ຕາມຂ່າວສານຊີນຮວາ: ຫ້ອງການຄະນະກຳມະການປາບປາມຢາເສບຕິດແຫ່ງຊາດຈີນແຈ້ງຂ່າວໃນວັນທີ 28 ພຶດສະພານີ້ວ່າ,ຫວ່າງກ່ອນນີ້ບໍ່ດົນ,ຫ້ອງການຄະນະກຳມະການປາບປາມຢາເສບຕິດແຫ່ງຊາດ ກົມປາບປາມຢາເສບຕິດກະຊວງປ້ອງກັນຄວາມສະຫງົບແລະກົມກຳຈັດການຄ້າເຖື່ອນຂອງກົມໃຫຍ່ດ່ານພາສີຈີນ ໄດ້ຮ່ວມກັບພາກສ່ວນທີ່ກ່ຽວຂ້ອງຂອງຟີລິບປິນມ້າງຄະດີການຄ້າຢາເສບຕິດເຖື່ອນທີ່ໃຫຍ່ພິລຶກ ເຊິ່ງໄດ້ຍຶດເອົາຢາເສບຕິດໄອສ໌ 604 ກີໂລຢູ່ເມືອງວາເລນຊຸເອລາຂອງຟີລິບປິນ ແລະຈັບຕົວຜູ້ຕ້ອງຫາ 13 ຄົນ, ໃນນັ້ນມີຄົນໜຶ່ງເປັນຄົນສັນຊາດຟີລິບປິນ.
ເຈົ້າໜ້າທີ່ທີ່ກ່ຽວຂ້ອງຂອງຫ້ອງການຄະນະກຳມະການປາບປາມຢາເສບຕິດແຫ່ງຊາດຈີນກ່າວວ່າ: ການມ້າງຄະດີດັ່ງກ່າວຢ່າງສຳເລັດຜົນນັ້ນ ແມ່ນໝາກຜົນອັນສຳຄັນໃນການຮ່ວມມືປະຕິບັດກົດໝາຍດ້ານການປາບປາມຢາເສບຕິດລະຫວ່າງຈີນ-ຟີລິບປິນນັບແຕ່ພາກສ່ວນປາບປາມຢາເສບຕິດຂອງສອງປະເທດໄດ້ເຊັນສັນຍາຮ່ວມມືເມື່ອເດືອນຕຸລາປີ 2016 ເປັນຕົ້ນມາ ເຊິ່ງໄດ້ສະແດງໃຫ້ເຫັນຢ່າງເຕັມທີ່ເຖິງຈິດໃຈທີ່ໝັ້ນໜຽວບໍ່ປ່ຽນແປງຂອງຈີນແລະຟີລິບປິນໃນການປະສານງານເປັນເອກະພາບກັນ ໂຈມຕີອາຊະຍາກຳຄ້າຢາເສບຕິດຢ່າງເຄັ່ງຄັດ. ພາກສ່ວນປາບປາມຢາເສບຕິດຂອງຈີນຈະເພີ່ມທະວີການຮ່ວມມືກັບພາກສ່ວນທີ່ກ່ຽວຂ້ອງຂອງຟີລິບປິນຕື່ມອີກ,ອອກແຮງສຸດຂີດເພື່ອສະໜັບສະໜູນການເຄື່ອນໄຫວປາບປາມຢາເສບຕິດຂອງຟີລິບປິນ ແລະສະກັດກັ້ນການຄ້າຢາເສບຕິດ.