ວັນທີ 21 ພຶດສະພານີ້, ທ່ານ ມູນເຈອິນ ປະທານາທິບໍດີ ສ.ເກົາຫຼີ ໄດ້ສະເໜີລາຍຊື່ແລະແຕ່ງຕັ້ງເຈົ້າໜ້າທີ່ລະດັບລັດຖະມົນຕີຂອງລັດຖະບານຊຸດໃໝ່ຫຼາຍທ່ານ ເຊິ່ງໜຶ່ງໃນນີ້ມີທ່ານນາງ ຄາງກິງຮວາ ຕິດໃນລາຍຊື່ເປັນລັດຖະມົນຕີກະຊວງການຕ່າງປະເທດແລະຖ້າທ່ານໄດ້ຮັບການແຕ່ງຕັ້ງ ກໍຈະກາຍເປັນລັດຖະມົນຕີການຕ່າງປະເທດຜູ້ຍິງຄົນທຳອິດຂອງ ສ.ເກົາຫຼີ.
ທ່ານນາງ ຄາງກິງຮວາ ເກີດເມື່ອປີ 1955, ປັດຈຸບັນໄດ້ປະຕິບັດໜ້າທີ່ເປັນທີ່ປຶກສາບັນຫານະໂຍບາຍຂອງເລຂາທິການໃຫຍ່ອົງການສະຫະປະຊາຊາດ. ຈາກຜົນງານແລະຄວາມສາມາດໃນການພົວພັນກັບບຸກຄົນສຳຄັນທ່ານອື່ນໆຂອງທ່ານນາງ ຄາງກິງຮວາ ໃນວຽກງານການຕ່າງປະເທດແລ້ວ, ທ່ານ ມູນເຈອິນ ໄດ້ຕີລາຄາສູງແລະຫວັງຈະດຶງທ່ານໃຫ້ເຂົ້າມາຮັບມືກັບບັນຫາການຕ່າງປະເທດ.
ໃນມື້ດຽວກັນກໍໄດ້ແຕ່ງຕັ້ງທ່ານ ຈຸງອີໂຢງ ເປັນຫົວໜ້າຫ້ອງການປ້ອງກັນຄວາມໝັ້ນຄົງຂອງປະເທດ, ທ່ານ ຈາງຮາຊຸງ ເປັນຫົວໜ້າຫ້ອງການນະໂຍບາຍແລະທ່ານອື່ນໆຕື່ມອີກ.
 |
