ຕອນບ່າຍວັນທີ 14 ພຶດສະພານີ້ ຢູ່ຫໍສະພາປະຊາຊົນແຫ່ງຊາດນະຄອນຫຼວງປັກກິ່ງ, ທ່ານ ຫຼີເຄີ້ສຽງ ນາຍົກລັດຖະມົນຕີຈີນໄດ້ຕ້ອນຮັບການເຂົ້າພົບຂອງທ່ານນາງ ຄຣິສຕີນາ ລາກາດ ຜູ້ອຳນວຍການໃຫຍ່ອົງການກອງທຶນເງິນຕາສາກົນຫຼື IMF ໃນໂອກາດເດີນທາງເຂົ້າຮ່ວມກອງປະຊຸມສຸດຍອດການຮ່ວມມືສາກົນ "ໜຶ່ງແລວທາງໜຶ່ງເສັ້ນທາງ".
ທ່ານ ຫຼີເຄີ້ສຽງ ກ່າວວ່າ: ລັດຖະບານຈີນຈະສືບຕໍ່ປະຕິບັດນະໂຍບາຍເງິນຕາດ້ວຍຄວາມປອດໃສແລະໝັ້ນທ່ຽງ ແລະ ຈີນກໍມີຄວາມສາມາດຮັກສາຄວາມໝັ້ນທ່ຽງຂອງຕະຫຼາດການເງິນຂອງປະເທດໄດ້ທັງຈະສືບຕໍ່ຍຶດໝັ້ນ ການຕອບສະໜອງຄວາມຕ້ອງການຂອງຕະຫຼາດໃຫ້ໄດ້ໂດຍພື້ນຖານ, ສ້າງລະບົບອັດຕາແລກປ່ຽນເງິນຕາທີ່ເໜັງຕີງ,ຮັກສາອັດຕາແລກປ່ຽນເງິນຢວນໃຫ້ຢູ່ໃນລະດັບທີ່ສົມເຫດສົມຜົນແລະມີຄວາມດຸ່ນດ່ຽງໂດຍພື້ນຖານ.
ທ່ານນາງ ລາກາດ ກ່າວວ່າ: ການເຕີບໂຕຂອງເສດຖະກິດຈີນໄດ້ ເຮັດໃຫ້ທົ່ວໂລກມີກຳລັງໃຈ ແລະເປັນການເຕີບໂຕທີ່ສາມາດສະໜັບສະໜູນໃຫ້ແກ່ການຮ່ວມມືທາງເສດຖະກິດໃນສາກົນແລະລະບົບການຄ້າຫຼາຍຝ່າຍໄດ້ຢ່າງແຂງແຮງ. IMF ດີໃຈທີ່ໄດ້ເຫັນພື້ນຖານລະບົບການເງິນຂອງຈີນມີຄວາມໝັ້ນຄົງ, ການຕິດຕາມຄຸ້ມຄອງຢ່າງສຸຂຸມຮອບຄອບກໍມີປະສິດທິຜົນ ເໝາະສົມ ແລະ ຍິນດີຮ່ວມກັບຈີນສືບຕໍ່ເພີ່ມທະວີການຕິດຕໍ່ພົວພັນແລະການຮ່ວມມື.
 |
