ວັນທີ 13 ພຶດສະພານີ້, ຢູ່ຫໍຮັບແຂກເມືອງຕ້ຽວອີທາຍນະຄອນຫຼວງປັກກິ່ງ, ສະຫາຍ ຫວາງຊີຊ່ານ ກຳມະການປະຈຳກົມການເມືອງສູນກາງພັກ, ເລຂາຄະນະກຳມະການກວດກາລະບຽບວິໄນສູນກາງພັກກອມມູນິດຈີນໄດ້ພົບປະກັບສະຫາຍ ບຸນຍັງ ວໍລະຈິດ ເລຂາທິການໃຫຍ່ສູນກາງພັກປະຊາຊົນປະຕິວັດລາວ.
ສະຫາຍ ຫວາງຊີຊ່ານ ໄດ້ສະແດງຄວາມຊົມເຊີຍສະຫາຍ ບຸນຍັງ ວໍລະຈິດ ທີ່ເດີນທາງຢ້ຽມຢາມແລະເຂົ້າຮ່ວມກອງປະຊຸມສຸດຍອດການຮ່ວມມືສາກົນ "ໜຶ່ງແລວທາງໜຶ່ງເສັ້ນທາງ"ຢູ່ຈີນ. ທັງເນັ້ນວ່າ: ອຸດົມການແລະທັດສະນະການເມືອງຂອງສອງພັກຈີນແລະລາວມີການເຊື່ອມໂຍງເຂົ້າກັນ, ເສັ້ນທາງແຫ່ງການພັດທະນາກໍຄ້າຍຄືກັນ,ອະນາຄົດແລະຊະຕາກຳກໍມີສ່ວນພົວພັນກັນ, ການຄຸ້ມຄອງພັກຢ່າງເຂັ້ມງວດແລະຮອບດ້ານເປັນສິ່ງທີ່ສອງພັກໄດ້ສຸມໃສ່ຢ່າງເດັດດ່ຽວແລະຈາກນີ້ຈຶ່ງຫວັງວ່າສອງຝ່າຍຈະລົງເລິກຖອດຖອນບົດຮຽນໃນການສ້າງພັກ,ການບໍລິຫານປະເທດແລະການປະຕິບັດໜ້າທີ່ການເມືອງຮ່ວມກັນໂດຍຜ່ານການສ້າງ"ໜຶ່ງແລວທາງໜຶ່ງເສັ້ນທາງ"ເຊື່ອມຕໍ່ກັບຍຸດທະສາດແຫ່ງການພັດທະນາ,ຍົກລະດັບການຮ່ວມມືຢ່າງແທ້ຈິງ,ຮ່ວມມືສ້າງປະຊາຄົມຊະຕາກຳຈີນ-ລາວໃຫ້ໝັ້ນຄົງຂະໜົງແກ່ນ.
ສະຫາຍ ບຸນຍັງ ກ່າວວ່າ: ລາວຍິນດີຮ່ວມກັບຈີນລົງເລິກການແລກປ່ຽນແລະການຮ່ວມມືໃນຂົງເຂດຕ່າງໆ ເພື່ອຊຸກຍູ້ສາຍພົວພັນລະຫວ່າງພັກ-ລັດຂອງສອງປະເທດໃຫ້ພັດທະນາຢ່າງປອດໃສ,ໝັ້ນທ່ຽງແລະຕໍ່ເນື່ອງ.