ປຶກສາຫາລືການລົງທຶນແລະການຄ້າຂ້າມຊາດໄທຢູ່ບາງກອກ

ການປຶກສາຫາລືການລົງທຶນແລະການຄ້າຂ້າມຊາດໄທໄດ້ຈັດຂຶ້ນຢູ່ນະຄອນຫຼວງບາງກອກປະເທດໄທໃນວັນທີ 18 ພຶດສະພານີ້ໂດຍຜູ້ຕາງໜ້າຈາກ 300 ກວ່າວິສາຫະກິດຈີນແລະໄທເຂົ້າຮ່ວມ.

ທ່ານສົມຄິດຈາຕຸສີພິທັກ ຮອງນາຍົກລັດຖະມົນຕີໄທກ່າວວ່າ: "ໜຶ່ງແລວທາງໜຶ່ງເສັ້ນທາງ"ບໍ່ພຽງແຕ່ເປັນເສັ້ນທາງເສດຖະກິດທີ່ເຊື່ອມຕໍ່ບັນດາປະເທດເທົ່ານັ້ນ, ແຕ່ຍັງເປັນເສັ້ນທາງເຊື່ອມຈອດລະຫວ່າງປະຊາຊົນກັບປະຊາຊົນ ເຊິ່ງຈະນຳເອົາຜົນປະໂຫຍດມາໃຫ້ທົ່ວອາຊີກໍຄືທົ່ວໂລກ ແລະໄທຫວັງ ຖືເອົາຍຸດທະສາດພັດທະນາແລວທາງເສດຖະກິດພາກຕາເວັນອອກເຊື່ອມຕໍ່ກັບຂໍ້ລິເລີ່ມ"ໜຶ່ງແລວທາງໜຶ່ງເສັ້ນທາງ" ແລະການສ້າງແລວທາງເສດຖະກິດນີ້ຍ່ອມຈະນຳເອົາໂອກາດຫຼວງຫຼາຍໃຫ້ແກ່ວິສາຫະກິດໄທແລະຈີນ ແລະຍິນດີຕ້ອນຮັບວິສາຫະກິດຈີນເຂົ້າມາລົງທຶນຢູ່ໄທເພື່ອສົ່ງເສີມການຮ່ວມມືຍາວນານລະຫວ່າງສອງປະເທດ.

ທ່ານຫຼິວສຽງ ຮອງຜູ້ວ່າການທະນາຄານຈີນຢືນຢັນວ່າ ປັດຈຸບັນ, ຈີນມີວິສາຫະກິດຂະໜາດກາງແລະນ້ອຍຫຼາຍກວ່າ 50 ລ້ານຫົວໜ່ວຍ ເຊິ່ງໄດ້ປະກອບສ່ວນເຂົ້າໃນການຍົກGDP ທົ່ວປະເທດກວມ 60% ແລະສ້າງວຽກເຮັດງານທຳໃນຕົວເມືອງ 80%. ຂະນະທີ່ໄທມີວິສາຫະກິດຂະໜາດກາງແລະນ້ອຍເກືອບ 3 ລ້ານຫົວໜ່ວຍ ເຊິ່ງສາມາດສ້າງວຽກເຮັດງານທຳໄດ້ເຖິງ 70% ເຊັ່ນກັນ. ຈາກນີ້, ທັງວິສາຫະກິດຂະໜາດກາງແລະນ້ອຍຂອງສອງປະເທດມີຄວາມຈຸນເຈືອກັນຫຼາຍ ຈິ່ງເປັນທ່າແຮງບົ່ມຊ້ອນແລະພື້ນຖານໃນການຮ່ວມມື. ທະນາຄານຈີນຍິນດີເປັນຂົວຕໍ່ໃຫ້ແກ່ວິສາຫະກິດຂະໜາດກາງແລະນ້ອຍໃນທົ່ວໂລກເພື່ອສົ່ງເສີມການຮ່ວມມືຂ້າມຊາດ.

ໃນການປຶກສາຫາລືດັ່ງກ່າວ, ທະນາຄານຈີນໄດ້ເຊັນສັນຍາກັບສະມາຄົມສົ່ງເສີມການລົງທຶນໄທ,ສະພາການຄ້າຊາວຈີນຕ່າງດ້າວຂອງໄທແລະອົງການອື່ນໆ.ນອກນີ້, ຜູ້ຕາງໜ້າວິສາຫະກິດຈີນ-ໄທທີ່ຮ່ວມປະຊຸມກໍໄດ້ຈັດການປຶກສາຫາລືກັນ.