ໂຄສົກກະຊວງການຕ່າງປະເທດຈີນຕອບຄຳຖາມຂອງນັກຂ່າວກ່ຽວກັບຖະແຫຼງການຮ່ວມກອງປະຊຸມສຸດຍອດກຸ່ມ 7 ປະເທດທີ່ມີເນື້ອໃນກ່ຽວພັນເຖິງບັນຫາທະເລຈີນຕາເວັນອອກແລະທະເລຈີນໃຕ້

ວັນທີ 28 ພຶດສະພານີ້, ທ່ານ ລູ້ຄ່າງ ໂຄສົກກະຊວງການຕ່າງປະເທດຈີນໄດ້ຕອບຄຳຖາມຂອງນັກຂ່າວກ່ຽວກັບບັນຫາທີ່ກ່ຽວຂ້ອງຂອງຖະແຫຼງການຮ່ວມກອງປະຊຸມສຸດຍອດກຸ່ມ 7 ປະເທດ.

ມີນັກຂ່າວຖາມວ່າ: ຖະແຫຼງການຮ່ວມກອງປະຊຸມສຸດຍອດກຸ່ມ 7 ປະເທດທີ່ຈັດຂຶ້ນຢູ່ອີຕາລີໃນຫວ່າງມໍ່ໆນີ້ມີເນື້ອໃນກ່ຽວພັນເຖິງບັນຫາທະເລຈີນຕາເວັນອອກແລະທະເລຈີນໃຕ້, ທ່ານມີຄຳວິຈານແນວໃດ?

ທ່ານ ລູ້ຄ່າງ ກ່າວວ່າ: ຈີນໄດ້ມີຄວາມບໍ່ພໍໃຈຢ່າງຮຸນແຮງຕໍ່ຖະແຫຼງການຮ່ວມກອງປະຊຸມສຸດຍອດກຸ່ມ 7 ປະເທດທີ່ເວົ້ານີ້ເວົ້ານັ້ນຕໍ່ບັນຫາທະເລຈີນຕາເວັນອອກແລະທະເລຈີນໃຕ້ໂດຍເອົາກົດໝາຍສາກົນເປັນຂໍ້ອ້າງ.

ທ່ານກ່າວວ່າ: ຈີນມີຫຼັກໝັ້ນຢ່າງຈະແຈ້ງມາໂດຍຕະຫຼອດໃນບັນຫາທະເລຈີນຕາເວັນອອກແລະທະເລຈີນໃຕ້ ແລະໄດ້ສຸມໃສ່ການຄວບຄຸມແລະແກ້ໄຂຄວາມຂັດແຍ້ງກັນທີ່ກ່ຽວຂ້ອງກັບບັນດາປະເທດທີ່ກ່ຽວຂ້ອງໂດຍກົງຢ່າງເໝາະສົມໂດຍຜ່ານການປຶກສາຫາລືແລະການເຈລະຈາມາໂດຍຕະຫຼອດ,ຊຸກຍູ້ການຮ່ວມມືໃນຂົງເຂດຕ່າງໆ,ຮ່ວມກັນປົກປັກຮັກສາສັນຕິພາບແລະສະຖຽນລະພາບຂອງທະເລຈີນຕາເວັນອອກແລະທະເລຈີນໃຕ້,ປົກປ້ອງຄວາມເສລີໃນດ້ານການເດີນເຮືອແລະເດີນອາກາດພ້ອມທັງຄວາມປອດໄພຂອງເສັ້ນທາງທາງທະເລ.

ທ່ານ ລູ້ຄ່າງ ກ່າວຕື່ມວ່າ: "ພວກຂ້າພະເຈົ້າຫວັງໃຫ້ກຸ່ມ 7 ປະເທດແລະປະເທດຢູ່ນອກພາກພື້ນສາມາດເບິ່ງສະຖານະການຢ່າງຈະແຈ້ງ,ເຄົາລົບແລະປະຕິບັດຕາມຄຳໝັ້ນສັນຍາທີ່ບໍ່ຍຶດຖືຫຼັກໝັ້ນໃດໆໃນບັນຫາຄວາມຂັດແຍ້ງກັນທີ່ກ່ຽວຂ້ອງ,ເຄົາລົບຄວາມພະຍາຍາມຂອງປະເທດໃນພາກພື້ນໃນການຄວບຄຸມແລະແກ້ໄຂຄວາມຂັດແຍ້ງກັນຢ່າງເຕັມທີ່ຢຸດຕິການເຜີຍແຜ່ຖ້ອຍຄວາມທີ່ບໍ່ມີຄວາມຮັບຜິດຊອບ ແລະ ເສີມຂະຫຍາຍບົດບາດທີ່ມີລັກສະນະສ້າງສັນຕໍ່ສັນຕິພາບແລະສະຖຽນລະພາບຂອງພາກພື້ນແຫ່ງນີ້."