ຂປລ. ໃນວັນທີ 12 ພຶດສະພາ 2017 ທີ່ ສໍານັກງານອົງການ ສະຫະປະຊາຊາດ ປະຈຳ ສປປ ລາວ ໄດ້ມີການເຜີຍແຜ່ຜົນສຳຫລວດ ສະພາບເສດຖະກິດ ແລະ ສັງຄົມ ຂອງພາກພື້ນ ອາຊີ-ປາຊີຟິກ ປະຈຳປີ 2017 ໃນຫົວຂໍ້ "ການປົກຄອງ ແລະ ການຄຸ້ມຄອງງົບປະມານ" ໂດຍການເຂົ້າຮ່ວມ ຂອງທ່ານ ບາລາຊູບຣາມານຽມ ມູຣາລີ, ຮອງຜູ້ຕາງໜ້າອົງການ ສະຫະປະຊາຊາດ ເພື່ອການພັດທະນາປະຈຳ ສປປ ລາວ ແລະ ທ່ານ ນາງ ພອນວັນ ອຸທະວົງ, ຫົວໜ້າກົມແຜນການ, ກະຊວງແຜນການ ແລະ ການລົງທຶນ ພ້ອມດ້ວຍຜູ້ຕາງໜ້າ ອົງການຈັດຕັ້ງສາກົນ ແລະ ພາກສ່ວນກ່ຽວຂ້ອງເຂົ້າຮ່ວມ.
ອີງຕາມຜົນສຳຫລວດດັ່ງກ່າວ, ຊີ້ໃຫ້ເຫັນວ່າ: ເຖິງແມ່ນວ່າເສດຖະກິດ ຂອງພາກພື້ນອາຊີ-ປາຊີຟິກ ຈະມີແນວໂນ້ມຂະຫຍາຍຕົວ ໃນທິດທາງບວກຢ່າງກວ້າງຂວາງ ໃນປີ 2017 ແຕ່ກໍຍັງມີຄວາມສ່ຽງຕໍ່ກັບຄວາມບໍ່ແນ່ນອນ ຂອງສະພາບເສດຖະກິດໂລກ ແລະ ລັດທິປົກປ້ອງ ທາງດ້ານການຄ້າ ທີ່ກຳລັງເພີ່ມຂຶ້ນ ເຊິ່ງຫລາຍປະເທດ ກໍາລັງກ້າວເຂົ້າສູ່ປີທີ 2 ຂອງການຈັດຕັ້ງປະຕິບັດ ວາລະ ປີ 2030 ກ່ຽວກັບເປົ້າໝາຍການພັດທະນາ ແບບຍືນຍົງ ແລະ ເສດຖະກິດ ທີ່ກຳລັງພັດທະນາ ຂອງພາກພື້ນ ໄດ້ຖືກຄາດຄະເນວ່າ ຈະເຕີບໂຕຢູ່ທີ່ 5,0% ແລະ 5,1% ໃນປີ 2017 ແລະ 2018 ຕາມລຳດັບ, ເພີ່ມຂຶ້ນຈາກ 4,9% ໃນປີ 2016. ເຊິ່ງອີງໃສ່ຜົນສຳຫລວດ, ການປົກຄອງທີ່ມີຄວາມກ່ຽວຂ້ອງ ໂດຍກົງຕໍ່ກັບອົງປະກອບ ແລະ ປະສິດທິພາບ ຂອງການໃຊ້ຈ່າຍຂອງພາກລັດ, ການປົກຄອງ ທີ່ອ່ອນແອສ່ວນໜຶ່ງ ແມ່ນໃຫ້ເຮັດການເກັບລາຍຮັບຈາກພາສີ ໄດ້ຕໍ່າຢູ່ໃນຫລາຍປະເທດພາກພື້ນ, ຄວາມໂປ່ງໃສ ແລະ ຄວາມຮັບຜິດຊອບໃນການບໍລິຫານລັດ ສາມາດໄດ້ຮັບການປັບປຸງ ແລະ ສ້າງຄວາມເຂັ້ມແຂງໄດ້ ໂດຍການຮັບປະກັນການສ້າງ ແລະ ການເຂົ້າເຖິງຂໍ້ມູນທີ່ສຳຄັນ ໂດຍການພັດທະນາ ຄວາມສາມາດ ການບໍລິຫານລັດ ເພື່ອຕິດຕາມ, ປະເມີນ, ກວດການະໂຍບາຍ ແລະ ການຈັດຕັ້ງປະຕິບັດ ຂອງສະຖາບັນລວມ ເຊິ່ງເປັນສະຖາບັນ ທີ່ຜູ້ໄດ້ຮັບຜົນປະໂຫຍດ ຈາກການບໍລິການຂອງລັດ ສາມາດແລກປ່ຽນຄວາມຄິດເຫັນ ກັບລັດຖະບານ ອາດຈະເປັນເຄື່ອງມື ສໍາລັບການເພີ່ມລາຍຮັບ ຈາກພາສີ ແລະ ເຮັດໃຫ້ການໃຊ້ຈ່າຍ ມີປະສິດທິພາບເພີ່ມຂຶ້ນ.
ນອກຈາກນີ້ ຜົນສຳຫລວດດັ່ງກ່າວ, ຍັງຊີ້ໃຫ້ເຫັນເຖິງການເຕີບໂຕ ທາງດ້ານເສດຖະກິດຂອງ ສປປ ລາວ ຍັງສູງຢູ່ທີ່ 6,9%ໃນປີ 2016 ເຊິ່ງແຮງຂັບເຄື່ອນຕົ້ນຕໍແມ່ນ ການກໍ່ສ້າງໃນຂະແໜງການພະລັງງານ ໄຟຟ້ານ້ຳຕົກ. ພ້ອມດຽວກັນ, ການຄາດຄະເນ ການເຕີບໂຕມີແນວໂນ້ມ ທີ່ຈະຄົງທີ່ ຢູ່ 6,8%-6,9% ໃນປີ 2017 ແລະ 2018, ເຊິ່ງການເພີ່ມຂຶ້ນຂອງກຳໄລ ຈາກຂະແໜງການ ຂຸດຄົ້ນບໍ່ແຮ່ ຈະຊ່ວຍສະໜັບສະໜູນ ລາຍຮັບຂອງລັດຖະບານ. ພ້ອມນີ້, ການຄາດຄະເນ ໃນໄລຍະກາງ ອາດຈະໄດ້ຮັບຜົນປະໂຫຍດ ຈາກຄວາມພະຍາຍາມ ຂອງລັດຖະບານ ໃນການສົ່ງເສີມການລົງທຶນ ຂອງຕ່າງປະເທດ ແລະ ໂຄງການກໍ່ສ້າງທາງລົດໄຟ ລະຫວ່າງ ນະຄອນຫລວງວຽງຈັນ ຫາ ຊາຍແດນຈີນ ທີ່ກຳລັງດຳເນີນ ການກໍ່ສ້າງໃນປັດຈຸບັນ ເຊິ່ງຈະເສີມຂະຫຍາຍ ການເຊື່ອມຕໍ່ລະຫວ່າງຊາຍແດນ.