ໂອກາດຕ້ອນຮັບການເຂົ້າຢ້ຽມຄຳນັບຂອງທ່ານຊ້າຍມິງຈ້າວ ຜູ້ອຳນວຍການໃຫຍ່ສຳນັກຂ່າວສານຊິນຮວາ ສປ ຈີນຢູ່ນະຄອນຫຼວງຮ່າໂນ້ຍໃນວັນທີ 24 ພຶດສະພານີ້, ທ່ານເຈິນດາຍກວາງ ປະທານປະເທດແຫ່ງ ສສ ຫວຽດນາມຢືນຢັນວ່າ ຜົນສຳເລັດໃນການພັດທະນາຂອງຫວຽດນາມແລະຈີນເປັນການສ້າງໂອກາດໃຫ້ກັນແລະທີ່ສຳຄັນ,ສອງປະເທດຄວນຖອດຖອນບົດຮຽນແລະຊ່ວຍເຫຼືອກັນໃຫ້ຫຼາຍກວ່າເກົ່າ.
ທ່ານເຈິນດາຍກວາງກ່າວວ່າ: ກ່ອນໜ້ານີ້ບໍ່ດົນ, ໄດ້ຢ້ຽມຢາມຈີນທາງລັດຖະກິດທັງໄດ້ເຂົ້າຮ່ວມກອງປະຊຸມເວທີປຶກສາຫາລືສຸດຍອດການຮ່ວມມືສາກົນ "ໜຶ່ງແລວທາງໜຶ່ງເສັ້ນທາງ"ທີ່ຈັດຂຶ້ນຢູ່ນະຄອນຫຼວງປັກກິ່ງແລະໃນຊຸມປີມໍ່ໆມານີ້, ຜູ້ນຳສອງປະເທດກໍໄດ້ແລກປ່ຽນການຢ້ຽມຢາມກັນຢ່າງຕໍ່ເນື່ອງ ໂດຍໄດ້ບັນລຸຄວາມເປັນເອກະພາບກັນໃນການເພີ່ມທະວີສາຍພົວພັນຄູ່ຮ່ວມມືຍຸດທະສາດຮອບດ້ານລະຫວ່າງສອງປະເທດ. ຫວຽດນາມໃຫ້ຄວາມສຳຄັນຕໍ່ສາຍພົວພັນມິດຕະພາບຖານບ້ານໃກ້ເຮືອນຄຽງກັບຈີນມາໂດຍຕະຫຼອດແລະຫວັງຊຸກຍູ້ສາຍພົວພັນລະຫວ່າງພັກ,ລັດແລະປະຊາຊົນຈີນໃຫ້ຂະຫຍາຍຕົວຢ່າງປອດໃສ,ໝັ້ນທ່ຽງຍາວນານແລະ ຍືນຍົງ.
ທ່ານຊ້າຍມິງຈ້າວຢືນຢັນວ່າ: ສຳນັກຂ່າວສານຊິນຮວາຈະປະຕິບັດຕາມຄວາມເປັນເອກະພາບກັນຂອງຜູ້ນຳສອງປະເທດທັງຈະເພີ່ມການລາຍງານການສົ່ງເສີມນ້ຳໃຈມິດຕະພາບທີ່ເປັນມູນເຊື້ອລະຫວ່າງສອງປະເທດຕື່ມອີກ ແລະເສີມຂະຫຍາຍບົດບາດຂອງສື່ມວນຊົນໃນຖານະເປັນ ຂົວຕໍ່ໃຫ້ແກ່ການພັດທະນາສາຍພົວພັນລະຫວ່າງປະຊາຊົນສອງຊາດ ທັງປັບປຸງເສີມຂະຫຍາຍມູນເຊື້ອທີ່ດີງາມໃນການພົວພັນລະຫວ່າງສອງປະເທດໃຫ້ໝັ້ນຄົງຕື່ມອີກ.
 |
