ວັນທີ 24 ພຶດສະພານີ້, ທ່ານ ລູ້ຄ່າງ ໂຄສົກກະຊວງການຕ່າງປະເທດຈີນກ່າວຂະນະທີ່ຕອບຄຳຖາມນັກຂ່າວກ່ຽວກັບສະພາບການຢູ່ພາກໃຕ້ປະເທດຟີລິບປິນວ່າ: ຈີນມີຄວາມເຂົ້າໃຈແລະເດັດດ່ຽວສະໜັບສະໜູນລັດຖະບານຟີລິບປິນໃນການປາບປາມລັດທິກໍ່ການຮ້າຍ.
ໃນການຖະແຫຼງຂ່າວທີ່ຈັດຂຶ້ນໃນມື້ດຽວກັນ, ມີນັກຂ່າວຖາມໂດຍອີງຕາມແຫຼ່ງຂ່າວວ່າ: ຢູ່ເມືອງມາລາວີພາກໃຕ້ປະເທດຟີລິບປິນໄດ້ເກີດເຫດໂຈມຕີແບບກໍ່ການຮ້າຍໃນວັນທີ 23 ພຶດສະພານີ້ ໂດຍກຸ່ມກໍ່ການຮ້າຍມາວເຕີໄດ້ປະທະກັບກອງທັບລັດຖະບານຟີລິບປິນຢ່າງດຸເດືອດ ແລະ ລັດຖະມົນຕີກະຊວງປ້ອງກັນປະເທດຟີລິບປິນກໍຢືນຢັນວ່າການປະທະດັ່ງກ່າວໄດ້ເຮັດໃຫ້ຕຳຫຼວດແລະທະຫານຂອງລັດຖະບານ 3 ຄົນເສຍຊີວິດ ແລະ 12 ຄົນບາດເຈັບ. ຕໍ່ເລື່ອງນີ້,ຈີນຄິດແນວໃດ?
ທ່ານ ລູ້ຄ່າງ ກ່າວວ່າ: ລັດທິກໍ່ການຮ້າຍແມ່ນສັດຕູຂອງໂລກ ເຊິ່ງຈີນມີຄວາມເຂົ້າໃຈແລະເດັດດ່ຽວສະໜັບສະໜູນລັດຖະບານຟີລິບປິນໃນການປາບປາມລັດທິກໍ່ການຮ້າຍ ທັງເຊື່ອໝັ້ນວ່າພາຍໃຕ້ການນຳພາຂອງປະທານາທິບໍດີໂຣດຣີໂກ ດູເຕີເຕ , ລັດຖະບານຟີລິບປິນຈະສາມາດປົກປັກຮັກສາຄວາມໝັ້ນຄົງແລະຄວາມປອດໄພຢູ່ເກາະມິນດານາວໄດ້ເປັນຢ່າງດີແນ່ນອນ.
 |
