ຕາມຂ່າວສານຊິນຮວາ: ອົງການຮ່ວມມືເສດຖະກິດພາກພື້ນອາຊີປາຊີຟິກ ຫຼື ອາເປັກ ໄດ້ເຜີຍແຜ່ບົດລາຍງານຂອງຕົນຢູ່ນະຄອນຫຼວງຮ່າໂນ້ຍໃນວັນທີ 17 ເດືອນນີ້ໂດຍຄາດຄະເນວ່າ, ອັດຕາການເຕີບໂຕທາງເສດຖະກິດໃນປີ 2017 ແລະປີ 2018 ຂອງສະມາຊິກຈະຢູ່ໃນລະດັບ 3,8% ເຊິ່ງຖືວ່າສູງກວ່າອັດຕາການເຕີບໂຕຂອງເສດຖະກິດໂລກ.
ບົດລາຍງານຊີ້ອອກວ່າ, ຈາກນະໂຍບາຍເສດຖະກິດທີ່ມີຄວາມຈະແຈ້ງ, ໂປ່ງໃສ ແລະຕໍ່ເນື່ອງ ຈະສົ່ງຜົນສະທ້ອນເຖິງຂັ້ນຕັດສິນຕໍ່ຂະໜາດແລະທ່ວງທ່າການເຕີບໂຕຂອງເສດຖະກິດໃນໄລຍະສັ້ນ.
ທັງນີ້ ປີ 2016, ອັດຕາການເຕີບໂຕເສດຖະກິດຂອງສະມາຊິກອາເປັກຢູ່ໃນລະດັບ 3,5% ເຊິ່ງຕ່ຳກວ່າປີ 2015 ທີ່ບັນລຸເຖິງ 3,6%. ບົດລາຍງານຍັງຄາດຄະເນວ່າ, ອັດຕາການເຕີບໂຕເສດຖະກິດຂອງສະມາຊິກອົງການອາເປັກໃນປີ 2019 ຈະບັນລຸເຖິງ 3,7% ແລະເທົ່າກັບຈັງຫວະເຕີບໂຕຂອງເສດຖະກິດໂລກ.
ປັດຈຸບັນ, ປະຊາກອນຂອງສະມາຊິກອາເປັກມີເຖິງ 3 ຕື້ຄົນ, ຂະນະທີ່ຍອດມູນຄ່າການຄ້າກວມກວ່າເຄິ່ງໜຶ່ງຂອງໂລກ ແລະບໍລິມາດເສດຖະກິດກໍກວມ 60% ຂອງໂລກ.
 |
