ເນື່ອງຈາກໄດ້ຮັບແຮງກະຕຸ້ນຈາກຄວາມຕ້ອງການພາຍໃນກໍຄືການລົງທຶນແລະການບໍລິໂພກສ່ວນບຸກຄົນສົ່ງຜົນເຮັດໃຫ້ເສດຖະກິດມາເລເຊຍໃນໄຕມາດທຳອິດຂອງປີນີ້ເພີ່ມຂຶ້ນ 5,6%. ທ່ານ ມູຮຳມັດ ອິບຣາຮີມ ຜູ້ອຳນວຍການໃຫຍ່ທະນາຄານແຫ່ງຊາດມາເລເຊຍຊີ້ໃຫ້ເຫັນວ່າ:ການເຕີບໂຕຂອງເສດຖະກິດໃນໄຕມາດທຳອິດທີ່ຜ່ານມາຄືຜົນງານທີ່ດີທີ່ສຸດນັບແຕ່ໄຕມາດທຳອິດຂອງປີ 2015 ເປັນຕົ້ນມາ ໂດຍໃນໄລຍະດັ່ງກ່າວ, ຄວາມຕ້ອງການພາຍໃນປະເທດໄດ້ເພີ່ມຂຶ້ນ 7,7% ແລະ ການໃຊ້ຈ່າຍໃນຂົງເຂດສາທາລະນະກໍມີທ່າອ່ຽງພັດທະນາໄປໃນທາງທີ່ດີ.
ທ່ານ ມູຮຳມັດ ອິບຣາຮີມ ກ່າວໃນການຖະແຫຼງຂ່າວຫວ່າງມໍ່ໆນີ້ວ່າ: ຖ້າໃນໄຕມາດຕໍ່ໄປ, ຄວາມຕ້ອງການພາຍໃນເປີດກວ້າງອອກຢ່າງຕໍ່ເນື່ອງ ແລະ ການສົ່ງອອກເພີ່ມຂຶ້ນ ກໍຄືການຮັກສາອັດຕາໄພເງິນເຟີ້ໄວ້ໄດ້ຢ່າງເໝາະສົມ ກໍຈະເຮັດໃຫ້ເສດຖະກິດໃນປີນີ້ເຕີບໂຕແຕ່ 4,3% ຫາ 4,8%. ເນື່ອງຈາກເສດຖະກິດມາເລເຊຍໃນໄຕມາດທຳອິດຂອງປີນີ້ໄດ້ເພີ່ມຂຶ້ນຢ່າງແຂງແຮງ ແລະ ຫຼາຍກວ່າຄາດໝາຍຂອງຕະຫຼາດ 4,8% ດັ່ງນັ້ນ,ນັກເສດຖະສາດໄດ້ອອກມາກ່າວຢ້ຳວ່າຈະປັບຄາດໝາຍການເຕີບໂຕຂອງເສດຖະກິດໃນປີນີ້ໃຫ້ສູງຂຶ້ນ.
 |
