ຕາມຂ່າວສານຊິນຮວາ: ວັນທີ 20 ເດືອນນີ້, ທ່ານເຈິນດາຍກວາງ ປະທານປະເທດ ສສ ຫວຽດນາມ ໄດ້ຕ້ອນຮັບການເຂົ້າຢ້ຽມຄຳນັບຂອງທ່ານຈຸ່ງຊ່ານ ລັດຖະມົນຕີກະຊວງການຄ້າຈີນ ທີ່ນະຄອນຫຼວງຮ່າໂນ້ຍ ໃນໃນໂອກາດທີ່ຮ່ວມກອງປະຊຸມລັດຖະມົນຕີການຄ້າອົງການຮ່ວມມືເສດຖະກິດການຄ້າອາຊີປາຊີຟິກ ຫຼື ອາເປັກ ຄັ້ງທີ 23.
ທ່ານຈຸ່ງຊ່ານກ່າວວ່າ, ກອງປະຊຸມເວທີປຶກສາຫາລືສຸດຍອດການຮ່ວມມືສາກົນ "ໜຶ່ງແລວທາງໜຶ່ງເສັ້ນທາງ" ທີ່ປະສົບຜົນສຳເລັດຢ່າງຈົບງາມ ແລະໄດ້ຮັບໝາກຜົນທີ່ອຸດົມສົມບູນນັ້ນ, ສ່ວນໜຶ່ງເປັນຜົນຈາກຫວຽດນາມໄດ້ສະໜັບສະໜູນ ແລະເຂົ້າຮ່ວມ "ຂໍ້ລິເລີ່ມຊຸກຍູ້ການຮ່ວມມືການຄ້າ ໜຶ່ງແລວທາງໜຶ່ງເສັ້ນທາງ". ຈາກນີ້ ຈີນຈະຮ່ວມກັບຫວຽດນາມ ພ້ອມກັນຊຸກຍູ້ການເຊື່ອມຕໍ່ລະຫວ່າງ "ໜຶ່ງແລວທາງໜຶ່ງເສັ້ນທາງ" ກັບ "ສອງແລວທາງໜຶ່ງວົງ" ແລະການສ້າງເຂດຮ່ວມມືເສດຖະກິດຊາຍແດນ ພ້ອມທັງສະໜັບສະໜູນຫວຽດນາມເປັນເຈົ້າພາບກອງປະຊຸມອາເປັກ 2017.
ທ່ານເຈິນດາຍກວາງກ່າວວ່າ, ຫວຽດນາມຍິນດີລົງເລິກສາຍພົວພັນຄູ່ຮ່ວມມືຍຸດທະສາດຮອບດ້ານຈີນແລະຫວຽດນາມຕື່ມອີກ ແລະເພີ່ມທະວີການ ເຊື່ອມຕໍ່ລະຫວ່າງ "ໜຶ່ງແລວທາງໜຶ່ງເສັ້ນທາງ" ກັບ "ສອງແລວທາງໜຶ່ງວົງ" ແລະການສ້າງເຂດຮ່ວມມືເສດຖະກິດຊາຍແດນ. ທີ່ສຳຄັນ ຫວຽດນາມກໍພ້ອມຈະເພີ່ມທະວີການປະສານງານກັບຈີນ ເພື່ອເປັນເຈົ້າພາບກອງປະຊຸມອາເປັກເປັນຢ່າງດີ.