ທ່ານ ຈ່າງກ່າວລີ້ ກ່າວວ່າ, ການທຳຄວາມເຂົ້າໃຈກັນດ້ານນະໂຍບາຍ, ການເຊື່ອມຈອດສິ່ງກໍ່ສ້າງ, ຄວາມສະດວກດ້ານການຄ້າ, ການລະດົມເງິນທຶນ ແລະມິດຕະພາບຂອງປະຊາຊົນ ແມ່ນຈຸດສຸມຂອງການສ້າງ "ໜຶ່ງແລວທາງໜຶ່ງເສັ້ນທາງ", ຕ້ອງຖື 5 ອັນດັ່ງກ່າວເປັນເລື່ອງສຳຄັນ, ເຕົ້າໂຮມຄວາມເປັນເອກະພາບກັນດ້ານການຮ່ວມມືຢ່າງກວ້າງຂວາງ, ຍົກລະດັບການຮ່ວມມືໃຫ້ສູງຂຶ້ນຢ່າງຮອບດ້ານ, ສ້າງເວທີການຮ່ວມມືແບບໃໝ່, ເຮັດໃຫ້ການສ້າງ "ໜຶ່ງແລວທາງໜຶ່ງເສັ້ນທາງ" ສ້າງຄວາມຜາສຸກໃຫ້ແກ່ປະເທດແລະປະຊາຊົນຢູ່ລຽບຕາມ "ໜຶ່ງແລວທາງໜຶ່ງເສັ້ນທາງ" ນັ້ນໃຫ້ດີກວ່າເກົ່າ. ເພື່ອເລື່ອງນີ້, ທ່ານໄດ້ມີຂໍ້ສະເໜີ 5 ຂໍ້.
ທ່ານ ຈ່າງກ່າວລີ້ ກ່າວວ່າ, ຕ້ອງເພີ່ມທະວີການທຳຄວາມເຂົ້າໃຈກັນດ້ານນະໂຍບາຍຕື່ມອີກ, ເຮັດໃຫ້ພື້ນຖານດ້ານການເມືອງຂອງການສ້າງ "ໜຶ່ງແລວທາງໜຶ່ງເສັ້ນທາງ" ໝັ້ນຄົງກວ່າເກົ່າຢ່າງບໍ່ຢຸດຢັ້ງ; ຕ້ອງລົງເລິກຄວາມໄວ້ເນື້ອເຊື່ອໃຈດ້ານການເມືອງຕື່ມອີກ, ເຮັດໃຫ້ການໄປມາຢ້ຽມຢາມກັນລະຫວ່າງການນຳຂັ້ນສູງນັ້ນ ສະໜິດແໜ້ນກວ່າເກົ່າ, ເພີ່ມທະວີການເຊື່ອມຈອດຍຸດທະສາດການພັດທະນາ, ຊ່ວຍຊູຍູ້ໜູນກັນດ້ານທ່າແຮງຂອງກັນ, ເຂົ້າຮ່ວມຢ່າງສະເໝີພາບກັນ, ວາງແຜນການພັດທະນາຮ່ວມກັນ, ກຳນົດແຜນການແລະຕາຕະລາງເວລາກ່ຽວກັບຂົງເຂດການຮ່ວມມືຢ່າງຈະແຈ້ງ.
ທ່ານ ຈ່າງກ່າວລີ້ ກ່າວວ່າ, ຕ້ອງເພີ່ມທະວີການເຊື່ອມຈອດພື້ນຖານໂຄງລ່າງຕື່ມອີກ, ປັບປຸງເຄືອຂ່າຍພື້ນຖານໂຄງລ່າງຂອງການສ້າງ "ໜຶ່ງແລວທາງໜຶ່ງເສັ້ນທາງ"ຢ່າງບໍ່ຢຸດຢັ້ງ. ທັງຕ້ອງຊຸກຍູ້ການເຊື່ອມຈອດກັນທາງບົກ, ທາງທະເລ, ທາງອາກາດ ແລະທາງອິນເຕີເນັດ, ທັງຕ້ອງເພີ່ມທະວີການເຊື່ອມຈອດກັນທາງນະໂຍບາຍ, ກະຕິກາ ແລະມາດຖານນຳອີກ. ຖືທາງລົດໄຟ, ທາງຫຼວງ, ການບິນ, ການຂົນສົ່ງທາງນ້ຳ, ການສື່ສານ, ພະລັງໄຟຟ້າ, ເຄືອຂ່າຍທໍ່ສົ່ງນ້ຳມັນເຊື້ອໄຟແລະອາຍແກັສທຳມະຊາດ, ເຄືອຂ່າຍພະລັງງານ ແລະອື່ນໆເປັນຈຸດໜັກ, ຮ່ວມກັນສ້າງລະບົບພື້ນຖານໂຄງລ່າງທີ່ທັນສະໄໝ.
ທ່ານ ຈ່າງກ່າວລີ້ ກ່າວວ່າ, ຕ້ອງເພີ່ມຄວາມສະດວກດ້ານການຄ້າຕື່ມອີກ, ບົ່ມເພາະຕະຫຼາດທີ່ເຕັມໄປດ້ວຍພະລັງຊີວິດຂອງການສ້າງ "ໜຶ່ງແລວທາງໜຶ່ງເສັ້ນທາງ" ຢ່າງບໍ່ຢຸດຢັ້ງ. ໃນປີ 2016 ຜ່ານມາ, ມູນຄ່າການຄ້າລະຫວ່າງຈີນກັບປະເທດຢູ່ລຽບຕາມ "ໜຶ່ງແລວທາງໜຶ່ງເສັ້ນທາງ" ໄດ້ບັນລຸເຖິງ 1070 ຕື້ ໂດລາສະຫະລັດ, ໄດ້ລົງທຶນໂດຍກົງຢູ່ປະເທດລຽບຕາມ "ໜຶ່ງແລວທາງໜຶ່ງເສັ້ນທາງ" ໃນມູນຄ່າ 14 ຕື້ 500 ລ້ານໂດລາສະຫະລັດ; ຕ້ອງຊຸກຍູ້ເສລີພາບແລະຄວາມສະດວກຂອງການຄ້າແລະການລົງທຶນຕື່ມອີກ, ເປີດກວ້າງການເປີດປະຕູເຊິ່ງກັນແລະກັນລະຫວ່າງຕະຫຼາດໃນພາກພື້ນ, ສ້າງເຄືອຂ່າຍການຄ້າເສລີ "ໜຶ່ງແລວທາງໜຶ່ງເສັ້ນທາງ" ເພື່ອຊ່ວຍການເຕີບໂຕທາງເສດຖະກິດຂອງພາກພື້ນກໍຄືຂອງໂລກ.
ທ່ານ ຈ່າງກາວລີ້ ກ່າວວ່າ, ຕ້ອງເພີ່ມທະວີການເຊືອມໂຍງດ້ານເງິນທຶນຕື່ມອີກ, ປັບປຸງລະບົບການລົງທຶນແລະການລະດົມທຶນແບບຫຼາຍເຄົ້າໃນການສ້າງ "ໜຶ່ງແລວທາງໜຶ່ງເສັ້ນທາງ" ໃຫ້ສົມບູນຂຶ້ນເລື້ອຍໆ. ຈະສືບຕໍ່ປະດິດສ້າງຮູບການລົງທຶນແລະລະດົມທຶນແບບສາກົນ, ສ້າງເວທີການທະນາຄານຫຼາຍລະດັບ, ສົ່ງເສີມໃຫ້ສະຖາບັນການເງິນທຸລະກິດສ້າງສາຂາເຊິ່ງກັນແລະກັນ, ສ້າງລະບົບຮັບປະກັນການທະນາຄານທີ່ຍາວນານ, ໝັ້ນຄົງ, ຍືນຍົງ ແລະຄວບຄຸມຄວາມສ່ຽງໄດ້.
ທ່ານ ຈ່າງກາວລີ້ ກ່າວວ່າ, ຕ້ອງເພີ່ມທະວີການເຊື່ອມໂຍງຈິດໃຈຂອງປະຊາຊົນຕື່ມອີກ, ສ້າງຂົວມິດຕະພາບລະຫວ່າງບັນດາປະເທດລຽບຕາມ "ໜຶ່ງແລວທາງໜຶ່ງເສັ້ນທາງ" ຢ່າງບໍ່ຢຸດຢັ້ງ. ໃນສະຕະວັດທີ 21, ພວກຂ້າພະເຈົ້າຄວນສົ່ງເສີມນ້ຳໃຈເສັ້ນທາງສາຍໄໝບູຮານ, ເພີ່ມທະວີການແລກປ່ຽນດ້ານວັດທະນະທຳ, ດຳເນີນການຮ່ວມມືໃນຂົງເຂດການສຶກສາ, ວິທະຍາສາດເຕັກນິກ, ວັດທະນະທຳ , ສື່ມວນຊົນ, ການປິ່ນປົວ, ສາທາລະສະສຸກ, ແລະການໄປມາຫາສູ່ກັນລະຫວ່າງປະຊາຊົນເປັນຕົ້ນ, ຊຸກຍູ້ອະລິຍະທຳຕ່າງໆຖອດຖອນບົດຮຽນນຳກັນ, ປະຊາຊົນບັນດາປະເທດຮັບຮູ້ກັນ, ເຂົ້າໃຈກັນ ແລະຮັກແພງກັນ, ຮ່ວມກັນພັດທະນາການບໍລິການທ່ອງທ່ຽວທີ່ມີສີສັນພິເສດຂອງເສັ້ນທາງສາຍໄໝ; ລິເລີ່ມສົ່ງເສີມຮູບການຜະລິດແລະດຳລົງຊີວິດແບບສີຂຽວ, ກາກບອນຕ່ຳ, ໝູນວຽນແລະຍືນຍົງ: ສ້າງ "ໜຶ່ງແລວທາງໜຶ່ງເສັ້ນທາງ" ໃຫ້ເປັນເສັ້ນທາງສາຍໄໝສີຂຽວ.
ໃນຕອນມ້ວນທ້າຍ, ທ່ານ ຈ່າງກາວລີ້ ກ່າວວ່າ, ໃນ 5 ປີຂ້າງໜ້າ, ຈີນຈະນຳເຂົ້າສິນຄ້າທີ່ມີມູນຄ່າ 8000 ຕື້ໂດລາ, ດຶງດູດການລົງທຶນຈາກຕ່າງປະເທດ 600 ຕື້ໂດລາ, ລົງທຶນຕໍ່ຕ່າງປະເທດ 750 ຕື້ໂດລາ, ຄົນຈີນທີ່ໄປທ່ອງທ່ຽວຢູ່ຕ່າງປະເທດເຖິງ 700 ລ້ານເທື່ອຄົນ. ຈີນຍິນດີຕ້ອນຮັບປະເທດຕ່າງໆໃນໂລກຮ່ວມກັນຊົມໃຊ້ໂອກາດສຳຄັນເນື່ອງຈາກການພັດທະນາຂອງຈີນ. ວຽກງານສ້າງ "ໜຶ່ງແລວທາງໜຶ່ງເສັ້ນທາງ" ຈະໃຫ້ທຸກຝ່າຍປຶກສາຫາລືຮ່ວມກັນ, ໂຄງການກໍ່ສ້າງຈະໃຫ້ທຸກຝ່າຍຮ່ວມກັນກໍ່ສ້າງ, ຜົນການພັດທະນາຈະໃຫ້ທຸກຝ່າຍຮ່ວມກັນຊົມໃຊ້. ທ່ານຫວັງວ່າຜູ້ເຂົ້າຮ່ວກອງປະຊຸມ ຈະປະກອບສ່ວນສະຕິປັນຍາແລະກຳລັງແຮງເຂົ້າໃນການຊຸກຍູ້ສ້າງ "ໜຶ່ງແລວທາງໜຶ່ງເສັ້ນທາງ" ແລະສ້າງປະຊາຄົມຮ່ວມຊະຕາກຳຂອງມວນມະນຸດ.
 |
