ວັນທີ 22 ພຶດສະພານີ້, ທ່ານອັບດຸນ ຄາຣິມ ລູໄອບີ ລັດຖະມົນຕີກະຊວງນ້ຳມັນເຊື້ອໄຟອີຣັກກ່າວວ່າ: ໄດ້ສະໜັບສະໜູນການແກ່ຍາວເວລາປະຕິບັດສັນຍາວ່າດ້ວຍການຫຼຸດປະລິມານການຜະລິດນ້ຳມັນດິບຂອງອົງການປະເທດສົ່ງອອກນ້ຳມັນເຊື້ອໄຟຫຼື OPEC ອີກ 9 ເດືອນ.
ການສະໜັບສະໜູນດັ່ງກ່າວເກີດຂຶ້ນຫຼັງທ່ານ ລູໄອບີ ໄດ້ພົບປະເຈລະຈາກັບທ່ານ ຄາລິດ ໂອ ຟາລີ ລັດຖະມົນຕີກະຊວງນ້ຳມັນເຊື້ອໄຟອາຣັບບີ ຊາອຸດິດ ໃນໂອກາດຢ້ຽມຢາມອີຣັກໂດຍສອງປະເທດໄດ້ຫາລືໃນຫົວຂໍ້ຕ່າງໆເຊັ່ນ: ການສືບຕໍ່ປະຕິບັດສັນຍາວ່າດ້ວຍການຫຼຸດປະລິມານການຜະລິດນ້ຳມັນດິບຂອງອົງການ OPEC ແລະອື່ນໆ. ຂະນະທີ່ຫຼັງການເຈລະຈາ, ທ່ານ ລູໄອບີ ກໍໄດ້ຖະແຫຼງຂ່າວວ່າ: ອີຣັກເຫັນດີຂໍ້ສະເໜີຂອງອາຣັບບີ ຊາອຸດິດທີ່ສືບຕໍ່ປະຕິບັດສັນຍາວ່າດ້ວຍການຫຼຸດປະລິມານການຜະລິດນ້ຳມັນດິບອີກ 9 ເດືອນ.
ທ້າຍປີ 2016, ອົງການ OPEC ໄດ້ບັນລຸການເຊັນສັນຍາວ່າດ້ວຍການຫຼຸດປະລິມານການຜະລິດນ້ຳມັນດິບກັບ 11 ປະເທດທີ່ບໍ່ແມ່ນປະເທດຜະລິດນ້ຳມັນດິບຂອງອົງການ OPEC ຄືຣັດເຊຍແລະອື່ນໆ ເຊິ່ງຕາມສັນຍາ, ໃນໄລຍະ 6 ເດືອນຄືແຕ່ເດືອນມັງກອນປີ 2017 ເປັນຕົ້ນມາ, ອົງການ OPEC ໄດ້ຫຼຸດການຜະລິດນ້ຳມັນດິບ 1 ລ້ານ 2 ແສນບາເຣນສະເລ່ຍຕໍ່ມື້, ປະເທດທີ່ຜະລິດນ້ຳມັນດິບຂອງອົງການ OPEC 11 ປະເທດກໍໄດ້ຫຼຸດການຜະລິດສະເລ່ຍ 558.000 ບາເຣນຕໍ່ມື້.
 |
