ວັນທີ 27 ພຶດສະພານີ້, ທ່ານ ລູ້ຄ່າງ ໂຄສົກກະຊວງການຕ່າງປະເທດຈີນໄດ້ຕອບຄຳຖາມຂອງນັກຂ່າວກ່ຽວກັບເຫດການໂຈມຕີແບບກໍ່ການຮ້າຍທີ່ເກີດຂຶ້ນຢູ່ເອຢິບ. ມີນັກຂ່າວຖາມວ່າ: ວັນທີ 26 ພຶດສະພານີ້, ຢູ່ແຂວງມິນຢາຂອງເອຢິບໄດ້ເກີດເຫດໂຈມຕີແບບກໍ່ການຮ້າຍທີ່ແນໃສ່ຜູ້ເຊື່ອຖືສາສະໜາຄິສຕຽນນິກາຍຄົບທິກ ເຊິ່ງມາຮອດປັດຈຸບັນໄດ້ເຮັດໃຫ້ມີປະຊາຊົນ 28 ຄົນເສຍຊີວິດ, 26 ຄົນບາດເຈັບ. ຈີນມີຄຳເຫັນແນວໃດຕໍ່ເລື່ອງນີ້?
ທ່ານ ລູ້ຄ່າງ ກ່າວວ່າ: ຈີນໄດ້ກ່າວປະນາມຢ່າງຮຸນແຮງຕໍ່ເຫດໂຈມຕີແບບກໍ່ການຮ້າຍທີ່ໜັກໜ່ວງຢູ່ແຂວງດັ່ງກ່າວຂອງເອຢິບ, ທ່ານ ສີຈິ້ນຜິງ ປະທານປະເທດຈີນ, ທ່ານ ຫຼີເຄີ້ສຽງ ນາຍົກລັດຖະມົນຕີຈີນ ແລະ ທ່ານ ຫວາງຢີ້ ລັດຖະມົນຕີກະຊວງການຕ່າງປະເທດຈີນຕ່າງໄດ້ສົ່ງໂທລະເລກສະແດງຄວາມເຫັນໃຈຕໍ່ທ່ານ ອັບເດວ ຟັດຕາ ອານ ຊີຊີ ປະທານາທິບໍດີເອຢິບ, ທ່ານ ເຊຣິຟ ອິສເມວ ນາຍົກລັດຖະມົນຕີເອຢິບແລະທ່ານຊາເມ ຊຸກຣີ ລັດຖະມົນຕີກະຊວງການຕ່າງປະເທດເອຢິບ.
ທ່ານ ລູ້ຄ່າງ ກ່າວວ່າ: ຈີນເດັດດ່ຽວຄັດຄ້ານລັດທິກໍ່ການຮ້າຍທຸກຮູບແບບ,ຈະສືບຕໍ່ເດັດດ່ຽວສະໜັບສະໜູນເອຢິບທີ່ຈະທຳຄວາມພະຍາຍາມໃນການປົກປັກຮັກສາຄວາມໝັ້ນຄົງແລະສະຖຽນລະພາບຂອງປະເທດ ແລະ ໂຈມຕີລັດທິກໍ່ການຮ້າຍ.
 |
