ຕາມຂ່າວສານຊິນຮວາ: ສື່ມວນຊົນໄທລາຍງານວ່າ, ຕອນຄ່ຳວັນທີ 15 ເດືອນນີ້, ຢູ່ໜ້າປະຕູໂຮງລະຄອນແຫ່ງຊາດບາງກອກໄດ້ເກີດເຫດການລະເບີດຂຶ້ນ ສົ່ງຜົນເຮັດໃຫ້ສອງຄົນຖືກບາດເຈັບເລັກໜ້ອຍ.
ໜັງສືພິມ "ມະຕິຊົນ" ຂອງໄທລາຍງານວ່າ, ເຫດດັ່ງກ່າວເກີດຂຶ້ນໃນເວລາປະມານ 20 ໂມງ 30 ນາທີ ແລະເຮັດໃຫ້ຜູ້ຍິງສອງຄົນບາດເຈັບຢູ່ແຂນ ແລະຖືກນຳສົ່ງໄປປິ່ນປົວຢູ່ໂຮງໝໍແລ້ວ. ເຈົ້າໜ້າທີ່ຕຳຫຼວດໄດ້ປິດຈຸດເກີດເຫດ ແລະພວມສືບສວນສອບສວນຮ່ວມກັບຊ່ຽວຊານທຳລາຍລະເບີດ ເພື່ອສັນນະສູດລະເບີດ. ຂ່າວແຈ້ງຕື່ມວ່າ, ກ່ອນໜ້ານີ້ມີຄົນຂີ່ລົດຈັກແລ້ວເອົາເຄື່ອງທີ່ຄ້າຍຄືກັບລະເບີດໂຍນໃສ່ຕົ້ນໄມ້ຢູ່ໜ້າປະຕູໂຮງລະຄອນດັ່ງກ່າວ.
ໂຮງລະຄອນແຫ່ງຊາດຕັ້ງຢູ່ໃກ້ສະໜາມຫຼວງບາງກອກ ແລະເຄີຍມີເຫດການລະເບີດເກີດຂຶ້ນເທື່ອໜຶ່ງຫ່າງຈາກສະໜາມຫຼວງ 1 ກິໂລແມັດ ແລະເຮັດໃຫ້ພະນັກງານອະນາໄມສອງຄົນບາດເຈັບເລັກໜ້ອຍ.