ປະທານາທິບໍດີຟີລິບປີນກ່າວວ່າກຸ່ມປະກອບອາວຸດຕໍ່ຕ້ານລັດຖະບານຢູ່ພາກໃຕ້ຫວັງການແຍກເປັນເອກະລາດ

ລັດຖະບານຟີລິບປີນເປີດເຜີຍໃນວັນທີ 26 ພຶດສະພານີ້ວ່າ, ໃນບົດລາຍງານທີ່ທ່ານໂຣດຣີໂກ ດູເຕີເຕ ປະທານາທິບໍດີຟີລິບປິນສົ່ງໃຫ້ລັດຖະສະພາໃນຕອນຄ່ຳວັນທີ 25 ພຶດສະພານີ້ລະບຸວ່າ, ການສູ້ຮົບທີ່ເກີດຂຶ້ນຢູ່ເມືອງມາລາວີພາກໃຕ້ຂອງປະເທດນັ້ນສະແດງໃຫ້ເຫັນວ່າ, ກຸ່ມປະກອບອາວຸດຣັກຕັກມາວເຕແລະອາບູຊາຢັບຫວັງຮ່ວມກັນສ້າງອຳນາດການປົກຄອງທີ່ເປັນເອກະລາດ, ແລະຄວບຄຸມເກາະມິນດານາວທັງໝົດ.

ໃນບົດລາຍງານ, ທ່ານດູເຕີເຕ ໄດ້ອະທິບາຍຂະບວນການສູ້ຮົບລະຫວ່າງທະຫານແລະຕຳຫຼວດຟີລິບປີນກັບກຸ່ມປະກອບອາວຸດແຕ່ວັນທີ 23 ພຶດສະພາເປັນຕົ້ນມາຢ່າງລະອຽດ. ແລະທ່ານກ່າວວ່າ, ມາຮອດຕອນຄ່ຳວັນທີ 25 ເດືອນດຽວກັນ, ກຸ່ມປະກອບອາວຸດຣັກຕັກມາວເຕແລະອາບູຊາຢັບຍັງສາມາດຍຶດແລະຄວບຄຸມເມືອງມາລາວີ 3 ສ່ວນ 4. ແລະຈາກສະຖານະການດັ່ງກ່າວ, ລັດຖະບານຄວນໃຊ້ມາດຕະການທີ່ "ວ່ອງໄວ"ແລະ "ແຂງແຮງ", ເພື່ອຮັບປະກັນຄວາມປອດໄພດ້ານຊີວິດແລະຊັບສິນຂອງປະຊາຊົນກໍຄືຜືນແຜ່ນດິນອັນຄົບຖ້ວນຂອງຊາດ.

ທ່ານເຕີຟິນ ໂລເຣັດຈານາ, ລັດຖະມົນຕີກະຊວງປ້ອງກັນປະເທດຟີລິບປີນກ່າວໃນວັນທີ 26 ພຶດສະພານີ້ວ່າ, ໝັ້ນໃຈຈະໃຊ້ເວລາປະມານໜຶ່ງອາທິດເພື່ອເຮັດໃຫ້ການສູ້ຮົບຢູ່ພາກໃຕ້ສິ້ນສຸດລົງແລະກັບຄືນສູ່ສະພາບປົກກະຕິ.