ໃນເວລາໃຫ້ສຳພາດຕໍ່ນັກຂ່າວ, ທ່ານສີຈິ້ນຜີງ ປະທານປະເທດຈີນກ່າວວ່າ, ນັບແຕ່ເວທີປຶກສາຫາລືສຸດຍອດການຮ່ວມມືສາກົນ "ໜຶ່ງແລວທາງໜຶ່ງເສັ້ນທາງ"ຈັດຂຶ້ນເປັນຕົ້ນມາ, ເພື່ອນມິດນັກຂ່າວທັງຫຼາຍໄດ້ລາຍງານຂ່າວຢ່າງຫຼວງຫຼາຍ,ບັນທຶກຂະນະຕ່າງໆທີ່ສຳຄັນ, ເຜີຍແຜ່ສຽງຂອງບັນດາປະເທດທີ່ຮ່ວມກັນສ້າງສາ "ໜຶ່ງແລວທາງໜຶ່ງເສັ້ນທາງ", ສະແດງໃຫ້ໂລກເຫັນການພັດທະນາຢ່າງມີຊີວິດຊີວາໃນການສ້າງສາ "ໜຶ່ງແລວທາງໜຶ່ງເສັ້ນທາງ", ຂ້າພະເຈົ້າຂໍຕາງໜ້າລັດຖະບານຈີນແລະຜູ້ຮ່ວມປະຊຸມຈາກປະເທດຕ່າງໆ, ສະແດງຄວາມຂອບໃຈມາຍັງເພື່ອນມິດນັກຂ່າວທັງຫຼາຍ. ມື້ວານນີ້, ພວກຂ້າພະເຈົ້າໄດ້ຈັດພິທີເປີດເວທີປຶກສາຫາລືແລະການພົບປະລະດັບສູງ, ໂດຍຜູ້ນຳປະເທດຈຳນວນໜຶ່ງ, ຜູ້ຮັບຜິດຊອບອົງການຈັດຕັ້ງສາກົນຈຳນວນໜຶ່ງແລະຜູ້ແທນວົງການເຈົ້າໜ້າທີ່ລັດຖະບານ, ອຸດສາຫະກຳແລະວິຊາການຂອງ 100 ກວ່າປະເທດໄດ້ເຂົ້າຮ່ວມ,ເພື່ອຮ່ວມກັນປຶກສາຫາລືການຮ່ວມມືສາກົນໃນການສ້າງສາ "ໜຶ່ງແລວທາງໜຶ່ງເສັ້ນທາງ" ໃນທ່າມກາງບັນຍາກາດທີ່ມີໄມຕີຈິດມິດຕະພາບແລະກົມກຽວກັນ, ໄດ້ປະກອບຄຳຄິດຄຳເຫັນແລະຂໍ້ສະເໜີທີ່ດີຫຼາຍຂໍ້, ເຊິ້ງໄດ້ຮັບໝາກຜົນທີ່ຕັ້ງໜ້າ.
ທ່ານສີຈິ້ນຜີງກ່າວວ່າ, ໃນໄລຍະຈັດເວທີປຶກສາຫາລື, ຈີນແລະຝ່າຍຕ່າງໆທີ່ກ່ຽວຂ້ອງໄດ້ເຊັນສັນຍາຮ່ວມມືຈຳນວນໜຶ່ງ, ມາຮອດປັດຈຸບັນ, ໄດ້ມີ 68 ປະເທດແລະອົງການຈັດຕັ້ງສາກົນທີ່ໄດ້ເຊັນສັນຍາຮ່ວມມືກັບຈີນພາຍໃຕ້ຂອບ "ໜຶ່ງແລວທາງໜຶ່ງເສັ້ນທາງ". ມື້ນີ້,ຜູ້ນຳ 30 ກວ່າປະເທດແລະຜູ້ຮັບຜິດຊອບອົງການກອງທຶນເງິນຕາສາກົນ ໄດ້ຈັດກອງປະຊຸມໂຕະມົນໃນຫົວຂໍ້ "ເພີ່ມທະວີການຮ່ວມມືສາກົນ, ຮ່ວມກັນສ້າງໜຶ່ງແລວທາງໜຶ່ງເສັ້ນທາງ, ບັນລຸການພັດທະນາແບບຕ່າງຝ່າຍຕ່າງມີຜົນປະໂຫຍດ", ໂດຍໄດ້ແລກປ່ຽນຄວາມຄິດຄວາມເຫັນຢ່າງເລິກເຊິ່ງກ່ຽວກັບຫົວຂໍ້ຕ່າງໆ,ເຊັ່ນ: ເພີ່ມທະວີການເຊື່ອມຈອດນະໂຍບາຍແລະຍຸດທະສາດພັດທະນາ, ລົງເລິກສາຍພົວພັນຄູ່ຮ່ວມມື,ຊຸກຍູ້ການເຊື່ອມຈອດກັນ,ຊຸກຍູ້ການແລກປ່ຽນວັດທະນະທຳແລະອື່ນໆ, ແລະໄດ້ບັນລຸຄວາມເຫັນເປັນເອກະພາບກັນຢ່າງກວ້າງຂວາງ, ທັງໄດ້ຮັບຮອງຖະແຫຼງການຮ່ວມ. ນີ້ເປັນງານມະຫະກຳລະດັບສູງຂອງປະຊາຄົມໂລກກ່ຽວກັບການສ້າງ "ໜຶ່ງແລວທາງໜຶ່ງເສັ້ນທາງ". ກອງປະຊຸມໄດ້ສະຫຼຸບຄວາມຄືບໜ້າຂອງການຮ່ວມມື, ໄດ້ເຕົ້າໂຮມຄວາມເຫັນເປັນເອກະພາບກັນຈາກຝ່າຍຕ່າງໆ, ໄດ້ຊີ້ແຈງທິດທາງໃຫ້ແກ່ການຮ່ວມມືສາກົນເພື່ອສ້າງ "ໜຶ່ງແລວທາງໜຶ່ງເສັ້ນທາງ", ໄດ້ກຳນົດຊ່ອງທາງການພັດທະນາແລະແຜນການດຳເນີນງານ。
ທ່ານ ສີຈິ້ນຜິງ ກ່າວວ່າ, ກອງປະຊຸມຄັ້ງນີ້ ໄດ້ສົ່ງສັນຍານທີ່ດີ ຄືທຸກຝ່າຍຮ່ວມກັນຊຸກຍູ້ການຮ່ວມມືສາກົນ"ໜຶ່ງແລວທາງໜຶ່ງເສັ້ນທາງ", ແລະຮ່ວມກັນສ້າງປະຊາຄົມຮ່ວມຊະຕາກຳຂອງມະນຸດ.ໜຶ່ງ, ພວກເຮົາຫວັງຢາກເອົາການພັດທະນາຂອງຕົນ ປະສານສົມທົບກັບການພັດທະນາຮ່ວມກັນຂອງໂລກ,ໄດ້ກຳນົດເປົ້າໝາຍແລະທິດທາງຂອງການຮ່ວມມືສາກົນຂອງການສ້າງ "ໜຶ່ງແລວທາງໜຶ່ງເສັ້ນທາງ".ພວກເຮົາເຫັນວ່າ, ການສ້າງ "ໜຶ່ງແລວທາງໜຶ່ງເສັ້ນທາງ" ໄດ້ເຂົ້າສູ່ໄລຍະໃໝ່ທີ່ຂະຫຍາຍຕົວຢ່າງຮອບດ້ານ,ໄດ້ເພີ່ມທະວີການປະສານງານນະໂຍບາຍຂອງປະເທດຕ່າງໆຢ່າງບໍ່ຢຸດຢັ້ງ, ໄດ້ເລັ່ງລັດປະຕິບັດໂຄງການເສດຖະກິດການຄ້າທີ່ໃຫຍ່ຫຼວງ,ເຄືອຂ່າຍພື້ນຖານໂຄງລ່າງ ພວມເປັນຮູບເປັນຮ່າງຂຶ້ນ, ລະດັບຄວາມສະດວກດ້ານການຄ້າແລະການລົງທຶນໄດ້ຍົກສູງຂຶ້ນຢ່າງບໍ່ຢຸດຢັ້ງ, ການຮ່ວມມືດ້ານອຸດສາຫະກຳແລະການທະນາຄານໄດ້ຮັບຄວາມຄືບໜ້າຢ່າງໜັກແໜ້ນ, ການໄປມາຫາສູ່ກັນລະຫວ່າງປະຊາຊົນບັນດາປະເທດນັບມື້ນັບແໜ້ນແຟ້ນຍິ່ງຂຶ້ນ. ໃນບາດກ້າວຕໍ່ໄປ, ພວກເຮົາຈະສືບຕໍ່ຊຸກຍູ້ການສ້າງ"ໜຶ່ງແລວທາງໜຶ່ງເສັ້ນທາງ" ໃນຂອບເຂດທີ່ກວ້າງກວ່າເກົ່າ ແລະໃນລະດັບທີ່ສູງກວ່າເກົ່າ,ຊອກຫາແຜນການຮ່ວມເພື່ອແກ້ໄຂບັນຫາສິ່ງທ້າທາຍທີ່ໃຫຍ່ຫຼວງທາງເສດຖະກິດຂອງໂລກ.ຫວັງວ່າ ຜ່ານຈາກການສ້າງ "ໜຶ່ງແລວທາງໜຶ່ງເສັ້ນທາງ" ເພື່ອຮ່ວມກັນຂຸດຄົ້ນກຳລັງແຮງໃໝ່ຂອງການເຕີບໂຕທາງເສດຖະກິດ,ສ້າງເວທີໃໝ່ແຫ່ງການພັດທະນາຂອງໂລກ, ຊຸກຍູ້ຄວາມດຸນດ່ຽງຄືນໃໝ່ຂອງເສດຖະກິດໂລກາພິວັດແລະກ້າວໄປສູ່ເປົ້າໝາຍທີ່ສ້າງປະຊາຄົມຮ່ວມຊະຕາກຳຂອງມະນຸດ.
ທ່ານສີຈິ້ນຜີງກ່າວວ່າ, ອັນທີສອງ, ພວກເຮົາຈະສືບທອດຈິດໃຈເສັ້ນທາງສາຍໄໝ, ສຸມກຳລັງເພື່ອການຮ່ວມມືແລະຕ່າງຝ່າຍຕ່າງມີຜົນປະໂຫຍດ.ພວກເຮົາເຫັນວ່າ, ການກໍ່ສ້າງ "ໜຶ່ງແລວທາງໜຶ່ງເສັ້ນທາງ" ແມ່ນເວທີພັດທະນາທີ່ເປີດປະຕູແລະກວມລວມ, ປະເທດຕ່າງໆລ້ວນແຕ່ແມ່ນຜູ້ເຂົ້າຮ່ວມ, ຜູ້ປະກອບສ່ວນແລະຜູ້ໄດ້ຮັບຜົນປະໂຫຍດທີ່ສະເໝີພາບ.ພວກເຮົາຈະສືບຕໍ່ຖື "ປຶກສາຫາລືຮ່ວມກັນ, ການກໍ່ສ້າງຮ່ວມກັນແລະແບ່ງປັນຮ່ວມກັນ" ເປັນຫຼັກການຊີ້ນຳ, ຊຸກຍູ້ໃຫ້ປະເທດຕ່າງໆເພີ່ມທະວີການແລກປ່ຽນນະໂຍບາຍ, ການເຊື່ອມຕໍ່ສິ່ງກໍ່ສ້າງພື້ນຖານ, ການເພີ່ມທະວີຄວາມສະດວກດ້ານການຄ້າ, ການຈໍລະຈອນເງິນຕາແລະຈິດໃຈຂອງປະຊາຊົນເຊື່ອມຈອດກັນ, ພວກເຮົາຫວັງວ່າສືບຕໍ່ຮ່ວມມືໃນຂະນະເປີດປະຕູ່ສູ່ພາຍນອກ, ແລະຕ່າງຝ່າຍຕ່າງມີຜົນປະໂຫຍດໃນການຮ່ວມມື, ບໍ່ຈຳແນກດ້ວຍຮູບຖານຈິດສຳນຶກ, ບໍ່ເຮັດລະບຽບການເມືອງແລະບໍ່ມີການຈັດວາງແບບປັດປ່າຍປະເທດອື່ນ.
ອັນທີສາມ, ພວກເຮົາຈະສືບຕໍ່ເພີ່ມທະວີການປະສານສົມທົບດ້ານນະໂຍບາຍແລະການເຊື່ອມຕໍ່ຍຸດທະສາກພັດທະນາ, ສ້າງພະລັງຮ່ວມທີ່ພັດທະນາຮ່ວມກັນ. ພວກເຮົາຈະປະສານສົມທົບນະໂຍບາຍເສດຖະກິດມະຫາພາກດ້ານການຄ້າ, ການລົງທຶນ, ການທະນາຄານແລະອື່ນໆ, ສ້າງສະພາບແວດລ້ອມທີ່ມີຜົນດີຕໍ່ການພັດທະນາສາກົນ.ພວກເຮົາຈະເຊື່ອມຕໍ່ແຜນການພັດທະນາເຊິ່ງກັນແລະກັນຢ່າງເລິກເຊິ່ງ, ສະໜັບສະໜູນດ້ານນະໂຍບາຍໃຫ້ແກ່ໂຄງການສຳຄັນ. ພວກເຮົາຈະຮ່ວມກັນປົກປັກຮັກສາແລະພັດທະນາເສດຖະກິດໂລກແບບເປີດປະຕູສູ່ພາຍນອກ, ຊຸກຍູ້ການກໍ່ສ້າງເຂດການຄ້າເສລີ, ຊຸກຍູ້ການຄ້າແລະການລົງທຶນໃຫ້ເປັນແບບເສລີ ແລະມີຄວາມສະດວກ. ພວກເຮົາສະໜັບສະໜູນການປະດິດສ້າງໃໝ່ເຊັ່ນ:ການຄ້າເອກເລັກໂຕຣນິກຂ້າມຊາດ, ຕົວເລກໃຫຍ່ແລະຕົວເມືອງທີ່ມີປັນຍາແລະອື່ນໆ. ຮ່ວມກັນອົບຮົມສະພາບການທຸລະກິດໃໝ່, ຂະແໜງການໃໝ່ ແລະຮູບການໃໝ່. ພວກເຮົາຍັງຈະສະໜັບສະໜູນການກໍ່ສ້າງ "ໜຶ່ງແລວທາງໜຶ່ງເສັ້ນທາງ" ເຊື່ອມຕໍ່ກັບແຜນການພັດທະນາທີ່ສະເໜີໂດຍປະເທດທີ່ກ່ຽວຂ້ອງແລະອົງການພາກພື້ນສາກົນ, ສ້າງສະພາບການທີ່ມີທ່າແຮງຊ່ວຍຊູຍູ້ໜຸນກັນແລະພັດທະນາຮ່ວມກັນ。
ໃນເວລາທ່ານສີຈິ້ນຜິງ ປະທານປະເທດຈີນໃຫ້ສຳພາດຕໍ່ນັກຂ່າວຈີນແລະຕ່າງປະເທດ,ທ່ານກ່າວວ່າ: ທີສີ່,ແຜນການຮ່ວມມືຂອງພວກເຮົາໄດ້ກຳນົດຂົງເຂດການຮ່ວມມືທີ່ສຳຄັນແລະເສັ້ນທາງດຳເນີນງານ. ພວກເຮົາຫວັງວ່າຜ່ານການກໍ່ສ້າງ"ໜຶ່ງແລວທາງໜຶ່ງເສັ້ນທາງ"ເຮັດໃຫ້ເສດຖະກິດຂອງປະເທດຕ່າງໆສາມາດເຕີບໂຕແຂງແຮງກວ່າເກົ່າ,ພື້ນຖານໂຄງລ່າງສົມບູນຂຶ້ນກວ່າເກົ່າ,ອຸດສາຫະກຳມີການພັດທະນາຢ່າງມີພະລັງຊີວິດກວ່າເກົ່າ,ການຮ່ວມມືດ້ານການທະນາຄານກ້າວສູ່ລວງເລິກກວ່າເກົ່າ,ການແລກປ່ຽນດ້ານວັດທະນະທຳແໜ້ນແຟ້ນກວ່າເກົ່າ. ພວກເຮົາເຫັນດີສືບຕໍ່ກຳນົດເອົາການເຊື່ອມໂຍງເຂົ້າກັນເປັນຂົງເຂດການຮ່ວມມືທີ່ສຳຄັນ,ສ້າງເຄືອຂ່າຍພື້ນຖານໂຄງລ່າງທີ່ລວມເອົາທາງບົກ ທາງນ້ຳແລະທາງອາກາດ. ພວກເຮົາຍັງຈະເພີ່ມທະວີການເຊື່ອມໂຍງດ້ານມາດຕະຖານ,ຊຸກຍູ້ໃຫ້ລະບົບມາດຖານແລະກົດລະບຽບຂອງບັນດາປະເທດເຂົ້າກັນໄດ້. ພວກເຮົາສະໜັບສະໜູນໃຫ້ຮ່ວມກັນສ້າງເຂດອຸດສາຫະກຳເສດຖະກິດການຄ້າແລະເຂດຮ່ວມມືເສດຖະກິດຂ້າມຊາຍແດນ, ສະໜັບສະໜູນການພັດທະນາອຸດສາຫະກຳປອດມົນລະພິດແລະເຕັກນິກຂໍ້ມູນຂ່າວສານ. ພວກເຮົາເຫັນດີໃຫ້ບຸກເບີກຊ່ອງທາງລະດົມທຶນ,ປະດິດສ້າງຮູບການລະດົມທຶນອັນໃໝ່,ຫຼຸດຕົ້ນທຶນການລະດົມທຶນໃຫ້ຕ່ຳລົງ,ສ້າງລະບົບຮັບປະກັນການທະນາຄານທີ່ໜັກແໜ້ນ ແບບຍືນຍົງແລະຄວບຄຸມຄວາມສ່ຽງໄດ້. ພວກເຮົາສະໜັບສະໜູນການຮ່ວມມືໃນຂົງເຂດການສຶກສາ,ວິທະຍາສາດເຕັກນິກ,ວັດທະນະທຳ,ສາທາລະນະສຸກແລະຂົງເຂດອື່ນໆ, ຮັດແໜ້ນການແລກປ່ຽນໃນຂົງເຂດການທ່ອງທ່ຽວ,ຄັງປັນຍາ,ສື່ມວນຊົນແລະອື່ນໆ, ໃຊ້ມາດຕະການຊຸກຍູ້ໃຫ້ປະຊາຊົນໄປມາຢ່າງສະດວກກວ່າເກົ່າ. ພວກເຮົາຍັງຈະດຳເນີນການຮ່ວມມືໃນຂົງເຂດການພັດທະນາແບບຍືນຍົງ,ການຕ້ານການສໍ້ລາດບັງຫຼວງ ແລະການຫຼຸດຜ່ອນຄວາມທຸກຍາກແລະໄພພິບັດໂດຍອີງຕາມຄວາມປາຖະໜາຂອງປະຊາຊົນປະເທດຕ່າງໆ.
ທ່ານສີຈິ້ນຜີງກ່າວຕໍ່ນັກຂ່າວວ່າ, ຫ້າ, ພວກເຮົາຖືເວທີປຶກສາຫາລືສຸດຍອດເປັນເວທີຊຸກຍູ້ການຮ່ວມມືຕົວຈິງໃຫ້ໄດ້ຮັບຜົນສຳເລັດດ້ານເສດຖະກິດຈຳນວນໜຶ່ງ. ໃນໄລຍະຈັດເວທີປຶກສາຫາລືແລະໄລຍະກ່ອນໜ້ານີ້, ຈີນກັບຫຼາຍປະເທດແລະອົງການຈັດຕັ້ງສາກົນໄດ້ເຊັນເອກະສານຮ່ວມມືແລະສັນຍາຮ່ວມມືອີກຫຼາຍສະບັບກ່ຽວກັບການສ້າງ "ໜຶ່ງແລວທາງໜຶ່ງເສັ້ນທາງ",ເຊິ່ງລວມທັງການຄ້າການລົງທຶນ,ການເຊື່ອມຈອດພື້ນຖານໂຄງລ່າງ,ການຮ່ວມມືຍົກລະດັບຄວາມສາມາດການຜະລິດແລະການທະນາຄານ, ການແລກປ່ຽນວັດນະທະທຳແລະອື່ນໆ, ເຊິ່ງເປັນພາກສ່ວນອັນສຳຄັນຂອງເວທີປຶກສາຫາລືສຸດຍອດ. ຈີນໄດ້ສະເໜີມາດຕະການໃໝ່ຫຼາຍຢ່າງ, ເຊິ່ງລວມທັງ ປະກາດເພີ່ມເງິນທຶນເຂົ້າໃສ່ກອງທຶນເສັ້ນທາງສາຍໄໝເປັນມູນຄ່າ 100
ຕື້ຢວນ,ສົ່ງເສີມໃຫ້ສະຖາບັນການເງິນດຳເນີນການບໍລິການກອງທຶນ ເປັນເງິນຢວນຈີນຢູ່ຕ່າງປະເທດ, ເຊິ່ງຄາດວ່າມີຂະໜາດເຖິງ 300 ຕື້ຢວນ, ທະນາຄານພັດທະນາແຫ່ງຊາດຈີນ, ທະນາຄານຂາເຂົ້າຂາອອກຈີນຕ່າງຈະປ່ອຍເງິນກູ້ 250 ຕື້ຢວນແລະ 130 ຕື້ຢວນໃຫ້ແກ່ການຮ່ວມມື "ໜຶ່ງແລວທາງໜຶ່ງເສັ້ນທາງ", ເລີ່ມແຕ່ປີ 2018 ຈະຈັດງານວາງສະແດງສິນຄ້ານຳເຂົ້າສາກົນຈີນ, ໄດ້ຮັບຄວາມຊົມເຊີຍຈາກຝ່າຍຕ່າງໆທີ່ເຂົ້າຮ່ວມກອງປະຊຸມ. ພວກຂ້າພະເຈົ້າໄດ້ມີບັນຊີລາຍຊື່ໝາກຜົນ 270 ກວ່າລາຍ.ໝາກຜົນເຫຼົ່ານີ້ຈະເປັນສິ່ງຄໍ້າປະກັນທີ່ແຂງແຮງສຳລັບການສ້າງ "ໜຶ່ງແລວທາງໜຶ່ງເສັ້ນທາງ", ເພີ່ມຄວາມໝັ້ນໃຈຂອງບັນດາຝ່າຍໃນການຊຸກຍູ້ການຮ່ວມມື.
ທ່ານສີຈິ້ນຜີງກ່າວວ່າ,ເມື່ອສັງເກດຈາກສະພາບການປຶກສາຫາລືໃນກອງປະຊຸມແລ້ວເຫັນວ່າ, ການເພີ່ມທະວີການຮ່ວມມືສາກົນ,ຊຸກຍູ້ການສ້າງ "ໜຶ່ງແລວທາງໜຶ່ງເສັ້ນທາງ" ແລະຮ່ວມກັນຮັບມືກັບສິ່ງທ້າທາຍສຳລັບເສດຖະກິດໂລກໃນປັດຈຸບັນນັ້ນ ສອດຄ່ອງກັບຜົນປະໂຫຍດຮ່ວມຂອງພວກເຮົາ, ກໍສອດຄ່ອງກັບແຜນການພັດທະນາຍາວໄກຂອງບັນດາປະເທດ. ພວກເຮົາມີເຫດຜົນທີ່ມີຄວາມໝັ້ນໃຈຢ່າງເຕັມປ່ຽມຕໍ່ອະນາຄົດຂອງການສ້າງ
"ໜຶ່ງແລວທາງໜຶ່ງເສັ້ນທາງ". ພ້ອມກັນນັ້ນ, "ໜຶ່ງແລວທາງໜຶ່ງເສັ້ນທາງ"ເປັນໂຄງການຍາວນານ, ຍັງຕ້ອງກ້າວເດີນຕາມເສັ້ນທາງທີ່ຍາວໄກ, ຕ້ອງການຝ່າຍຕ່າງໆຮ່ວມມືກັນ, ພະຍາຍາມພ້ອມກັນ, ຫັນວິໄສທັດໃຫ້ເປັນການກະທຳຮູບປະທຳ, ແລະຮັບຜົນງານທີ່ແທ້ຈິງຢ່າງບໍ່ຢຸດຢັ້ງ. ພວກເຮົາລ້ວນແຕ່ຫວັງວ່າ ຈະສືບຕໍ່ນຳໃຊ້ເວທີປຶກສາຫາລືສຸດຍອດຮ່ວມມືສາກົນ "ໜຶ່ງແລວທາງໜຶ່ງເສັ້ນທາງ"ໃຫ້ເປັນປະໂຫຍດດີ. ຫຼາຍປະເທດສະເໜີວ່າ, ຄວນຈັດເວທີປຶກສາຫາລືສຸດຍອດຮ່ວມມືສາກົນ "ໜຶ່ງແລວທາງໜຶ່ງເສັ້ນທາງ"ໃຫ້ເປັນປະຈຳແລະເປັນໄລຍະຍາວນານ, ກໍລ້ວນແຕ່ຫວັງວ່າ ຈະເພີ່ມທະວີການແລກປ່ຽນແລະເຊື່ອມຈອດນະໂຍບາຍ, ຮ່ວມກັນປຶກສາຫາລືຊ່ອງທາງຮ່ວມມື. ຂ້າພະເຈົ້າໄດ້ປະກາດໃນກອງປະຊຸມສຸດຍອດວ່າ, ປີ2019 ຈີນຈະຈັດເວທີປຶກສາຫາລືສຸດຍອດຮ່ວມມືສາກົນ "ໜຶ່ງແລວທາງໜຶ່ງເສັ້ນທາງ" ຄັ້ງທີ 2.
ຈີນມີສຸພາສິດກ່າວວ່າ "ການບິນຂຶ້ນສູ່ທ້ອງຟ້າຂອງຄຸດບໍ່ແມ່ນອາໄສປີກອັນດຽວທີ່ເບົາໆ, ການແລ່ນຢ່າງວ່ອງໄວຂອງຂອງມ້າ ບໍ່ແມ່ນອາໄສຄວາມແຮງຂອງຂາດຽວ." "ໜຶ່ງແລວທາງໜຶ່ງເສັ້ນທາງ" ເປັນພາລະກິດຮ່ວມຂອງບັນດາປະເທດ. ຂ້າພະເຈົ້າເຊື່ອວ່າ,ພາຍໃຕ້ຄວາມພະຍາຍາມຮ່ວມກັນຂອງບັນດາປະເທດ, "ໜຶ່ງແລວທາງໜຶ່ງເສັ້ນທາງ"ຍ່ອມຈະກາຍເປັນເສັ້ນທາງແຫ່ງສັນຕິພາບ, ເສັ້ນທາງແຫ່ງຄວາມຈະເລີນຮຸ່ງເຮືອງ, ເສັ້ນທາງແຫ່ງການເປີດປະຕູ,ເສັ້ນທາງແຫ່ງການປະດິດສ້າງໃໝ່ ແລະເສັ້ນທາງແຫ່ງຄວາມສິວິໄລ.