ຂປລ. ໃນວັນທີ 24 ພຶດສະພາ 2017 ນີ້, ທີ່ສຳນັກງານ ທະນາຄານໂລກ ປະຈຳ ສປປ ລາວ ໄດ້ມີການເປີດເຜີຍ ບົດລາຍງານເສດຖະກິດຂອງ ສປປ ລາວ ສະບັບຫລ້າສຸດ ຂອງທະນາຄານໂລກ, ພ້ອມທັງ ສະແດງໃຫ້ເຫັນວ່າ ເສດຖະກິດຂອງ ສປປ ລາວ ຈະມີການເຕີບໂຕ ສະເລ່ຍປະມານ 7% ຕໍ່ປີ ໃນລະຫວ່າງ ປີ 2017 ຫາ 2019 ເຊິ່ງສູງກວ່າປະເທດອື່ນໆ ທີ່ຢູ່ໃນພາກພື້ນດຽວກັນ.
ອີງຕາມບົດລາຍງານເຫັນວ່າ ອັດຕາການເຕີບໂຕດັ່ງກ່າວ, ຕໍ່າກວ່າອັດຕາການເຕີບໂຕ ສະເລ່ຍໃນໄລຍະທີ່ຜ່ານມາ ແຕ່ກໍຖືວ່າຍັງສູງ ຍ້ອນບັນດາໂຄງການ ພະລັງງານໄຟຟ້າ ທີ່ໄດ້ຂຶ້ນແຜນໄວ້ ແລະ ການຟື້ນຕົວຂອງຂະແໜງ ກະສິກຳ-ອຸດສາຫະກຳປຸງແຕ່ງ ແມ່ນມີການເຊື່ອມໂຍງ ກັບພາກພື້ນຫລາຍຂຶ້ນ. ນອກຈາກນີ້, ບົດລາຍງານໃນປີທີ່ຜ່ານມາ ຍັງຍົກໃຫ້ເຫັນເຖິງຄວາມກົດດັນ ດ້ານອັດຕາເງິນເຟີ້ຍັງຕໍ່າ, ໃນຂະນະ ທີ່ການຂະຫຍາຍຕົວ ຂອງສິນເຊື່ອຄົງທີ່. ພ້ອມດຽວກັນ, ການຂະຫຍາຍຕົວ ຂອງຂະແໜງການ ພະລັງງານໄຟຟ້າ ຄາດວ່າຈະເຮັດໃຫ້ການສົ່ງອອກ ພະລັງງານໄຟຟ້າເພີ່ມຂຶ້ນ, ສ່ວນຂະແໜງການ ຊັບພະຍາກອນທຳມະຊາດ, ຂະແໜງທ່ອງທ່ຽວ, ຂະແໜງການຄ້າ ແລະ ການບໍລິການ ທາງດ້ານການເງິນ ແມ່ນຈະໄດ້ຮັບຜົນປະໂຫຍດ ຈາກການເຊື່ອມໂຍງກັບ ພາກພື້ນ ແລະ ລະບົບການສື່ສານ ທີ່ດີຂຶ້ນກວ່າເກົ່າ.
ທ່ານ ນາງ ຊາລີ ເບີນິງແຮມ ຫົວໜ້າທະນາຄານໂລກ ປະຈຳ ສປປລາວ ກ່າວວ່າ: ເສດຖະກິດຂອງລາວ ໄດ້ມີການເຕີບໂຕຢ່າງແຂງແຮງ ໃນໄລຍະຜ່ານມາ ເຊິ່ງຖືວ່າເປັນຜົນສຳເລັດ ທີ່ສຳຄັນໜຶ່ງ, ການປະຕິຮູບ ໂດຍການປັບປຸງ ວຽກງານສ່ວຍສາອາກອນ ແລະ ປະສິດທິຜົນ ທາງດ້ານລາຍຈ່າຍ ຂອງພາກລັດ ຈະສາມາດສ້າງຄວາມເຂັ້ມແຂງ ແລະ ຮັກສາການເຕີບໂຕ ທາງດ້ານເສດຖະກິດ ໃຫ້ຍືນຍົງ ແລະ ໃຊ້ປະໂຫຍດ ຈາກການເຕີບໂຕດັ່ງກ່າວ ເຂົ້າໃນການປັບປຸງ ການບໍລິການທາງດ້ານ ສາທາລະນະສຸກ, ການສຶກສາ, ຄຸນນະພາບຊີວິດ, ສ້າງໂອກາດໃຫ້ແກ່ຄອບຄົວ ແລະ ຊຸມຊົນໃນທົ່ວປະເທດ. ທ່ານ ນາງ ຊາລີ ເບີນິງແຮມ ກ່າວຕື່ມວ່າ: ທະນາຄານໂລກ ສະໜັບສະໜູນ ບາດກ້າວທີ່ລັດຖະບານ ໄດ້ເພີ່ມງົບປະມານ ໃຫ້ແກ່ຂະແໜງການ ສາທາລະນະສຸກ ຢູ່ ສປປ ລາວ ໃນໄລຍະຜ່ານມາ ແລະ ຢາກໃຫ້ເພີ່ມຂຶ້ນອີກ, ເນື່ອງຈາກວ່າລາຍຈ່າຍ ພາກລັດທັງໝົດ ສຳລັບຂະແໜງການດັ່ງກ່າວຍັງຕໍ່າ ສະເລ່ຍລາຍຈ່າຍຕໍ່ຫົວຄົນ ເຫັນວ່າຕໍ່າກວ່າໝູ່ໃນພາກພື້ນ. ເຊິ່ງການສືບຕໍ່ເອົາໃຈໃສ່ປັບປຸງ ການບໍລິການທາງດ້ານສາທາລະນະສຸກ ຈະສ້າງໂອກາດທີ່ສົດໃສ ໃຫ້ແກ່ຄົນຮຸ່ນນີ້ ແລະ ຄົນຮຸ່ນຫລັງໃນອະນາຄົດໄດ້.