ຕາມຂ່າວສານຊິນຮວາ: ສື່ມວນຊົນອິນໂດເນເຊຍລາຍງານໃນວັນທີ 26 ພຶດສະພານີ້ວ່າ, ເຈົ້າໜ້າທີ່ຕຳຫຼວດປະເທດຕົນສາມາດຈັບຜູ້ຕ້ອງຫາໄດ້ 3 ຄົນທີ່ພົວພັນກັບເຫດການລະເບີດຈາກາຕາ ໃນວັນທີ 24 ເດືອນດຽວກັນ.
ໂຄສົກພະແນກຕຳຫຼວດແຂວງຈາວາຕາເວັນຕົກອິນໂດເນເຊຍຖະແຫຼງຕໍ່ສື່ມວນຊົນວ່າ, ເຈົ້າໜ້າທີ່ຕຳຫຼວດສາມາດຈັບຜູ້ຕ້ອງຫາທັງ 3 ຄົນນີ້ຢູ່ 3 ຈຸດໃນເມືອງບັນລຸງ ເທດສະບານແຂວງໃນຕອນເຊົ້າມືດວັນທີ 26 ພຶດສະພາ ແລະປັດຈຸບັນພວມສືບສວນວ່າພວກເຂົາໄດ້ຮັບໜ້າທີ່ກໍ່ເຫດແນວໃດ ແລະຂຶ້ນກັບອົງການໃດ.
ວັນທີ 25 ເດືອນນີ້, ທ່ານໂຈໂກ ວິໂດໂດ ປະທານາທິບໍດີອິນໂດເນເຊຍໄດ້ຮຽກຮ້ອງໃຫ້ເຈົ້າໜ້າທີ່ຕຳຫຼວດສືບສວນສອບສວນເຫດການນີ້ຢ່າງລະອຽດ ແລະຮຽກຮ້ອງໃຫ້ປະຊາຊົນອຸ່ນອ່ຽນ ແລະສາມັກຄີປອງດອງກັນ. ນອກນີ້, ກໍໄດ້ຮຽກຮ້ອງລັດຖະບານແລະລັດຖະສະພາເລັ່ງປັບປຸງກົດໝາຍຕ້ານການກໍ່ການຮ້າຍໃຫ້ສຳເລັດໂດຍໄວ ເພື່ອໃຫ້ອົງການຈັດຕັ້ງທີ່ກ່ຽວຂ້ອງມີສິດຢ່າງເຕັມສ່ວນໃນການໃຊ້ມາດຕະການປ້ອງກັນເພື່ອບໍ່ໃຫ້ເກີດເຫດການລັກສະນະນີ້ຂຶ້ນອີກ.