ຫຼັງພົບປະເຈລະຈາກັບທ່ານເຊີເກ ລັຟຣົຟ ລັດຖະມົນຕີການຕ່າງປະເທດຣັດເຊຍຢູ່ນະຄອນຫຼວງມົສກູໃນວັນທີ 26 ພຶດສະພານີ້, ທ່ານຫວາງຢີ້ ລັດຖະມົນຕີກະຊວງການຕ່າງປະເທດຈີນແລະທ່ານລັຟຣົຟໄດ້ຮ່ວມກັນຖະແຫຼງຂ່າວຕໍ່ສື່ມວນຊົນໂດຍຢືນຢັນວ່າ ຈີນຖືຣັດເຊຍເປັນຄູ່ຮ່ວມຍຸດທະສາດສຳຄັນໃນການຮ່ວມສ້າງ "ໜຶ່ງແລວທາງໜຶ່ງເສັ້ນທາງ".
ທ່ານຫວາງຢີ້ກ່າວວ່າ: ທ່ານປະທານາທິບໍດີປູຕິນໄດ້ເດີນທາງເຂົ້າຮ່ວມກອງປະຊຸມເວທີປຶກສາຫາລືສຸດຍອດການຮ່ວມມືສາກົນ "ໜຶ່ງແລວທາງໜຶ່ງເສັ້ນທາງ"ຢູ່ຈີນກ່ອນໜ້ານີ້ບໍ່ດົນ ນັ້ນໄດ້ປະກອບສ່ວນທີ່ສຳຄັນເຮັດໃຫ້ກອງປະຊຸມປະສົບຜົນສຳເລັດ. ປັດຈຸບັນ, ການເຊື່ອມຕໍ່ລະຫວ່າງຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ"ກັບສະຫະພັນເສດຖະກິດເອີຮົບ-ອາຊີກຳລັງໄດ້ຮັບການ ປະຕິບັດຢ່າງໜັກແໜ້ນ ແລະສອງຝ່າຍກຳລັງຫາລືສັນຍາການພົວພັນຄູ່ຮ່ວມມືເສດຖະກິດແລະຫວັງຈະບັນລຸຄວາມເປັນເອກະພາບກັນໂດຍໄວເພື່ອສ້າງໃຫ້ເກີດຜົນສຳເລັດທີ່ເປັນຮູບປະທຳ.
ທ່ານຫວາງຢີ້ຢືນຢັນວ່າ ຍຸດທະສາດຄວາມໝັ້ນຄົງເສດຖະກິດຣັດເຊຍ 2030 ທີ່ ເຜີຍແຜ່ ກ່ອນໜ້ານີ້ບໍ່ດົນນັ້ນກົງກັນກັບຍຸດທະສາດພັດທະນາແຫ່ງຊາດຈີນເຊິ່ງລວມທັງ "ເປົ້າໝາຍ 100 ປີ 2 ເຫດການ"(ຄືເປົ້າໝາຍສ້າງສັງຄົມອິ່ມໜຳສຳລານໃຫ້ສຳເລັດຮອບດ້ານໃນໂອກາດວັນສ້າງຕັ້ງພັກກອມມູນິດຈີນຄົບຮອບ 100 ປີ ແລະສ້າງຈີນໃຫ້ເປັນປະເທດສັງຄົມນິຍົມທັນສະໄໝ ຮັ່ງມີເຂັ້ມແຂງ,ປະຊາທິປະໄຕ,ສີວິໄລແລະປອງດອງໃນໂອກາດວັນສະຖາປະນາສປຈີນຄົບຮອບ 100 ປີ) ,ຂະນະດຽວກັນກໍຍິນດີຮ່ວມກັບຣັດເຊຍສືບຕໍ່ເຮັດໃຫ້ເປົ້າໝາຍພັດທະນາໃນໄລຍະຍາວຂອງສອງປະເທດເຊື່ອມຈອດກັນຕື່ມອີກເພື່ອເພີ່ມພະລັງແຮງໃໝ່ເຂົ້າໃນການຊຸກຍູ້ສາຍພົວພັນຄູ່ປະສານງານຍຸດທະສາດຮອບດ້ານຂອງສອງປະເທດໃຫ້ຂະຫຍາຍຕົວຢ່າງຕໍ່ເນື່ອງ.