ທ່ານນາງຮວາຊຸນຢິງ ໂຄສົກກະຊວງການຕ່າງປະເທດຈີນຖະແຫຼງໃນວັນທີ 16 ພຶດສະພານີ້ວ່າ: ກອງປະຊຸມກົນໄກປຶກສາຫາລືບັນຫາທະເລຈີນໃຕ້ລະຫວ່າງຈີນ-ຟີລິບປິນຄັ້ງທຳອິດຈະຈັດຂຶ້ນຢູ່ເມືອງກຸ້ຍຢາງແຂວງກຸ້ຍໂຈ່ວ ສປ ຈີນໃນວັນທີ 19 ພຶດສະພານີ້ ໂດຍທ່ານຫຼິວເຈີ້ນມິນ ຮອງລັດຖະມົນຕີກະຊວງການຕ່າງປະເທດຈີນແລະທ່ານໂຈເຊໂຮມານາ ເອກອັກຄະລັດຖະທູດຟີລິບປິນປະຈຳຈີນຈະນຳພາຄະນະຜູ້ແທນປະເທດຕົນເຂົ້າຮ່ວມ.
ທ່ານນາງຮວາຊຸນຢິງຢືນຢັນວ່າ ຈີນມີຄວາມຫວັງຢ່າງຍິ່ງແລະກໍເຊື່ອໝັ້ນວ່າສອງປະເທດຈະເປັນເອກະພາບກັນຫຼັງປຶກສາຫາລືກັນ,ເພີ່ມຄວາມໄວ້ເນື້ອເຊື່ອໃຈກັນແລະແກ້ໄຂຄວາມລະແວງສົງໄສ, ຄວບຄຸມຄວາມຂັດແຍ້ງໃຫ້ດີທັງຊຸກຍູ້ການຮ່ວມມືຕົວຈິງທາງທະເລເພື່ອສ້າງເງື່ອນໄຂໃຫ້ແກ່ການແກ້ໄຂຂໍ້ຂັດແຍ້ງທີ່ກ່ຽວຂ້ອງປະສົບຜົນສຳເລັດຫຼາຍທີ່ສຸດ ທັງສ້າງບັນຍາກາດທີ່ດີເພື່ອເຮັດໃຫ້ການພົວພັນລະຫວ່າງສອງຝ່າຍຂະຫຍາຍຕົວຢ່າງປອດໃສແລະໝັ້ນທ່ຽງແລະເຮັດໃຫ້ການຮ່ວມມືຕົວຈິງໃນຂົງເຂດຕ່າງໆມີຄວາມຄືບໜ້າເປັນຢ່າງດີ.
ທ່ານນາງຮວ້າຊຸນຢິງຢືນຢັນຕື່ມວ່າ ກອງປະຊຸມເຈົ້າໜ້າທີ່ອາວຸໂສຈີນ-ອາຊຽນເພື່ອຈັດຕັ້ງປະຕິບັດຖະແຫຼງການວ່າດ້ວຍການປະພຶດຂອງບັນດາຝ່າຍຢູ່ທະເລຈີນໃຕ້ຄັ້ງທີ 14, ກອງປະຊຸມປຶກສາຫາລືລະຫວ່າງເຈົ້າໜ້າທີ່ອາວຸໂສຈີນ-ອາຊຽນຄັ້ງທີ 23 ແລະກອງປະຊຸມທີ່ກ່ຽວຂ້ອງອື່ນໆກໍຈະຈັດຂຶ້ນຢູ່ເມືອງກຸ້ຍຢາງໃນກາງເດືອນພຶດສະພານີ້ເຊັ່ນກັນ.