນໆ, ຍັງໄດ້ລວມທັງແຜນການຮ່ວມມືແລະໂຄງການຮູບປະທຳໃນຫຼາຍຂົງເຂດ, ເຊັ່ນ: ເສດຖະກິດການຄ້າ, ອຸດສາຫະກຳ, ການຄ້າເອເລັກໂຕຼນິກ, ທະເລ, ແລະເສດຖະກິດສີຂຽວເປັນຕົ້ນ. ຈີນແລະປະເທດທີ່ກ່ຽວຂ້ອງຈະເຊັນສັນຍາຮ່ວມມືກ່ຽວກັບຂະບວນລົດໄຟຈີນ-ເອີລົບ, ເພື່ອຊຸກຍູ້ໂຄງການຮ່ວມມືເຫຼົ່ານີ້ໄດ້ປາກົດຜົນເປັນຈິງແລະເກີດປະສິດທິຜົນໂດຍໄວ.
ທ່ານ ສີຈິ້ນຜິງ ຊີ້ໃຫ້ເຫັນວ່າ, ຈີນຈະເພີ່ມທະວີການສະໜັບສະໜູນ "ໜຶ່ງແລວທາງໜຶ່ງເສັ້ນທາງ" ໃນດ້ານເງິນທຶນ, ໂດຍຈະເພີ່ມເງິນທຶນ 100 ຕື້ຢວນເຂົ້າໃນກອງທຶນເສັ້ນທາງສາຍໄໝ, ຈະສົ່ງເສີມໃຫ້ສະຖາບັນການເງິນດຳເນີນທຸລະກິດກອງທຶນທີ່ເປັນເງິນຢວນຈີນຢູ່ຕ່າງປະເທດ ເຊິ່ງມີຈຳນວນຄາດວ່າປະມານ 300 ຕື້ຢວນ. ທະນາຄານພັດທະນາແຫ່ງຊາດຈີນ ແລະທະນາຄານຂາເຂົ້າຂາອອກ ຈະປ່ອຍເງິນກູ້ສະເພາະ 250 ຕື້ຢວນ ແລະ 130 ຕື້ຢວນ ໃຊ້ເຂົ້າໃນການສະໜັບສະໜູນການສ້າງພື້ນຖານໂຄງລ່າງ, ການຮ່ວມມືດ້ານຄວາມສາມາດການຜະລິດ ແລະການທະນາຄານຂອງ "ໜຶ່ງແລວທາງໜຶ່ງເສັ້ນທາງ". ຈີນຈະຕັ້ງໜ້າພັດທະນາການພົວພັນຄູ່ຮ່ວມເສດຖະກິດການຄ້າທີ່ຕ່າງຝ່າຍຕ່າງໄດ້ຮັບຜົນປະໂຫຍດກັບປະເທດທີ່ເຂົ້າຮ່ວມການສ້າງ "ໜຶ່ງແລວທາງໜຶ່ງເສັ້ນທາງ", ໃນໄລຍະຈັດກອງປະຊຸມເວທີປຶກສາຫາລືຄັ້ງນີ້ ຈະເຊັນສັນຍາການຮ່ວມມືທາງເສດຖະກິດການຄ້າກັບ 30 ກວ່າປະເທດ ແລະຈະເຈລະຈາສັນຍາການຄ້າເສລີກັບປະເທດທີ່ກ່ຽວຂ້ອງ. ຂະນະດຽວກັນ, ຈີນຍັງຈະງານວາງສະແດງຂາເຂົ້າສາກົນຈີນແຕ່ປີ 2018 ເປັນຕົ້ນໄປ.
ທ່ານ ສີຈິ້ນຜິງ ຊີ້ໃຫ້ເຫັນວ່າ, ຈີນຍິນດີເພີ່ມທະວີການຮ່ວມມືດ້ານການປະດິດສ້າງໃໝ່, ເລີ່ມດຳເນີນແຜນການດຳເນີນງານປະດິດສ້າງວິທະຍາສາດເຕັກນິກໃໝ່ "ໜຶ່ງແລວທາງໜຶ່ງເສັ້ນທາງ", ດຳເນີນການເຄື່ອນໄຫວ 4 ຂໍ້ ຄື: ການແລກປ່ຽນດ້ານວິທະຍາສາດເຕັກນິກແລະວັດທະນະທຳ, ການຮ່ວມກັນສ້າງທ້ອງທົດລອງປະສົມ, ການຮ່ວມມືເຂດວິທະຍາສາດເຕັກນິກ ແລະການໂອນເຕັກນິກ, ໃນ 5 ປີຂ້າງໜ້າ, ຈະເຊື້ອເຊີນນັກວິທະຍາສາດໜຸ່ມ 2500 ເທື່ອຄົນມາເຮັດວຽກງານຄົ້ນຄວ້າວິທະຍາສາດໄລຍະສັ້ນຢູ່ຈີນ, ຈະຍົກລະດັບໃຫ້ຜູ້ປະຕິບັດງານວິທະຍາສາດເຕັກນິກແລະການຄຸ້ມຄອງ 5000 ເທື່ອຄົນ, ເລີ່ມເຮັດໃຫ້ຫ້ອງທົດລອງປະສົມ 50 ແຫ່ງປະຕິບັດງານໄດ້; ໃນ 3 ປີຂ້າງໜ້າ, ຈີນຈະຊ່ວຍເຫຼືອປະເທດທີ່ພວມພັດທະນາ ແລະອົງການຈັດຕັ້ງສາກົນທີ່ເຂົ້າຮ່ວມການສ້າງ "ໜຶ່ງແລວທາງໜຶ່ງເສັ້ນທາງ" ນັ້ນໃນມູນຄ່າ 60 ຕື້ຢວນ, ຊ່ວຍເຫຼືອທັນຍາຫານສຸກເສິນເປັນມູນຄ່າ 2 ຕື້ໂດລາສະຫະລັດໃຫ້ປະເທດພວມພັດທະນາທີ່ຢູ່ລຽບຕາມ "ໜຶ່ງແລວທາງໜຶ່ງເສັ້ນທາງ", ເພີ່ມທຶນ 1 ຕື້ໂດລາສະຫະລັດເຂົ້າໃນກອງທຶນຊ່ວຍເຫຼືອການຮ່ວມມືໃຕ້ໆ, ປະຕິບັດ 100 ໂຄງການ "ເຮືອນຜາສຸກ", 100 ໂຄງການ "ຊ່ວຍເຫຼືອຜູ້ທຸກຍາກ", 100 ໂຄງການ "ຊ່ວຍເຫຼືອປິ່ນປົວຟື້ນຟູສຸຂະພາບ" ແລະໂຄງການອື່ນໆ, ຈະຊ່ວຍເຫຼືອອົງການຈັດຕັ້ງສາກົນທີ່ກ່ຽວຂ້ອງເປັນມູນຄ່າ 1 ຕື້ໂດລາສະຫະລັດເພື່ອຈັດຕັ້ງປະຕິບັດໂຄງການຮ່ວມມືທີ່ສ້າງຜົນປະໂຫຍດໃຫ້ແກ່ປະເທດຢູ່ລຽບຕາມ "ໜຶ່ງແລວທາງໜຶ່ງເສັ້ນທາງ". ຂະນະດຽວກັນ, ຈີນຍັງຈະສ້າງກົນໄກຕິດຕໍ່ພົວພັນພາຍຫຼັງກອງປະຊຸມສຸດຍອດເວທີປຶກສາຫາລືການຮ່ວມມືສາກົນ "ໜຶ່ງແລວທາງໜຶ່ງເສັ້ນທາງ", ຈະສ້າງຕັ້ງສູນຄົ້ນຄວ້າການພັດທະນາເສດຖະກິດການເງິນ "ໜຶ່ງແລວທາງໜຶ່ງເສັ້ນທາງ", ສູນສົ່ງເສີມການກໍ່ສ້າງ "ໜຶ່ງແລວທາງໜຶ່ງເສັ້ນທາງ", ຈະຮ່ວມກັບທະນາຄານພັດທະນາຫຼາຍຝ່າຍ ເພື່ອສ້າງຕັ້ງສູນການຮ່ວມມືການພັດທະນາແລະການລະດົມທຶນຫຼາຍຝ່າຍ, ຈະຮ່ວມກັບອົງການກອງທຶນເງິນຕາສາກົນເພື່ອສ້າງຕັ້ງສູນການກໍ່ສ້າງຄວາມສາມາດ, ຈະສ້າງເຄືອຂ່າຍຮ່ວມມືອົງການຈັດຕັ້ງປະຊາຊົນລຽບຕາມ "ໜຶ່ງແລວທາງໜຶ່ງເສັ້ນທາງ". ການສ້າງ "ໜຶ່ງແລວທາງໜຶ່ງເສັ້ນທາງ" ຈະໃຫ້ທຸກຝ່າຍຮ່ວມກັນປຶກສາຫາລື ແລະຮ່ວມກັນແບ່ງປັນໝາກຜົນຂອງການກໍ່ສ້າງ.