ເພື່ອຈັດຕັ້ງປະຕິບັດຕາມຈິດໃຈວ່າດ້ວຍການເຈລະຈາຢ່າງມີໄມຕີຈິດມິດຕະພາບທີ່ທ່ານໂຣດຣີໂກ ດູເຕີເຕ ປະທານາທິບໍດີຟີລິບປິນບັນລຸຮ່ວມກັບທ່ານສີຈິ້ນຜິງ ປະທານປະເທດຈີນໂອກາດທ່ານດູເຕີເຕຢ້ຽມຢາມຈີນເມື່ອເດືອນຕຸລາ 2016, ສອງຝ່າຍຈີນ-ຟີລີບປິນໄດ້ຕົກລົງຈັດກອງປະຊຸມກົນໄກປຶກສາຫາລືບັນຫາທະເລຈີນໃຕ້ລະຫວ່າງຈີນ-ຟີລິບປິນເທື່ອທຳອິດໃນວັນທີ 19 ພຶດສະພານີ້ຢູ່ເມືອງກຸ້ຍຢາງແຂວງກຸ້ຍໂຈ່ວ ສປ ຈີນໂດຍທ່ານຫຼິ້ວເຈີ້ນມິນ ຮອງລັດຖະມົນຕີກະຊວງການຕ່າງປະເທດຈີນແລະທ່ານໂຣມານາ ເອກອັກຄະລັດຖະທູດຟີລິບປິນປະຈຳຈີນຕ່າງກໍໄດ້ນຳພາຄະນະຜູ້ແທນຂອງປະເທດຕົນເຂົ້າຮ່ວມ. ສອງຝ່າຍໄດ້ລົງເລິກແລກປ່ຽນຄວາມຄິດຄວາມເຫັນກ່ຽວກັບບັນຫາທະເລຈີນໃຕ້ຢ່າງກົງໄປກົງມາຕາມຈິດໃຈມິດຕະພາບໂດຍກ່າວຢ້ຳຈະສຸມໃສ່ການຮ່ວມມືທັງຄົ້ນຄວ້າວິທີເພື່ອເພີ່ມຄວາມໄວ້ເນື້ອເຊື່ອໃຈກັນແລະຄວາມໝັ້ນໃຈລະຫວ່າງສອງຝ່າຍ.
ຕາມຖະແຫຼງການຮ່ວມຂອງສາທາລະນະລັດປະຊາຊົນຈີນ-ສາທາລະນະລັດຟີລິບປິນເມື່ອເດືອນຕຸລາ 2016 ຜ່ານມາ, ສອງຝ່າຍເຫັນດີສືບຕໍ່ຫາລືມາດຕະການສ້າງຄວາມໄວ້ເນື້ອເຊື່ອໃຈກັນ, ຍົກສູງລະດັບຄວາມໄວ້ເນື້ອເຊື່ອໃຈກັນແລະຄວາມໝັ້ນໃຈ ທັງໃຫ້ຄຳໝັ້ສັນຍາວ່າ: ຮັກສາຄວາມອົດກັ້ນໃນການໃຊ້ການເຄື່ອນໄຫວຢູ່ທະເລຈີນໃຕ້ເພື່ອຫຼີກເວັ້ນບໍ່ໃຫ້ຂໍ້ຂັດແຍ້ງສັບສົນຂຶ້ນແລະຂະຫຍາຍກວ້າງອອກທັງກະທົບເຖິງສັນຕິພາບແລະສະເຖຍລະພາບ. ສອງຝ່າຍເຫັນດີຄົ້ນຄວ້າການຮ່ວມມືໃນຂົງເຂດອື່ນໆ.
ກອງປະຊຸມກົນໄກປຶກສາຫາລືບັນຫາທະເລຈີນໃຕ້ລະຫວ່າງຈີນ-ຟີລິບປິນເທື່ອທີ 2ຈະຈັດຂຶ້ນຢູ່ຟີລິບປິນໃນ6ເດືອນທ້າຍປີ 2017 ນີ້, ສ່ວນເວລາແລະສະຖານທີ່ຈັດກອງປະຊຸມຈະໃຫ້ສອງຝ່າຍຕົກລົງກັນຜ່ານຊ່ອງທາງການທູດ.
