ທາງລົດໄຟ ໂພນໂຮງ-ນະຄອນຫລວງ ຈະໄດ້ຮັບການ ສະໜອງນໍ້າມັນຈາກ ເອັນທີພີ
2017-05-17 10:21:05 cri
ຂປລ. ໂຄງການກໍ່ສ້າງທາງລົດໄຟ ລາວ-ຈີນ ໄລຍະທີ 6 ແຕ່ໂພນໂຮງ ຫາ ນະຄອນຫລວງ ວຽງຈັນ ຈະໄດ້ຮັບການສະໜອງນໍ້າມັນ ໂດຍບໍລິສັດເອັນທີພີ ການຄ້ານໍ້າມັນເຊື້ອໄຟມະຫາຊົນ ໂດຍໂຄງການນີ້ ມີຄວາມຕ້ອງການນໍ້າມັນ ປະມານ 14,4 ລ້ານລິດ ຫລື ປະມານ 2,88 ລ້ານລິດຕໍ່ປີ. ພິທີ ເຊັນສັນຍາສະໜອງນໍ້າມັນ ໄດ້ມີຂຶ້ນໃນວັນທີ 12 ພຶດສະພາ 2017 ທີ່ນະຄອນຫລວງວຽງຈັນ ລະ ຫວ່າງ ທ່ານ ຈິນດາສັກ ຍົດໝັ້ນຄົງ, ຜູ້ອໍານວຍການໃຫຍ່ ບໍລິສັດເອັນທີພີ ການຄ້ານໍ້າມັນເຊື້ອໄຟ ມະຫາຊົນ ກັບທ່ານ ເຮີຫົງຊົງ ຫົວຫນ້າຊີ້ນໍາໂຄງການ ບໍລິສັດ ກໍ່ສ້າງທາງລົດໄຟເລກ 2 ສປ ຈີນ ໂດຍການເຂົ້າຮ່ວມ ເປັນສັກຂີພິຍານຂອງ ທ່ານ ບົວສອນ ບຸບຜາວັນ ຫົວໜ້າສະຖາບັນຄົ້ນຄວ້າ ເສດຖະກິດແຫ່ງຊາດ, ຮອງຫົວໜ້າທີມງານ ເສດຖະກິດຂອງລັດຖະບານ, ພ້ອມດ້ວຍແຂກ ເຂົ້າຮ່ວມ.
ທ່ານ ເຫລື່ອມ ຍົງວົງສິດທິ, ຜູ້ບໍລິຫານບໍລິສັດ ເອັນທີພີ ການຄ້ານໍ້າມັນເຊື້ອໄຟມະຫາຊົນ ກ່າວວ່າ: ຄວາມຕ້ອງການ ດ້ານນໍ້າມັນເຊື້ອໄຟ ຕະຫລອດໄລຍະ 5 ປິ ຂອງການກໍ່ສ້າງທາງລົດໄຟ ລາວ-ຈີນ ແຕ່ ບໍ່ເຕັນ ຫາ ນະຄອນຫລວງວຽງຈັນ ປະມານ 250 ລ້ານລິດ ຫລື ສະເລ່ຍ ປີຫນຶ່ງປະມານ 50 ລ້ານລິດ. ໃນການສະໜອງນໍ້າມັນເຊື້ອໄຟ ໃຫ້ໂຄງການສ້າງທາງລົດໄຟ ລາວ-ຈີນ ໃນໄລຍະທີ 6 ນັ້ນ ກໍເປັນເໝືອນການຕອບສະໜອງນໍ້າມັນ ໃຫ້ໂຄງການກໍ່ສ້າງເຂື່ອນຕ່າງໆ ທີ່ພວກເຮົາໄດ້ເຊັນສັນຍາແລ້ວນັ້ນ ຄືບໍລິສັດ ຕ້ອງໄດ້ສະໜອງແທ່ງນໍ້າມັນພ້ອມຫົວຈ່າຍ ຈຳນວນທີ່ຈຳເປັນ ໃນ 4 ຈຸດ ແຕ່ໂພນໂຮງ ຫາ ນະຄອນຫລວງວຽງຈັນ ເພື່ອຮັບປະກັນ ໃຫ້ການກໍ່ສ້າງທາງລົດໄຟ ມີນ້ຳມັນພຽງພໍ ໃນການປະຕິບັດໜ້າຂອງຕົນ ໃຫ້ມີຜົນສຳເລັດ.
ທ່ານ ເຮີ ຫົງຊົງ, ຫົວຫນ້າຊີ້ນໍາໂຄງການ ບໍລິສັດກໍ່ສ້າງທາງລົດໄຟ ເລກ 2 ສປ ຈີນ ກ່າວວ່າ: ຍ້ອນບໍລິສັດ ເອັນທີພີ ການຄ້ານໍ້າມັນເຊື້ອໄຟມະຫາຊົນ ມີເງື່ອນໄຂສົມບູນ ແລະ ມີຄວາມສາມາດສະໜອງນໍ້າມັນເຊື້ອໄຟ ຕາມທີ່ຕ້ອງການໄດ້ ພວກເຮົາຈຶ່ງເລືອກເອົາບໍລິສັດນີ້ ເປັນຜູ້ສະໜອງນໍ້າມັນໃຫ້. ຫວັງວ່າ ບໍລິສັດເອັນທີພີ ການຄ້ານໍ້າມັນເຊື້ອໄຟມະຫາຊົນ ຈະປະຕິບັດຕາມຂໍ້ກຳນົດຂອງສັນຍາຢ່າງເຂັ້ມງວດ ທັງສະໜອງການບໍລິການ ທີ່ມີຄຸນນະພາບດີກວ່າໝູ່ ຂອງການກໍ່ສ້າງທາງລົດໄຟ ລາວ-ຈີນ. ຂໍໃຫ້ຄຳໝັ້ນສັນຍາວ່າ ອີງຕາມມາດຕະການ ທາງດ້ານເຕັກນິກ ທາງດ້ານການອອກແບບ。 ພ້ອມທັງ ໃຫ້ຄຳໝັ້ນສັນຍາ ຈະເຮັດໃຫ້ເປັນໂຄງການ ທີ່ມີຄວາມປອດໄພທີ່ສຸດ ມີຄຸນນະພາບ ແລະ ປະສິດທິຜົນສູງ ເປັນໂຄງການທີ່ມີຜົນປະໂຫຍດ ຕໍ່ປະຊາຊົນ.