ຕາມຂ່າວສານຈີນ: ບໍລິສັດຕາຄ່າຍໄຟຟ້າພາກໃຕ້ຈີນ ຫຼື CSG ໄດ້ເຜີຍແຜ່ "ບົດລາຍງານໜ້າທີ່ຮັບໃຊ້ສັງຄົມ" ສະບັບທີ 10 ໃນວັນທີ 23 ພຶດສະພານີ້ ໂດຍຊີ້ອອກວ່າ, ບໍລິສັດຕົນໄດ້ຕັ້ງໜ້າເຂົ້າຮ່ວມການສ້າງ "ໜຶ່ງແລວທາງໜຶ່ງເສັ້ນທາງ" ທີ່ນຳມາສູ່ການບັນລຸຍອດປະລິມານການຂາຍພະລັງງານໄຟຟ້າ ກັບ 3 ປະເທດອາຊີຕາເວັນອອກສຽງໃຕ້ ຄື ຫວຽດນາມ, ລາວ ແລະມຽນມາເຖິງ 48 ຕື້ 600 ລ້ານກິໂລວັດໂມງ.
ທ່ານວາງລິນ ຫົວໜ້າພະແນກທຸລະກິດສາກົນບໍລິສັດ CSG ກ່າວວ່າ, ບໍລິສັດຕົນໄດ້ຈ້າງພະນັກງານຫວຽດນາມ ແລະແຂວງຫຼວງນ້ຳທາຂອງລາວເກືອບ 2700 ຄົນ ແລະພະຍາຍາມເຮັດໃຫ້ເຂົາເຈົ້າມີຄວາມສາມາດບໍລິຫານໂຄງການໄດ້. ພ້ອມກັນນັ້ນ, ກໍຍົກລະດັບການກໍ່ສ້າງພື້ນຖານໂຄງລ່າງຂອງປະເທດທີ່ໄດ້ເຂົ້າໄປລົງທຶນ ເພື່ອຊ່ວຍພັດທະນາເສດຖະກິດສັງຄົມຂອງປະເທດເຫຼົ່ານີ້. ນອກນີ້, ບໍລິສັດຕົນຍັງມີແຜນການຈະໃຫ້ທຶນການສຶກສາ 110 ຄົນຂອງ 5 ປະເທດ ເຊັ່ນ ລາວ ເປັນຕົ້ນມາສຶກສາຢູ່ຈີນໃນສົກປີ 2016-2025.
ຂ່າວແຈ້ງຕື່ມວ່າ, ການຂາຍພະລັງງານໄຟຟ້າຂ້າມຊາຍແດນຂອງບໍລິສັດ CSG ສາມາດຫຼຸດຜ່ອນສະພາບການຂາດເຂີນໄຟຟ້າຢູ່ພາກເໜືອມຽນມາ, ລາວ ແລະຫວຽດນາມ ແລະສາມາດຮັບປະກັນໃຫ້ແກ່ການພັດທະນາເສດຖະກິດສັງຄົມຂອງປະເທດເຫຼົ່ານີ້ ໃນນີ້ປະຊາຊົນແຂວງຫຼວງນ້ຳທາໄດ້ຊົມໃຊ້ໄຟຟ້າທີ່ນຳເຂົ້າຈາກຈີນ.