ວັນທີ 28 ພຶດສະພານີ້, ສູນຄຸ້ມຄອງໄພພິບັດຂອງສີລັງກາໄດ້ອອກຖະແຫຼງການວ່າ: ນ້ຳຖ້ວມແລະດິນພູເຈື່ອນທີ່ເກີດຂຶ້ນຍ້ອນຝົນຕົກໜັກຢູ່ໃນປະເທດຕົນໄດ້ເຮັດໃຫ້ມີປະຊາຊົນຈຳນວນ 146 ຄົນເສຍຊີວິດ, 100 ຄົນຫາຍສາບສູນ, ຫຼາຍກວ່າ 1 ລ້ານຄົນປະສົບໄພ.
ໃນຫຼາຍມື້ຜ່ານມາ,ຟ້າຝົນລົມແຮງຢ່າງຕໍ່ເນື່ອງໄດ້ໂຈມຕີ 14 ເຂດແລະຕົວເມືອງຢູ່ພາກຕາເວັນຕົກແລະພາກໃຕ້ຂອງສີລັງກາເຊັ່ນ: ໂຄລົມໂບ, ຮຳບານໂຕຕາ,ມາຕາຣາ,ເກົາເລ,ຣັດນາປູຣາ,ຄາລູຕາຣາແລະແຫ່ງອື່ນໆ, ເຊິ່ງໄດ້ສົ່ງຜົນເຮັດໃຫ້ເກີດໄພນ້ຳຖ້ວມແລະພູເຈື່ອນ.
ປັດຈຸບັນ,ກອງກູ້ໄພແລະຊ່ວຍເຫຼືອທີ່ປະກອບດ້ວຍກອງທັບເຮືອ,ກອງທັບບົກແລະກອງທັບອາກາດ,ຕຳຫຼວດແລະອົງການກູ້ໄພແລະຊ່ວຍເຫຼືອອາຊີບຂອງສີລັງກາຍັງພວມດຳເນີນການກູ້ໄພແລະຊ່ວຍເຫຼືອຢູ່ເຂດປະສົບໄພຢູ່,ແລະໄດ້ຍ້າຍປະຊາຊົນຫຼາຍໝື່ນຄົນເຊິ່ງລວມທັງປະຊາຊົນຜູ້ດຳລົງຊີວິດຢູ່ແຄມຝັ່ງແມ່ນ້ຳ 3 ສາຍຢູ່ພາກກາງແລະພາກໃຕ້ຂອງສີລັງກາໄປບ່ອນອື່ນ. ຢູ່ທົ່ວປະເທດສີລັງກາໄດ້ຕັ້ງໃຫ້ມີສະຖານທີ່ລີ້ໄພຊົ່ວຄາວ 304 ບ່ອນ. ຍ້ອນຖືກຜົນກະທົບຈາກໄພນ້ຳຖ້ວມແລະໄພດິນພູເຈື່ອນ,ທາງດ່ວນແລະທາງລົດໄຟຢູ່ພາກໃຕ້ຂອງສີລັງກາໄດ້ຢຸດຕິການນຳໃຊ້ແລ້ວ,ໂຮງຮຽນຢູ່ຫຼາຍແຫ່ງຂອງສີລັງກາກໍ່ໄດ້ພັກຊົ່ວຄາວ.
 |
